برام الأرز باللحمة العجالى 2024,مطبخ مايا علي
النهاردة بقدم ليكم أكلة من اكلاتى اللي يارب تكون بتعجبكم
أكلتى هي برام الأرز باللحمة العجالى
نشوف مع بعض المقادير
3/4 لحمة عجالى
4 كوب أرز قسمته على برامين
ملح / فلفل أسود
كل برام حتحطي عليه 2 كوب ونصف لبن
يعنى انتى محتاجة تحطى 5 كوب لبن
ودلوقتى نتابع الطريقة
نحضر البرامين وندهنهم سمن
وده الأرز بتاعنا ومغسول
ودى اللحمة منقوعة من بالليل في ملح وفلفل أسود
وجهزت اللبن وفيه الملح والفلفل طبعا بيبقي حسب ماكل واحدة بتحب في بيتها
أنا بحط على 2 كوب الأرز 1/4 ملعقة كبيرة ملح تمام كده ياعدولات
هنا حطيت طبقة بسيطة من الأرز يادوب تغطى قاع البرام
قسمى اللحمة على البرامين أنا كان ممكن أعمل في برام كبير على فكرة بس بحب كل حاجة تاخد راحتها وماتبقاش مزنوقة في مكان واحد
حطى باقي الأرز
حطيت باقي اللبن بالراحة عشان ماتطفوش اللحمة على الوش وتتحرق منى لما تتحط في الفرن
طبعا كنت مسخنة الفرن قبلها بربع ساعة وحطيت البرام في الفرن ولما يتشرب البرام اللبن طلعيه وضعى ملعقة سمن على الجوانب والوجه ودخليه خمس دقائق وطلعيه من الفرن استعدادا لوضع الأرز في طبق التقديم
هنا غطيته بالفويل شوية علبال ماجهز سلطتى بالبقدونس
ده شكل البرام قبل ماحطه بطبق التقديم
وده شكل طبقنا النهائي يارب يعجبك
قدميه بالشكل ده
يارب تكون أكلتى عجبتكم
مع تحياتى
يسلموو ع الطريقه لازم اجربها
تسلم ايديك يا شيف
تم التكريم
يسلمووووو يانودى عالتكريم
تسلم ايديكِ يا اجمــل شيف ♥♥