النهاردة هوصفلكم حاجة جديدة
عيش لذيذ هوا في الاصل خبز فلسطيني اتعلمته
من ساعه ما عملته كل يوم ماما واخواتي يطلبوه نتعشى بيه او نفطر بيه
معلش طولت عليكم
المهم
المقادير :
كيلو دقيق
ملعقة كبيرة خميرة
ملعقة صغيرة ملح
ملعقة كبيرة كركم ( عصفر )
معلقة ينسون مطحون
سمسم
حبة البركة
زيت زتون
الطريقة :
اول حاجة نحط الخميرة مع نص معلقة سكر في شوية ميه او لبن حليب ونسيبها تتخمر
نحط الكركم والينسون والملح على الدقيق ونقلبه كويس
نضيف الخميرة
بعدين نعجن الدقيق بميه دافية لغاية ما يكون عجينه متماسكة وطرية
نرش على العجينة شوية زيت زتون وشوية سمسم وحبه البركة
وبتبقى كده
نغطيها كويس لحد ما تخمر
بعدين نقطعها قد حبة البرتقاله بيطلع حوالي 8 ارغفة
بعدين نفردها بايدينا مش بالنشابة
لما تبقى مدورة قد رغيف العيش ناخد طرفها ونشده للنص بعدين للجنب شوية ناخد طرف تاني ونشده للنص
ياخسارة نسيت اصورلكم
المهم اعملوه زي المشلتت لموا الرغيف مع بعض كده
بعدين نتركه فتره لما نحسه خمر تاني
نولع الفرن ونخليه حامي
ناخد الرغيف ونرقرقه ونخلي سمكه متوسط مترقهوش كتير ليطلع ناشف مقرقش
زي كده
نخبزه في الفرن او على حله كهربا خاصة للخبز
وصحه وعافية
برضو نسيت اصوره وهوا مستوي لاننا اكلنا بسرعه هههههههههههههههه
بيتاكل مع بيض مسلوق او جبنة
او حاف او زي ما تحبوا
وصحة وعافية
يارب يعجبكم
والله لذيذ