وزى ماوعدتكم انى حاعمل ووصفات للبيتزا بأشكال جميلة
امبارح عملت البيتزا بعجينة غير اللي عملتها بأول وصفة للبيتزا
في بيتزا دوار الشمس
وده رابطها للي تحب تشوفها
بيتزا دوار الشمس 2024,تطبيقي للشيف غادة التلى,طريقة تحضير بيتزا دوار الشمس
نشوف صورة تعذيبية
مش عايزة أقولكم طعمها كااااااان تحفة البيتزا دى بيج سايز يعنى يوم الخميس وصابح عندك اجازة من هم المدارس وحتسهروا مع بعض اعمليها وولادك حينبسطوا تمااااااااااام حتقوليلي ريجيم ماعطلكيش وماتحاوليش تعمليها ولو انى أشك في ذلك
مقادير البيتزا
3 كوب دقيق
اصبع خميرة بيرة أحسن بصراحة من الفورية
ملعقة صغيرة بيكنج بودر
حوالى كوب ماء دافئ ماتنسيش انك حتحطى الخميرة في نصف كوب ماء دافئ ونص ملعقة ك سكر
رشة ملح
3 ملاعق كبيرة زيت
ربع ملعقة ص ثوم بودر
ربع ملعقة ص بصل بودر
الطريقة
تخلطى المكونات الجافة مع بعض وضعي الزيت وحطى الخميرة بعد تفاعلها وبعدين الماية واحدة واحدة لحد ماتلم العجينة وسيبيها في مكان دافئ بعد ماتدهنى وشها بزيت حتخمر بعد حوالى ساعة
جهزى مكونات حشوتك
والصلصة أنا عملتها سريعة برضه
2 ملعقة كاتشاب
2 ملعقة صلصة
1 م.ص سكر
نترة ملح
زعتر جاف
ثوم بودر
الحشوة واضحة من الصورة
افردى العجينة على قد مانتى عايزة أنا عملتها في صاج الفرن عشان عملتها كبيرة وحطى الصلصة وجبنة موزاريلا طبقة أولى
حتعملى أصابع فيها جبنة وأصابع فيها سوسيس وحطيهم بالتبادل بالشكل ده
كملى الخطوات زى الصور ماهى موضحة
وسيبيها تخمر وادهنيها بصفار بيض وعليه قليل من اللبن
وتكونى مجهزة فرنك علي درجة 200 وحطيها بالرف الأول لحد ماتاخد لون ذهبي من تحت وبعدين افتحى الشواية عليها يادوب تاخد لون بسيط
العجينة دي عملت بيتزا بيج سايز و4 ميني بيتزا
استنونى لسه ماخلصتش
شوفي منظر الأصابع المحشية بالسوسيس والجبنة الشيدر
صورة كمان
ودى بعد ماقطعتها وحطيتها بطبق التقديم
طعمها بجد كان جميل وهشة جدا وفضلت طرية للنهاردة واديت بنتي وبنات خالى معاها بالمدرسة واتجننوا عليها
تحياتى لكم حبيباتى
مبرووك التكريم
تم التقييم ويارب ينعم عليكي بالصحة والعافية يا اعز الناس