الشبت الأخضر هيدّي طعم جديد للفراخالنهادره هنعرف مع بعض إزاي ممكن نضيف نكهة جديدة للفراخ البانيه، يلّا بينا على المطبخ نشوف إزاي؟!
فراخ بانيه بالشبت الأخضر
المقادير:
كيلو صدور فراخ
¼ كوب دقيق
بيضة كبيرة مخفوقة
ملعقة كبيرة زيت زيتون
2 كوب بقسماط مطحون
¼ كوب شبت طازج مفروم
بصلة كبيرة مقطعة قطع صغيرة
ملح وفلفل أسود
الطريقة:
1- تبّلي صدور الفراخ في البصل والملح والفلفل وزيت الزيتون لمدة ساعتين.
2- هاتي طبق كبير واخلطي فيه البقسماط مع الشبت، وتبّليه بشوية ملح وفلفل.
3- شيلي الصدور من البصل وحطّيها في الدقيق ثم البيض ثم البقسماط مع الشبت واضغطي عليها بإيدك كويس، ودخّليها الثلاجة لمدة ربع ساعة.
4- بعد كده حمّري الفراخ في زيت غزير لغاية ما لونها يبقى دهبي.
5- رصّي صدور الفراخ في أطباق التقديم، وممكن تقدّمي معاها بطاطس محمّرة وسلطة زبادي بالخيار.. وبألف هنا وشفا.
شكرا يا قمر
نورتى حبيبتى
تسلم الايادي
تسلم ايديكى يا ام نيره