أمهات كتير بتقول "انا عصبية … باتعصب على اولادي وبعدين بيصعبوا علي. أعمل إيه؟".الإجابة واحدة وما فيش غيرها "لازم تبطلي عصبية". بيجي الرد "أيوة…أبطل ازاي؟".. وطبعا باقول "هو قرار.لازم تاخديه".يرجع الرد "آخده ازاي والأولاد بيستفزوني؟ هم اللي بيصروا يعملوا حاجات غلط وخطر"
.وانا باسأل "طيب العصبية والزعيق والضرب جابوا نتيجة؟"..ودايما بيكون نفس الرد "لأ" 
أو "ساعات في لحظتها بس لكن بيرجعوا يعملوا نفس الغلطة تاني".باسأل سؤال تاني "طيب بتندمي ليه؟"..عادة بتقول لي "عشان باحس اني كان ممكن احل المشكلة بطريقة تانية" أو "عشان بيعيطوا" او "عشان باحس انهم خايفين مني" أو "باخاف علاقتنا تتأثر". يعني الأمهات العصبية بتنفعل وتغلط ..وبعديييييين بتفكر. الأمهات العصبية كل مرة، كل مرة بتندم. وكل مرة بتبقى عارفة انها بتعمل حاجة غلط. ليه بقى بيستغربوا ان اولادهم بيعملوا كده بالضبط؟ بيتصرفوا من غير ما يفكروا، ويندموا كل مرة، وبعدين يكرروا نفس الغلطة. وإذا كانت الأم نفسها مش قادرة تتحكم في نفسها، وتوجه تفكيرها في الاتجاه الصح؛ مين في الدنيا ممكن يخليها تعمل كده. كل اللي محتاجاه الأم العصبية؛ هو إنها تمارس سلطاتها على نفسها بدل ما تمارسها على اولادها. هي دي السيطرة .
بارك الله فيك