كنت ناوية اتكلم انهارده عن حب الله بس للاسف مش هينفع
لاني عشان اتكلم عنه هطلب منكم طلب هيكون تقيل اوووووي عليكم ومحدش هينفذوا اصلا
هتكلم فيه لما الاقي البنات ملتزمة في الصلاة كويس خصوصا صلاة الفجر باذن الله
هنتكلم عن حاجه تانيه
هي عبادة ربنا بيحبها جدا جدا جدا جدا من هنا ل 100 سنه جايه هقول جدا ومش هيكفي
يقول صلى الله عليه وسلم: (( ألا أدلكم على خير أعمالكم وأزكاها عند مليككم وأرفعها في درجاتكم وخير لكم من إنفاق الذهب والفضة وخير لكم من أن تلقوا عدوكم فتضربوا أعناقهم ويضربوا أعناقكم، قالوا: بلى يا رسول الله، قال: ذكر الله تعالى ))
ذكر الله يا بنات
عيب تكوني مسلمه ومتذكريش الله
اومال انتي مسلمه ليه؟
بصي الرسول عليه الصلاة والسلام لخص فوايد الذكر بايه:
1/ خير اعمالكم 2/ ازكاها
3/ ارفعها في درجاتكم
4/ افضل من انفاق الذهب والفضه
5/ افضل من الجهاااااااااااااااد في سبيل الله
انتو متخيلين ؟
كل الفوايد دي بعباده بسيطه مش بتطلب مجهود خاااااااالص
مش هنقول زي الصلاة بنكسل نقوم من مكاننا ونكسل نتوضا
مش هنقول زي الصيام بنكسل نصوم في سبيل الله عشان الاكل والشرب هنتحرم منهم
مش هنقول زي قيام الليل بنكسل نصحى عشان نصلي!
ملكوش حجة المرادي قصاد ربنا
دي عباده مش محتاجه منكم وضوء و محتاجه انكم تعملوها ف وقت محدد ولا محتاجه انكم تتحركوا من مكانكم اصلا
كل ايلي محتاجينه تحركي لسانك وانتي اصلا استاذة في الكلام والرغي فبدل ما تتكلمي ف حاجه مش مفيده وممكن تاخدي عليها سيئات لو كانت غيبه او نميمه ودا الاغلب
لا دانتي هتحركي لسانك في حاجه اجمل واشرف واعلى وافضل من الجهاد في سبيل الله
صعبه دي؟ لحد دلوقتي اتفقنا هتحركي لسانك وانتي قاعده كده قولي استغفر الله.. لا اله الا الله. سبحان الله. الحمد لله. الله اكبر .. قولي ساكته ليه؟
انتي ياللي بتقولي انا مش عارفه اثبت على الطاعه كل ما اثبت اقع
الحل هو ذكر الله
ذكر الله هو السر صدقيني والله العظيم
ياللي بتقولي انك بتعملي معصية معينه ومش عارفه تبطليها وكل ما تتوبي منها ترجعي ومتقدريش
اذكري الله كده
لو ذكرتي ربنا هيقويكي 
مستحيل تكوني بتذكري الله وربنا يسيبك تعصيه بالسهوله دي
ربنا هيعصمك ويحميكي ويقويكي لانك بتذكريه
ياللي بتقولي بحس بفتور وكسل
الحل هو ذكر الله
عن أبي موسَى رضي الله عنه قال: قال النّبيُّ صلّى الله عليه وسلّم
(( مَثَلُ الَّذِي يَذْكُرُ رَبَّهُ وَالَّذِي لاَ يَذْكُرُ رَبّهُ، مَثَلُ الحَيِّ وَالمَيِّتِ )).
رواه البخاري ومسلم.
ذكر الله هيغذي قلبك لان ربنا اصلاخلقه محتاج تغذية ولو متغذاش هيموت
وتغذية القلب شئ معنوي يعني مش بالاكل والشرب لا دي بحاجه اجمل واشرف انك تقولي لا اله الا الله كده قلبك بيفوء وبينتعش
ولما قلبك ينتعش جسمك كله هينشط ولما جسمك ينشط خلاص مفيش كسل عن اي حاجه ومفيش فتور
دانا كل دا بكلمك عشان تحطي الذكر بس في دايرة اهتمامك انتي شايفه وصلتي لايه
طب دا نسميه ايه؟
كسل برده!
