ازيكم ياقمرات
خاصة بعد تردد اسئلة كتير من العضوات عنهم
وهى
لون البشرة
رسمة العين
جفن العين
رسمة الخدود
حجم الشفايف؟
دلوقتى البشرة البيضاء
ياريت اللى بشرتهم حلوة كده ونقية متقولش اعمل برونز او تان حرام عليكى تضيعوا اللون ده لان غالبيتنا ودى حقيقة ميعرفش يعمل تان سواء فالشمس او تعملى لوك بالميك اب يعنى لو بيضة اوى حيبان شكلك فى حاجة غلط لو مظبطيش البرونز(ده راى خاص)
الوان كريمات الاساس المناسبة وغالبا بيبقى اسمها بورسلين مش عارفة ليه ههههههه
طب البشرة الخمرية
وهى قمحى فاتح لونها فاتح فالشتا بس بتسمر بسرعة زى حالاتى
بيناسبها درجات متعددة من الوان الميك اب الوان الفاونديشن اللى بتليق عليها غالبا اسمها ايفورى
البشرة القمحاوية
وهى السمرا الفاتح مشكلتها ان لو جابت درجة افتح عنها حتبقى مش حلوة معاها خالص ومش حتناسبها عشان كده لازم نعمل تست الاول واحنا بنشترى عشان مش نندم ودى من الدرجات اللى تليق
البشرة السمراء
عشان تقدرى تحصلى على اطلالة مشرقة بالرغم من انك سمرا لازم بشرتك تعرفى تختارى الاساس تبعها كويس جدا مش تقولى انا سمرا اجيب حاجة غامقة فتغمقك اكتر لا هاتى حاجة تفتحك وفى نفس الوقت مش تغمقك
العيون الواسعة
لو حابة تدارى بروز العين الحل انك تحطى الوان بدون جليتر والافضل تكون غامقة لكن لو حابة تحطى الوان فاتحة بلاش تكون فاتحة اوى خليكى فلون وسط مش فاتح اوى عشان ميزودش البروز ولا غامق عشان انتى مش عايزاه وكحل عنيك كمان كويس زى كده
العيون الضيقة
العين الضيقة لازم تحط كحل ابيض جوة العين لانه حيوسع العين ممكن متحطيش كحل من تحته او تحطى زى ماتحبى وطبعا تحطى الوان فاتحة على الجفن ملناش دعوة بالصورة اللى فوق هنا لان ده ميك اب سهرة لكن عامة حطى اى شادو فاتح
الجفن العريض والواسع
ميزته انك تقدرى تلعبى فى الالوان براحتك لان المساحة من الرموش للحاجب كبيرة وطبعا المناسب انك تحطى لون فاتح وتدى لمسة بسيطة بلون اغمق زى الصورة وممكن كمان تحطى من الطرف كده لون غامق والعبى بقى بالالوان براحتك مع رسم الكحل من فوق والماسكارا مهمة جدا ودى كمان فكرة
الجفن الوسط( ولا عريض ولا صغير)
ده نفس جفنى الافضل تحطى لون واحد على الجفن سواء غامق او فاتح وتحددى العين بالكحل والماسكرا طبعا ممكن تعملى دمج الوان بس مش حيكون باين بطريقة حلوة اوى زى الجفن العريض
الجفن الضيق
يعنى مفيش مسافة كبيرة بين الرموش والحاجب وغالبا بتبقى العيون معاه ضيقة لازم تحطى الوان شادو فاتحة وبلاش كحل من فوق خالص الا لو حتتحكى انك ترسمى خط رفيع اوى على منابت الرموش واهتمى بالماسكارا اكتر وممكن تحطى جوة العين كحل الوان
البلاشر
دلوقتى فى طريقيتين من اشهر طرق وضع البلاشر وابسطها
الطريقة الاولى للوش الدائرى او الوجنتين البارزة
انك تضحكى وتحطى على الجزء البارز من خدودك
والطريقة التانية هى للوجة المربع او المثلق او الطويل واللى مفيهوش خدود
بنسحب الوش كده ونرسم من جوة لبره بطريقة مايلة
والاهم تخليكى رقيقة فالبلاشر حاجة رقيقة وبسيطة
الشفايف
اولا الشفايف المتوسطة الحجم
دى تحط زى ماهى عايزة اللون حسب المناسبة وبروج او ليب جلوس زى ماتحب مفيش عوائق
ثانيا الشفايف الرفيعة
بلاش تحطى روج غامق الا فالمناسبات لانه الغامق بيبن حجم الشفاه الحقيقة لكن الفاتح مش حيبين الحجم وكمان لازم يتحط ملمع شفاه عشان يدى مظهر منتفخ
ثالثا الشفاه الممتلئة
حاولى تبعدى عن الالوان الغامقة عشان زى ماقلنا حتبين حجم الشفايف خليكى فى الوان فاتحة او لون هادى كمان استعملى الليب ستيك بلاش الجلوس او الملمع لانه حيكبرها اكتر
رابعا الشفاء العريضةورفيعة من فوق ومتوسطة من تحت
يناسبها الالوان الهادية والغامقة اكتر وكمان ممكن وضع ملمع جلوس بنفس لون الروج عليه حيدى مظهر رائع
الاهم بقى تعرفى ايه المناسب ليكى حسب المناسبة ولون بشرتك وحجم شفايفك
انا كده خلصت
اتمنى يكون الموضوع عجبكم
للامانة منقول
