بسم الله الرحمن الرحيم
والصلاه والسلام على اشرف المرسلين سيدنا محمد عليه افضل الصلاه واتم التسليم
بإختصار انا فشلت بكل الطرق ان بنتى تداوم على الصلاه مهما صلت بتقطع ومهما حفزتها وشجعتها برده حماسها بيقل
الى ان هدانى الله الى
.
.
.
.
.
الى
.
.
.
.
شجره التفاح
هى دى
ببساطه هى شجره من الورق الكانسون وفروعها من الزرع الصناعى وتفاحها من الفلين
بس تأثيرها له العجب
الفكره هى ان الشجره دى لها 7 فروع بعدد ايام الاسبوع وكل فرع 5 اوراق بعدد صلوات اليوم الواحد
وبعد كل صلاه بتصليها بنتى بتاخد تفاحه وتعلقها فى مكانها فى شجره التفاح
وعشان احمسها عملت حاجتين اولاً عملناها مع بعض انا وهى فى 3 ايام متواصله فا هى حاسه جدا بأهميتها لانها تعبت فيها وكانت فرحانه قوى بيها
تانى حاجه عملت لاختها الصغيره شجره كمان عشان يكون فى تنافس بينهم وما شاء الله لا قوه الا بالله بيتسابقو على الوضوء والصلاه ( سبحان مغير الاحوال ) وكمان التفوتها صلاه بتعيط عشان نقصت تفاحه ( مع انى انا الكنت بعيت الاول من عدم انتظام بنتى على الصلاه لا بالمحايله ولا بالخناق ])
والمكافأه كاااااااااااااانت كاالتالى :-
اليكون عدد التفاح عنده اكتر اخر الاسبوع يكون الفايز واجيب له هديه
**** وده عمل سوء سلوك عندهم للاسف بقت التصلى تتسحب عشان اختها متصليش وتاخد تفاحه عشان هى التفوز واختها لا
فتم التعديل السريع
·لو الشجرتين كاملين بكل الصلوات اجيب ليهم كل واحده هديتين بدل هديه واحده وهما اليختاروها بنفسهم ( وربنا يقوينى على المصاريف )
·لو واحده بس الشجرتها كامله لها هديه واحده فقط هى التخترها بنفسها
**( فا طبعا بقت كل واحده فيهم قبل ما تصلى لازم تفكر اختها بالصلاه ومتسبهاش الى لما تتأكد انها صلت عشان هديتين احسن طبعا من هديه واحده )
** وكمان زياده فى الاحتياط الاخت الكبيره بقت تاخد اختها فى ايدها وتصلى بيها جماعه عشان تتاكد انها صلت وملعبتش احسن الهديه التانيه تطير
ثالثا :- لو الشجرتين مش كاملين انا هجيب هديه للى تفاحه اكتر بس انا الاخترها مش هما
والحمد لله الطريقه دى خلتنى اقول ………… يا بناااااااااااااااات الظهر اذن يا بنااااااااااااااااات العصر اذن
من غير تعب على الاطلاق
******************
نيجى بقى لطريقه شجره التفاح الحل السحرى …. هى بسيطه جدا ومفيهاش اى تعب
1- كرتونه كبيره
2- مسدس شمع
3- غراء ابيض
4- مقص
5- بوكيه ورد صناعى
6- قصافه
7- ورق كانسون ملون
اضغطي هنا لمشاهدة الصورة بحجمها الأصلي
* نضع الغراء الابيض على الكرتونه بالكامل ونضع عليها فرخ كانسون اى لون نحبه
** نجهز بوكيه الورد ونقص التفاح منه ونقص خمس فروع منه للاسبوع
*** هتقص من باقى الفروع اجزاء منها عشان تكون زى المسامير نلصقها فى ورق الشجر لتثبيت التفاح عليها
ودى اشكال تانيه عملتها بالفوم وهعملها بالغراء الابيض والجليتر لتزين الشجره
