انقذونى من ابنى الصغير عمر 2024

ازيكم يا امهات عدلات انا عندى مشكله كده حابه اخد رأيكم فيها مشكلتى ان اولادى الاثنين الفرق بينهم صغير بالضبط سنتين وشهرين ام عن الصغير عمر فهو دلوقتى عمره سنه واربع شهور بس غيور جدا جدا جدا من اى طفل انا الاعبه او احمله وحتى اخوه الكبير بيصرخ باعلى صوت لو شافنى الاعب اى ولد غيره وحتى بيحاول يضرب الطفل ده والمشكله الاكبر فى صريخه الغير طبيعى لو انشغلت عنه او رحت المطبخ او وقفت اطبخ مثلا حتى لو قفلت باب المطبخ وطلعته بره يفضل يصرخ لحد لما افتحله ده غير العند الشديد جدا اللى بيوصله انه ممكن يأذى نفسه بضرب رأسه فى الارض للاسف انا اصبحت عصبيه جدا بسبب عياطه المستمر بسبب ومن غير سبب لانى عارفه انه الحمد لله معندوش اى سبب عضوى لا قدر الله افيدونى بالله عليكم اتصرف معاه ازاى واسفه طولت عليكم

انا قلت اشوف في الاول الستات يللي هنا كاتبين ايه لكن ما وجدت حاجة على كل حال انا حعطيكي نصايح جارتنا اللي عندها نفس مشكلتك بالضبط وعالجتها بانها ما تهتمش لا بعياط ابنها ولا بصريخو اذا كان مبيشتكيش من سبب عضوي او جسدي لان عدم الرد حيغيظو ولما يعرف انو محدش سائل فيه حيسكت اضيفي بالمقابل انو تقولي انت لما تطلب طلبك بهدؤ حلبيهولك وبالصراخ مش حتحصل اي حاجة وبعدين انتي مش لازم تظهري محبتك للغير قدامو لان الغيرة دي موجودة عند كل الاطفال يللي بسن ابنك ربنا يخليهولك ويحميه ويا ريت انا متجوزة ويجيني ولد ويصرخ حكون سعيدة لان الولد بيذكرني اني انا ام ومالكة الدنيا كلها لاني بربي اجيال ربما يكون لها قيمة في المجتمع سلامي لكي ويللا باي

[ حبيبتى كارول شكرا كتير ليكى على ردك المفيد عليا بس صدقينى انا مش بشتكى لاسمح الله او انا كارهه ابنى بالعكس انا بس كل الحكايه انى خايفه عليه من صراخه المستمر دون انقطاع ولانى عندى طفل قبله والبيت مليان اطفال فهو بجد مختلف كتير عنهم فى طباعه ياريت كل اللى تقرا الموضوع تدعيلى ربنا يهديهولى لانهم بجد نور حياتى اللى مقدرش اعيش من غيره

ياحبيبتى ربنا يخليهولك ويباركلك فيه يااارب أنا من رأى أنك تحتضنيه وتحسسيه بحبك ليه وكل لما يبكى تقربيه ليكى انا ضد فكرة أن الطفل أسيبه يبكى لحد لما يسكت وتعرفيه أد إيه إنتى بتحبيه والغيرة شىء طبيعى جداا وحاولى تكونى هادية ولا تغضبى ربنا يفرحك بيهم يااارب ويكونوا قرة عين لكى

بصى خلى دايما فى بيتك وفى شنطتك بونبون ولبان الحاجات اللى هى التسالى دى تمام
اذا جالكم ضيف ومعاه عيل صغير وانتى شلتية او كدة وحد من اولادك عيط تروحى انتى متصرفة بذكاء كدة وتجيبى من المسليات دى وتديلة وتقوليلوا شوف البيبى دة وهو جاى جابلك معاه حاجة حلوة بس مش تخلى حد من عيالك يشوف التسالى فى البيت علشان مش يعرفوا انك انتى اللى جيباها واذا بردوا روحتى عند حد تعملى نفس الحكاية
عياطة بقى وعنادة دة هقولك تعمل أية
لقتية بيعيط مش تتعصبى علية خااااااااالص فى ايديكى شغلانة تروحى طلعة وتكلمية اية ياحبيبى عايز أية بتعيط لية هو هيقولك هو عايز أية تقوليلوا طيب هخلص اللى بعملة علشان لما بابا يجى يفرح ويجيب لينا معاه حاجات حلوة وخلينا نخرج وكل مدة تجيبى ليهم لعبتين جداد يلعبوا بيهم هاتلهم مكعبات وخليهم يقعدوا يرتبوها كدة هاتلهم العاب تشغلهم عنك وتاخد تفكيرهم وتركيزهم
ويارب اكون افادتك
ولو كلامى عجبك بقى ادعيلى ان ربنا يرجعلى جوزى بالسلامة ويهب لنا الذرية الصالحة

انا ابنى كان كده وفعلا العياط والصريخ المستمر بيتعب الاعصاب بس حاولى تتجاهليه لانه حيتعب وحيفهم ان الصريخ مش بياثر فيكى ومع الوقت حتقل العصبيه دى ابشرك ابنى دلوقتى 4 سنين ومتفاهمين مع بعض جدا

ربنا يهديهولك ومتقلقيش بس حاولى تمسكى اعصابك