.مجرد تغيرات بسيطة في سلوكياتك واكلك ورياضة مش اكتر ….معلومات اخدتها من النت عموما وجربتها ومعلومات من صديقتي وكلها مجربة ان شاء الله وان شاء الله تفيدكم
اولا مش هنحرم نفسنا الا من الشيبسي و الكانزات "المشروبات الغازية " والاكل الجاهز والمقليات بس كده
1- اول حاجة لازم تفطري ..انا من لناس اللي مكنش ليا تقل ع الفطار ابدا لغايه ما اتعودت …حاولي افطري حاجات مفيده زي العيش الاسمر في حدود نصف رغيف مع جبنة قريش وطماطم او خضار ….او بيض ولبن وزبادي مع ربع او نصف رغيف اسمر
2- استبدلي العيش الابيض بالاسمر لانه العيش الاسمر سعراته الحرارية اقل وكمان بشبع اكتر
3- اشربي ماية كتير ويستحسن تكون باردة باعتدال في حدود 6 الي 8 اكواب في اليوم
4-خلي نصيبك في الحلويات قطعه واحدة فقط في الاسبوع ..ولو تقللي يبقي افضل
5-لما تجوعي كلي خضار او فاكهة او اي اكل مشوي وصحي ومتحرميش نفسك لان التجويع مش صحي ابدا وقد يجيب نتائج عكسية
6- قللي الزيوت بالاكل لاقصي درجة لو ينفع ملعقة واحدة كبيرة يبقي تمام 
)
7- اهتمي بطبق السلطة جدا ع سفرتك ..ودايما ابدأي بطبق الشوربة وبعدين السلطة وبعدين الارز بالخضار
8- طبعا سمي الله قبل الاكل وحاولي امضغي الاكل كويس جدا هتلاقي نفسك شبعتي قبل ما طبقك يخلص
9- ومع ده كله كلي محاشي وكل حاجة عادية بس هتقللي الدسم " الزيوت " وكمان الكمية والحلويات لقطعه بالاسبوع ..وحاولي خلي الاكل كل صحي يا مسلوق او مشوي وابعدي تماما عن المقليات زي البطاطس المحمرة
10 – اهتمي بالتوابل جدا ف اكلك لان التوابل ليها تاثير فعال في انقاص الوزن
11-ملعقة صغيرة من لقرفة بتساهم في تنشيط عملية الايض اللازمة لحرق الدهون ..انا بشرب نصف م ص قرفة وكذلك زنجبيل مع نصف ليمونة والسكر قليل واصب عليهم ماية سخنة واغطيها شوية وبعدين اشربها
12 -حاولي اشربي شاي بنعناع او شاي اخضر لانه بيساهم في تقليل الوزن
13 -قللي السكر عموما في مشروباتك
14- يستحسن اكل الفواكه من شربها ك عصير …لكن لو اخدتيها عصير يبقي بسكر قليل
15-البروتين مفيد جدا وكمان بستهلك حرق سعررات حرارية لهضمه
16-وطبعا لازم تصبري بجد متقعديش تحسبي من اول يوم ))) التزمي بالنظام اسبوع او تنين وبعدين شوفي وزنك بقي كام
17 -حاولي تمارسي الرياضة وخصوصا المشي ع قدر وقتك وظروفك
18-واخيرا متتبعيش نظام ريجيم قاسي لان الي عرفته مش بيخلصك من الدهون لكن بيخلصك من ماية الجسم عشان كده الوزن بينزل بسرعه وبيرجع تاني لكن اتبعي نظام غذائي سليم وبالتدرج هتبقي احسن واسعد ان شاء الله
19 – ابتعدي جدا عن المعجنات والفول السوداني "ملك السعرات الحرارية" والمقليات
20 – طبعا لااازم هتقللي كمية الاكل بالتدريج لحد ما توصلي لمغرفة ارز وخضار مسلوق او بزيت قليل او سمك مشوي وطبق السلطة ومتنسيش مهم جدا مضغ الاكل كويس جدا
واخيرااااااااا …واتمني الكلام يفيدكم وتعملوا بيه ان شاء الله ♥ ♥