كان ياما كان ياساده ياكرام ومايحلي الكلام الا بذكر النبي عليه الصلاة والسلام
كان في محل لعب كبيييييييييير فيه لعب اشكال والوان
وهناك علي الرف البعيد كان في عرايس كتير جميله وكانت اجملهم عروسه اسمها نوسه
وف يوم من الايام دخلت المحل جني ومامتهاعاوزين يشتروا عروسه
هدية لجني بمناسبة نجاحها
وراحت جني بصت علي العرايس لقت العروسة نوسةاجمل عروسه
قالت جني لماما انا عاوزه العروسه الحلوه دي
ماما قالتها من عيوني ياجني وراحت جابت العروسه لجني وروحوا البيت وهما مبسوطين
والعروسة نوسه كمان كانت مبسوطه لان جني اشترتها واختارتها من العرايس التانية
وفضلت جني طول اليوم مبسوطه وبتلعب بالعروسه وهي فرحانه
وتاني يوم برضه قعدت تلعب بيهالحد ماجاتلها واحده صاحبتها ومعاها عروسه تانيه عشان يلعبوا سوا
راحت راميه العروسه نوسه ف الارض وجريت تلعب مع صاحبتها بعروستها
وفضلت العروسه نوسه مرميه ف الارض وزعلانه اوي
وبقت جني ترميها في اي مكان وبهدلتها خالص وفستانها اتبهدل وايدها اتكسرت
ماما بصت كده لقت العروسه مرميه ف الارض وشكلها بقي وحش خالص
خدتها وصلحتها وجابتلها فستان جديد والعروسه نوسه كانت فرحانه اوي بالفستان الجديد
وقامت ماما حطت العروسه في اوضتها
جت جني تدخل الاوضه عند ماما لقت العروسه نوسه
قالتلها ايه ده ياماما انتي جبتيلي عروسه جديده قالتلها لا دي العروسه نوسه بس خلاص
طالما انتي مش عاوزاها انا هاخدها ليا
قالتلها الله ياماما دي شكلها بقي حلو اوي
قالتلها بس خلاص مش هتاخديها عشان انتي اللي بوظتيها ف الاول الا لو سمعتي الكلام وحافظتى عليها والا مش هجيب لك اي لعب تاني ابدا
جني قالتلها اوعدك ياماما هحافظ علي لعبي وحاجتي ومش هبهدلها تاني مره ابدا
راحت ماما مدياها العروسة نوسه وخدتها جني وبقت بتحافظ عليها ولما بتخلص لعب بيها بتحطها
في العلبه بتاعتها
والعروسه نوسه كانت مبسوطه ان جني بقت تحبها
وتوته توته خلصت الحدوته
