تخطى إلى المحتوى

مرتب الزوجة من حق الزوج ؟ 2024

السلام عليكم ورحمة الله وبركاته انا محتاجة رأيكم ضرورى الله يكرمكم انا هدخل فى الموضوع علطول انا متجوزة من سنة وحامل والحمدلله وانا فى غربة مع جوزى عشان شغله بس انا مش بشتغل دلوقتى انا كنت فى مصر بشتغل مدرسة واخدت اجازة عشان اسافر له المهم ان جوزى بيدور لى على شغل من ساعة ما جيت بس مش لاقى المشكلة هنا ان جوزى عاوزنى لما اشتغل ادى له المرتب كله وهو اللى يصرف ويدينى لما اطلب وانا مش عاجبنى الحكاية دى خصوصا انه دلوقتى لما بطلب فلوس عشان اشترى حاجة لنفسى (مكياج كريمات )حاجات من دى يعنى بيعتبر ان دى حاجات مش مهمة وملهاش لازمة وبيطنشنى واحيانا بيدينى بس عالقد اوى ومش مقتنع ان الست لها مصروفها الشخصى وانا مش واخدة على كده كنت فى مصر بدلع نفسى واجيب اللى انا عاوزاه واشترى لبس غالى(مع ان مرتبى كان صغير كنت بحوش واجيب اللى نفسى فيه ) وكنت بتشيك على الاخر وهو عارف كده وعارف انى بلبس كويس وهو عمره ما اشترى لى لبس بالتمن اللى انا كنت بجيب بيه لبسى قبل ما اتجوز المهم انى رفضت انى اعطى له مرتبى كله واتخانق معايا عشان كده وقالى اصل عمرك ما مسكتى فلوس كتير فى ايدك عشان كده بتعملى كده (هو يقصد انى هشتغل باضعاف مرتبى اللى فى مصر ) لانى كنت باخد فى مصر 400 جنية ومش بدى دروس ولا حاجة عشان مادتى مفهاش دروس ولا مجاميع انا زعلت من كلامه ده اوى وحسيت انه بيهينى وانه بيدى لنفسه الحق انه يسيطر على فلوسى عشان هو الراجل ولازم تكون الادارة فى ايده هو بيقول كده وانا رفضت لانى مش مطمنة وعشان هو مكنش بيعاملنى كويس اول ما اتجوزنا ومكنش بيحب يصرف غير فى الاكل والشرب حتى دول احيانا كان بيقصر فيهم انا خايفة فعلا منه حتى انه متعدلش شوية الا لما حملت (خصوصا انه عمره ما ادانى فلوس وقالى خلى دول معاكى فى شنطتك )مع انى كنت بطلب منه كده عشان لازم يكون معايا فلوس حتى لو مش هشترى حاجة وهو ولا هنا وكمان حصل موقف محرج اوى ليا كنت عند اخته ودى عايشة هنا فى نفس البلد وبنتها هتتجوز وجابو كوافيرة عشان لبناتها وليا واختها اللى جاية كارت زيارة والكوافيرة طلبت الفلوس والست اخته كانت بتفاصل معاها وقالت لها مش معايا غير دول وسألتنى انتى معاكى فلوس تكملى وانا اتحرجت جدا عشان هو مش معطينى حاجة وقلت لها مش معايا واخته اللى جاية زيارة جوزها عاطيها فلوس وطبعا كان شكلى وحش ولما حكيت له الحكاية لاقيته عادى جدا طالما دول اخواته يعنى مفيش حد غريب

