كسكسي بالحوت
كسكسي بالحوت
نبدواااااااا بالمقاديييييييير
كيلو كسكسي يكفي لي 8 اشخاص
1 كيلو كسكسي طعام متع الحوش
أو الجاهز ما يفرقش
راس ثوم مقشر
سمك ياريت يكون الفروج احس حاجه لكسكسي الحوت
ليم قارص + فلفل أكحل + كمون حوت + ملح + طماطم حكه"معجون طماطم
جاهز+ بزار +زيت نباتي أو زيتون +ماء + بهارات قرنفل مطحون + فلفل أحمر
بطاطا وباذنجان وفلفل نقلوهم للزينه بعدين للكسكسي
طريقه التحضييير
نغسل الكسكسي لو كان متع الحوش ونصفيه كويس ونجففه بوضعه في صونيه "طبق" كبيره .
ناخد طنجره ونحط فيها الزيت ونحط فيها نص كمية الثوم المهروس ونحرك لحد ما تصفر الثومه
شويه وبعدها على طول نحط الطماطم ونشكشكه "نخليه يتسبك" بعد شويه نحط عليه الملح
والفلفل الأحمر والبزار ونص كمية" الفلفل الأكحل ، القرنفل ".. وبعد التحريك نصب الميه وخليها
على النار تغلي ناخد باقي كمية الثومه المهروسه ونحطها على الحوت مع الكمون وعصير ليمه
صغيره ونحركه ونخليه يتبل بعد ما تغلي الطبيخه كويس وتبدأ تتختر يعني مش هلبا نخفف عليها
النار ونلاحظ إنه الزيت بدي يطفح فوق نصفيه بملعقه كبيره ونحبب بيه الكسكسي اللي جف
وبعد ما نحبب الكسكسي نحطوه في الكسكاس متع نفس الطنجره ونرجعهم على النار لحد ما
يبوخ الكسكسي وما يحتاجش بعد ما يبدأ يطلع منه البخار لأكثر من ربع ساعه ويطيب
وبعد ما يبدا البخار يطلع من الكسكسي نقيم الكسكاس ونشوف المرقه نلقاها خاتره
"متسبكه" نحط فيها قطع الحوت ونرجع الكسكاس ونخليهم شويه لحد ما يطيب الحوت وما
ياخدش وقت دقايق بس ..
يعني تمر الربع ساعه ونطفي النار ونحط الكسكسي في صونيه واسعه شويه ونحط عليه شويه
كمون حوت وباقي القرنفل وشوييية ماء زهر و"هادي حسب الرغبه" ونصب عليه كميه من
المرقه وهو سخون ونحرك
نزيد عليه من المرقه ونحرك لكن مش هلبا لا بس ياخد نكهة الحوت
نحطه في صحن التقديم ونسقيه بالمرقه ونزينه بقطع الحوت والخضرة الي قلينها
ويكون بي هذا الشكل ان شاء الله يعجبكم
شكله تحفه
يجنن