ازيكم ياقمرات انهاردة جايبلكم طريقة جديدة
للمسقعة هى مش جديدة اوى بس عشان
بالسجق ومش كل الناس بتاكل مع المسقعة
سجق المهم عشان مطولش عليكم ندخل فى
المقادير والطريقة
المقادير:
1كيلو باذنجان
1/2 كيلو سجق
بصلة متوسطة
1/2 ك طماطم
4 فصوص ثوم
زبدة – وزيت للتحمير – ملح وفلفل
ممكن فلفل اخضر لو حبيته
للباشميل:
8معالق دقيق ابيض
1ك لبن ولو احتجتى زيدة زودى حسب السمك
اللى انتى عايزاه
2بيضة – وملح وفلفل – زبدة او زيت انا بفضل الزبدة
الطريقة:
هنقطع الباذنجان ونحطه فى مصفى ونحط
عليه ملح ونسيبه شوية ونجيب طاسة ونحط
فيها الزيت لغاية مايسخن ونبدأ القلى
ثم نعصر الطماطم ونقشر الثوم ونصفره ونحط عليه الطماطم ونسيبها على النار لغاية ماتتسبك
طريقة عمل السجق
نقطع لبصل قطع رفيعة ونحطله زبدة ونحطه
على النار لغاية مايصفر وبعدين نحطله طماطم
معصورة او مقطعة زى ماتحبه ونزوده شوية
ماية ونسيبه لغاية مايستوى على نار هادية
طريقة الباشميل
نجيب حلة او صينية ونحطها على النار ونحط
فيها الزبدة ونسيبها لغاية ماتسيح وتسخن
لازم تسخن عشان الدقيق مايكلكعش منك
ثم نبدأ نحط الدقيق ونقلب بسرعة ثم نصب
اللبن واحدة واحدة ولازم اللبن يبقى سخن
افضل اصب لغاية ماوصل لللسمك اللى احبه
خفيف او تقيل او وسط انا بحبه وسط
وبعدين احط الملح والفلفل ولما يبرد خالص
هحطله بيضة من البيضتين
كده كل حاجة استوت عندى الباذنجان –
الباشميل – السجق
نيجى بقى للرص
الاول هحط طبقة باشميل ثم باذنجان
ثم الطماطم المتسبكة بالثوم
ثم طبقة سجق
ثم طبقة باشميل ثم باذنجان وبعدين طماطم
وبعدين اخر طبقة من الباشميل
ثم اضرب البيضة التانية واحطها على الوش
وده شكلها النهائى
مبرووك التكريم
شكلها بيشهى