انا اسفة انى طولت عليكم ولكنى مفروسة بصراحة منه اوى والموضوع ده هيعمل مشاكل لو لاقيت شغل وانا مش عارفة اعمل ايه وخايفة اعطيه الفلوس ومش مطمنة ابدا ومش معقول انى اقوله انى خايفة منه وانى خايفة يصرف فلوسى على ولاده (عنده عيال من زوجة سابقة وعايشين مع امهم وبيبعت لهم مصاريفهم وامهم لا تعمل )
يا ريت تشوروا عليا وياريت حد يدلنى هل من حقه ان يأخد مرتبى بصفته زوجى ؟
وازاى اخلص من الحكاية دى بالله عليكم وربنا يكرمكم ويجعله فى ميزان حسناتكم

[FONT=""][COLOR=""][SIZE=""]ياريت حد يكون صاحى يرد عليا[/SIZE][/COLOR][/FONT]

مش من حقه ابدا انك تتعبى وتشقى وفى الاخر هو ياخد عالجاهز
قوليله انك هتديله فى حاله واحده بس
لما تلاقى البيت محتاج وهو مش قادر يكفيه
غير كده شقاكى وتعبك ليكى انتى وهو يصرف عالبيت
لو مرضيش يبقى قوليله انك هتاخدى من مرتبك اللى يكفيكى وزياده واللى هيفضل هتديهوله
ونصيحه اخويه متعرفيهوش انتى بتاخدى كام
معلش سامحينى ده انانى اوى وعايزك دايما محتجاله وده مش عيب لو هو بيقدرك ويديكى اللى تحتاجيه
بس هو مطنشك وسايق فيها
وربنا يصلحلك الحال حبيبتى ويقومك بالسلامه يارب

بصراحه طلبه غريب يعنى تبقى تحت رحمته بفلوسك؟
لا طبعا انتى من حقك تعترضى دى زمتك الماليه وبعد كده لو مرتبك زاد حيستخسر فيكى لانه متعود ياخد كل تعبك ويحوش منصحكيش ابدا توافقى ع الموضوع ده بقى احنا مبنشتغلش عشان كده تحت رحمتهم يا يدونا يا ميدوناش انما انتى بتشتغلى ليه تفرطى فى تعبك وهو ربنا كارمه يعنى كمان تبقى تحت رحمته ليه زى الطفله الاصغيره الفلوس تبقى فى ايدك انتى اولى بتعبك طبعا
اما اخته دبستك بالزوق بس الحركة مش ظريفه وحتتكرر واضح انهم محللين تعبك لنفسهم

شرعا حبيبتي هو مالوش الحق في اي مليم بتقبضيه
سواء من شغلك او حتى من املاكك لو ليكي املاك
لان الاسلام فصل الذمة المالية للمرأة عن زوجها
والقرآن بيقول
الرجال قوامون على النساء بما انفقوا
يعني الراجل ملزم بالانفاق على مراته مش العكس
ده حتى الاسلام اعطى للمرأة حق التصدق على زوجها اذا كان فقيرا و محتاجا
ان كان هو يقبل على نفسه كدة هو حر لكن بما تحدديه انتي من العطية له
ابحثي على النت في الموضوع ده وانتي حتفهمي حقوقك وواجباتك اكتر

بصى حبيبتى انا حاسة بكلامك جدا جدا
الراجل ملوش حق بفلوس مراتة ابدا غير برضاكى انتى يا قمر
وكمان مش يطلب ويقولك هاتى
انتى اللى المفروض لو موافقة تصرفى بمزاجك
انا بشتغل وكنت بعمل كدة باول الجواز بس مرتحتش حسيت انى بشحت من مع ان دى فلوسى وطلبت منة نرجع زى الاول وهو وافق لانة مش من حقة يقبل او يرفض
دى فلوسك وتعبك حبيبتى واوعى توافقى على كدة
شكلة ملهوش امان خالص
بس انتى متححسهوش بكدة
اقولك على حاجة طالما هو بيدورلك على شغل وطلب انة ياخد فلوسك بلاش تشتغلى واقعدى باليبت طالما حياخد تعبك يبقى الشغل فايدتة اية
اقعدى بالبيت وهو مجبر يصرف عليكى لانة الراجل

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.