المقادير:
1كيلو كوسة
بصلة مقطعة صغير
1/2 لحمة مفرومة
زيت او سمنة
ملح وفلفل
7معالق دقيق
2بيضة
1/2كيلو لبن
وديه المقادير
طبعا كالعادة نسيت اصور البيض معلش استحملونى
الطريقة:
هنضف الكوسة ونقطعها بالشكل ده
وبعدين نجيب صينية ونحط فيها الزيت ونحط الكوسة تتشوح ونضيف الملح والفلفل بالشكل ده
وده شكلها بعد ماتشوحت
وبعدين نقطع البصل ونحطه فى طاسة ونسيبه يصفر شوية
وبعدين نضيف اللحمة المفرومة على البصل ونزودها ماية لغاية ماتستوى وبعدين الملح والفلفل
وده شكلها بعد السوى
طريقة الباشميل:
اولا نجيب حلة ونحط فيها الزيت او السمنة ثم نضيف الدقيق ونقلب لغاية لما يحمر
وبعدين نضيف اللبن وهو سخن حبة حبة عشان ميكلكعش منك لغاية مايتقل شوية حسب رغبتك يعنى لو عايزاه تقيل ماتزوديش لبن كتير عايزاه خفيف زودى لبن انا بعمله وسط
ملحوظة :البيضة تتحط عليه بعد مايبرد وبعدين فى الاخر الملح والفلفل
وده شكله بعد ماتعمل
نبتدى بقى نطبق الصينية هنجيب صينية الفرن وندهنها زيت
ونحط نص كمية الكوسة
وبعدين نحط اللحمة المفرومة
وبعدين نحط بقية الكوسة
وبعدين نحط الباشميل
ونجيب البيضة التانية ونضربها بالشوكة مع الملح والفلفل ونحطها
على وش الصينية
وتوضع فى فرن متوسط الحرارة لمدة 30 دقيقة او حسب فرنك
وده شكلها النهائى وبالهنا
