كل سنة وانتم بخير يااخواتي
كل واحدة فينا اوقات بيبقي عندها بتي فور او بسكويت او كيك وبتستحرم انها ترميه ونرميه ليه مادام لسة صالح تعالوا
نعمل كدة مع البواقي وشوفوا حيطلع شكله ايه وكمان الطعم والريحة تحفة يللا بينا علي المطبخ
بسم الله الرحمن الرحيم
شوفوا الاول شكله يشجع وللا لا
حنجيب بواقي الكيك او البتي فور ونكسرها خشن يعني مش بودرة ونحطها في بولة كبيرة
وبعدين نسيح شيكولاتة خام ونحطها عليه بكمية معقولة مش كتير ده علي حسب الكيك اللي عندك ونقشر تفاحة او 2
ونبشرها في المبشرة من الناحية الخشنة ونضيفها ومش مهم التفاح الاول او الشيكولاتة وممكن نضيف شوية مكسرات مطحونة
نعجنهم مع بعض ونشكل كور باحجام متساوية ونحطها في صينية ونسيبها تستريح وماتقلقيش حتكور كور منكوشة
وبتلزق في الايد لكن بعد لما تهدا نكور من جديد وبطريقة متساوية
نجيب طبق فيه فسدق مطحون وطبق فيه فارماسيه وندحرج الكور واسيبكم مع الصور
وده الشكل النهائي مافيش اسهل من كده ولااطعم وكل اللي جربوه شكروني عليه جربوا واتكلوا علي الله ومش حتندموا وعلي فكرة محلات الحلويات بتعملها ببواقي الحلويات
وانا عزماكم بعد الفطار على جاتوه وشاى
هااا مين هتقبل عزومتى