لا معتقدش انه كسل لاني زي ماقولت انتي مش بتعملي مجهود فيه ولا حركة
اومال دا ايه تفتكري؟ مش بتذكري ربنا ليه؟
عارفه ولا اقولك انا الاجابه البشعه ومعلش ف اللفظ بس دي حقيقه هي بشعه
بتنســـــــــــي!! صح؟
معلش اصل انتي يعيني تفكيرك مشغول بدي عملت ايه ودا بيعمل ايه والطبيخ ع النار ووووو ونسيتي ايلي خلقك!
لالا يا الاءحرام تقولي كده ع فكرة ازاي ننسى ربنا يعني وهو ايلي خلقنا اساسا؟
والله طب فسريلي موقفك يمكن اكون غلطانه واتمنى كده
مش بتصلي على رسولك ايلي هيشفعلك وايلي مشتقالك لييييييييييييييه؟
مش بتقولي لا اله الا الله وتهزي بيها كل كيانك ليه؟
مش بتستغفري وانتي عارفه عجائب الاستغفار ليه؟؟؟؟؟
دانتي ايلي محتاجه لكده
طب لسه مصممه انك متذكريش الله؟
تعالي نشوف اسرار الاذكار
1/ الاستغفار
قال صلى الله عليه وسلم : من قال استغفر الله الذي لا اله الا هو الحي القيوم واتوب اليه غفرت ذنوبه وان كان فر من الزحف.
ببساطه كده
سامعه ياللي بتقولي ذنوبي كتير
سيد الاستغفار:قال صلى الله عليه وسلم: سيد الاستغفار ان تقول: اللهم انت ربي لا اله الا انت خلقتني , وانا عبدك وانا على عهدك ووعدك مااستطعت ,اعوذ بك من شر ما صنعت , ابوء لك بنعمتك علي وابوء بذنبي فاغفر لي فانه لا يغفر الذنوب الا انت.
من قالها من النهار موقنا بها فمات في يومه قبل ان يمسي فهو من اهل الجنه , ومن قالها من الليل وهو موقن بها فمات قبل ان يصبح فهو من اهل الجنه .
يااااااااااه دا كأنه اوكازيون لدخول الجنه والله
ياشيخه دانتي لما بتسمعي ان المحل الفلاني عامل اوكازيون بتجري عليه وانتي متحمسه وتشتري من عنده كتير فرصه بقى
ما بالك لما تعرفي ان فيه اوكازيون لدخول الجنه؟
قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مَنْ لَزِمَ الِاسْتِغْفَارَ جَعَلَ اللَّهُ لَهُ مِنْ كُلِّ ضِيقٍ مَخْرَجًا ، وَمِنْ كُلِّ هَمٍّ فَرَجًا ، وَرَزَقَهُ مِنْ حَيْثُ لَا يَحْتَسِبُ )
كلنا حفظناه
ومع ذلك مش مدركين جمال الكلام دا
لو تاخدوا بالكم من حالنا
اغلب الوقت حاسين بضيق ومخنوقين والظروف الماليه ف النازل بسبب ظروف البلد
دي حالتنا ديما او اغلب الوقت
طب ماهو العلاج اهو ( الاستغفار) مش بتاخدي العلاج ليه
مش متخيله ان الكلام دا صح؟ استغفر الله
دي مصيبة اكبر لو مش مقتنعه !!!
2/ الصلاة على النبي
قال الله تعالى: إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيماً [الأحزاب:56].
