أتمنى تكونوا بصحة وبخير يا عدولات المدونة!
حبيت أبلغكم عن مفاجأة بخصوص مدينة كيدزانيا القاهرة.
كيدزانيا هتدخل موسوعة جينيس للأرقام القياسية يوم السبت القادم 25 أكتوبر من خلال التقاط أكبر صورة فى العالم واللى هتضم حوالى 20 ألف طفل وأسرهم! الحدث دة هيكون بمناسبة احتفالها بمرور سنة علي وجودها في مصر وعشان كدة يوم السبت 25 أكتوبر كيدزانيا هتعمل أحتفال كبير وهتصور أكبر صورة "عائلية" فى العالم بتكنولوجيا عالية جدا ودة لأن التصوير هيكون بأعلي تكنولوجيا تصوير وحجم الصورة هيكون "جيجا" كاملة يعنى كل اللي هيتصور فى الصورة هيقدر يكبر الصورة ويزووم ويشوف نفسه بوضوح.. يعنى حتى لو متصور أخر واحد فى الصورة برده هنعرف نشوف نفسنا والصورة هتبقى واضحة جدا ونقائها عالى. كمان كل واحد هيقدر يحدد نفسه فى الصورة "تاج" ويربطها بصفحته علي الفيس بوك.
المفاجأة كمان أن الصورة هتكون على شكل رقم "1" بمناسبة مرور سنة على افتتاح كيدزانيا فى مصر وكل اللى حابب يشارك يقدر يحضر هو وأسرته لأن الدعوة مجانية ومفتوحة. كل اللى عليك أنك تلبس أو تجيب تى شيرت أبيض معاك عشان الصورة.
أهم حاجة بقى أنه هيكون فى احتفالات كتييييييييرة من الساعة 11 الصبح لحد 7 بليل وهيكون فى فرق موسيقية ومفاجأت كتيرة للأطفال وألعاب وأنشطة. يعنى هيكون يوم حاااافل جدااا بالمرح واللعب لكل الأسرة!! وشخصيات مدينة كيدزانيا هتكون متواجدة وبتتصور مع الأطفال.
الفرصة جميلة جدا عشان كلنا ناخد أطفالنا ونروح نتصور مع بعض لأنها هتبقى ذكرى جميلة أوى لكل أسرة فينا وهتبقى موجودة معانا للأبد دة غير أننا هندخل بيها التاريخ ونحطم بيها الأرقام القياسية.
الحدث ان شاء الله هيكون يوم ٢٥ أكتوبر في كايرو فيستيفال سيتي الساعه 11 الصبح قدام المبنى.
ان شاء الله انا هروح من اطفالى وبتمنى انتوا كمان تحضروا وتستمتعوا!
|
خسارة 
معلش ولا يهمك
استمتعى بجو اسكندرية انتى واسرتك 