الموضوع امر من الله يا بنات
دا مش مجرد اننا نعرفه ثوابه فننفذه عشان الثواب
لا الموضوع انك اساسا مأمورة تصلي على الرسول عليه الصلاة والسلام
قال : { من صلّى عليّ حين يصبح عشراً وحين يمسي عشراً أدركته شفاعتي } [أخرجه الطبراني
وعن عبدالله بن مسعود عن النبي قال: { إن لله ملائكة سياحين يبلغونني من أمتي السلام } [رواه النسائي
يعني دلوقتي لما ترددي وتقولي اللهم صل وسلم وبارك على سيدي وحبيبي محمد عليه الصلاة والسلام
بصي هيحصل ايه:
اولا ربنا هيصلي عليكي بكل مرة تصليها على النبي 10 مرات
طبعا صلاة تليق بمقامه سبحانه وتعالى
ثانيا الملايكه هتجري تبلغ الرسول عليه الصلاة والسلام ان فلانه صلت عليك دلوقتي وبتسلم عليك يقوم النبي يرد عليكي السلام دا غير انك هتكسبي شفاعته يوم القيامه كمان دا غير حب ربنا ليكي من حبه في رسوله
ياااااااااااااه
عن أبي هريرة رضي الله عنه عن رسول الله قال: ((ما من أحد يسلم علي إلا رد الله إلي روحي حتى أرد عليه السلام))
ثالثا لو دعيتي بعدها مبروك ربنا هيستجيبلك باذن الله
وقد ورد في الحديث: { الدعاء محجوب حتى يصلي الداعي على النبي } [رواه الطبراني
رابعا مغفرة الذنوب + هتتقربي من ربنا ورسولك عليه الصلاة والسلام+ هيكفيكي ربنا ايلي همك وهيفرج عنك+ هتبعد الفقر+ هتهديكي وكل ما هتقوليها هتحبي الرسول اكتر واكتر
3/ لو قولتي لا اله الا الله هيحصل ايه:
*قال النبي صلى الله عليه وسلم :*
( ليس من عبد يقول لا اله الا الله مائة مره إلا بعثة الله تعالى يوم القيامة
ووجهه كالقمر ليلة البدر ولا يرفع لأحد يومئذ عمل أفضل من عمله إلا من قال مثل
قوله أو زاد )
رواه الطبرانى
4/ لوقولتي سبحان الله وبحمده
هيحصل ايه؟:
عن أبي هريرة , رضي الله عنه قال : قال رسول الله صلى الله عليه وسلم : (( كلمتان خفيفتان على اللسان , ثقيلتان في الميزان , حبيبتان إلى الرحمن : سبحان الله وبحمده , سبحان الله العظيم )) متفق عليه .
عن جابر رضي الله عنه , عن النبي صلى الله عليه وسلم قال : (( من قال : سبحان الله وبحمده , غرست له نخلة في الجنة )) رواه الترمذي
قولي كده سبحان الله وبحمده
شايفه شكل النخله الجميله ايلي اتكتبت باسمك دلوقتي في الجنه؟
مبروك
( من قال سبحان الله وبحمده مائة مرة حطت خطاياه، وإن كانت مثل زبد البحر ) متفق عليه.
يااااااااه 100 مرة كتير اوي ياالاء
طب هقولك حاجه
لو عندك ستوب ووتش جربي كده تقولي 100 مرة سبحان الله وبحمده وشوفي هتاخد وقت اد ايه
لو خدت اكتر من 4 دقايق يبقالك الكلام يا ستي
باقي حاجه عايزة اقولها مهمه اوووي
سمعت عن ناس كتير قالوا انهم بيستغفروا وبيذكروا الله وكل حاجه بس لسه هما في كرب ومهمومين ومش حاسين بالراحه ايلي ربنا قال عنها ( الا بذكر الله تطمئن القلوب)
انا هقولكم السبب ببساطه:
السبب انهم بيقولوها تأدية واجب من الاخر
بيحركوا لسانهم وهما اصلا مش مركزين في ايلي بيقولوه
ممكن يوصلوا لعدد 1000 مرة واكتر ف الاستغفار بس للاسف مش مركزين
دلوقتي هقولكم مش عايزين عدد محدش يحسب حاجه
الحساب هيكون كيفي مش كمي
بمعنى اعم هيكون بالطريقه مش بالعدد
بمعني اعم اكتر
سيبك من العدد خاااااااااالص احنا مش هنعد حاجه على ربنا
احنا عايزين نستغفر واحنا ف بالنا الحديث بتاع من لزم الاستغفار ربنا هيفرج همه ويفك كربه ويرزقه من حيث يحتسب
هنستغفر واحنا في بالنا الذنوب ايلي عملناها وعايزين نتوب منها
هنستغفر واحنا في بالنا اننا بنحاول نرضي ربنا
هنصلي على الرسول عشان ربنا امرنا بكده وعشان نتخيل ان الرسول بيرد علينا دلوقتي
هنقول سبحان الله وبحمده واحنا عارفين معناها بصي كده للسماء جميله اد ايه وقولي سبحان الله بصي للكون وللبحار والانهار والشجر والجبال ايلي قاعده طول الوقت بتسبح بحمد ربنا
يعني هي الجبال دي احسن منك انتي ياللي عندك عقل؟ ياللي ربنا من حبه فيكي ميزك بحاجات جميله ومن حبه فيكي بيديكي اوكازيون لو قولتي كذا هديكي كذا
دا كمان مش ببلاش
اومال لو كان ربنا قالك اذكريني غصب عنك ومش هتاخدي حسنات اذا كان عجبك ولو مسمعتيش الكلام هدخلك النار
كنتي هتعملي ايه؟
ماهو كان يقدر يقول كده واكتر من كده
بس هو حابب ان العلاقه متكونش بالشكل دا عشان بيحبك
مش معقول يكون بيمدلك ايده كل دا وانتي مستغنيه يعني؟ !!
مش معقول تعرفي ثواب الاستغفار والتسبيح والصلاة على الرسول وبرده مفيش فايده
مش معقول يكون ربنا مسهلهالك وبيقولك مش عايز وضوء ولا وقت محدد وانتي برده مش فارق معاكي
مش معقول ربنا يقولك انا بحبك تذكريني وبحب الكلام دا وانتي تقولي وانا مالي!
مش معقول ربنا يقولك اذكروني اذكركم وانتي في الطراوة
يعني لو ذكرتي الله دلوقتي ربنا يذكرك وانتي مش فاهمه برده يعني متزعليش مني مين انتي عشان ربنا يذكرك اصلا ومع ذلك مستغنيه!!!
ايه دا
دا ربنا رحيم بينا اوووووي كده انه مستحملنا اصلا الحمد لله ان ربنا هو ربنا
: يقول الله تعالى : ( أنا عند ظن عبدي بي ، وأنا معه إذا ذكرني ، فإن ذكرني في نفسه ذكرته في نفسي ، وإن ذكرني في ملإ ذكرته في ملإ خير منهم …)
قولي كده لا اله الا الله وحسيها ان ربنا دلوقتي بيذكرك باسمك يانهاااااااااااار
هيجرالك ايه يعني
هتخسي؟
مانتي كل يوم بتروحي الكليه او المدرسه او الشغل رايح جاي ف المواصلات المقرفه دي فيها لما تقعدي كده مع نفسك ف المواصلات وتذكري الله
عشان حتى ربنا يحفظك من البلاوي ايلي وصلنالها
( احفظ الله يحفظك)
عندك مشكله مش لاقيالها حل طب اقعدي استهدي بالله وقولي استغفر الله ولا اله الا الله ولا حول ولا قوة الا بالله
شوفي المشكله هتتحل ازاي بمعجزة
خدي بالك
ذكر الله عشان يتعمل صح ويتنفذ صح وتاخدي ثوابه صح
له شرطين
سهلين جدااااا
1/ الاستمرار
متقوليش مرة وتسكتي وتقولي ماهو ربنا مفكش كربي اهو!!! عيب كده عليكي
قال تعالى " والذاكرين الله كثيرا والذاكرات أعد الله لهم مغفرة وأجرا عظيما "
كثيرا مش مقصود بيها انك تحسبي قولتي كام مرة لحد دلوقتي
لالا
طول ما انتي قاعده كده مع نفسك اذكري الله
……………………………..
الشرط التاني
حضور القلب
زي ما قولتلكم تقولها وانتو حاسين بيها مش ببغبان وخلاص
وعلطول تخيلي ان ربنا بيذكرك باسمك لما تذكريه
وان الرسول عليه الصلاة والسلام بيسلم عليكي لما تصلي عليه
ومتنسيش كمان ان ربنا بيباهي بيكي الملايكه لما تذكريه من فرحته بيكي
كل دا ولسه مصممه؟
صدقيني لو شايفه قلبك قاسي
عالجيه بذكر الله
ولو شايفه قلبك مجروح
داويه بذكر الله
اسمعي الكلام انتي الكسبانه ومش اي مكسب كمان
اكيييييييييييييد مش هتخسري حاجه
الواجب
كل يوم اشوف كل بنوتة وهي بتقول انها ذكرت الله وقالت ايه يعني استغفرت بس ولا سبحت بس ولا عملت ايه
انا وراكم لحد ما تحسوا ان ذكر الله بقى جزء منكم
وانكم ف البدايه حت لو بتقولوا شويا وبعدين تنسوا
بالاستمرار هتقولوا علطوووووووول
بس اسمعوا الكلام وابدئوا من دلوقتي يلا انطلقوا
اوعدوا ربنا انكم هتذكروه عشان يرضى عننا ويفرح بينا
بارك الله فيكى