اوﻻ
ادعو الله ان يتم حملكن جميعا على خير
و يرزقكن الذرية الصالحة النافعة
و يقر اعينكن بأوﻻدكن
الموضوع ده أنا شفته وأنا بتصفح في أحد المنتديات وقلت أبعته لعل الحوامل تستفيد وبالمناسب دي بحب أشكر صاحبة الموضوع ده لانها نبهتني لشئ مهم وممكن كتير بيغلط وبيعمله
ثانيا
اسأل الله ان ينفع بكلامى هذا
عسى ان يكون سبب فى انقاذ جنين من الوﻻدة المبكرة
الموضوع يتحدث عن
مساج الثدى و الحلمات
كتير من الحوامل بتبقى عاملة حسابها ان شاء الله انها ترضع رضاعة طبيعية
و بتكون سمعت اكيد عن المشاكل اللى بتحصل للواحدة اللى بترضع طبيعى فى اﻻول
زى احتقان الثدى و التشققات و الألم و هكذا
ف بتعتقد انها لو بدأت بمساج الثدى و تمارين شد الحلمات من بدرى قبل الوﻻدة
ده يجنبها المشاكل دى
لدرجة انى لقيت ستات بتعمل كده قبل ميعاد الوﻻدة ب3 شهور !!
و ماكدبش عليكم
انا بردو كنت ناوية اعمل كده
بس لما قلت للدكتورة اللى بتابع معاها قالتلى غير كده خالص
و لما رجعت البيت دخلت على مواقع علمية و اتأكدت من الكلام ده بنفسى
.
.
.
.
فى الحقيقة الكلام ده غلط جدا
أى لعب او حركة فى الحلمات ده بيحفز الجسم انه يفرز هرمون اسمه " أوكسيتوسين "
ده مسؤول عن حاجتين :
1- افراز اللبن
2- انقباض الرحم اثناء الوﻻدة
و لذلك
بيحطوه فى المحلول اللى بتاخده الحامل عند الوﻻدة عشان يزود الطلق
ف لما تبدأى تحفزى افراز الهرمون ده فى الجسم من بدرى كده
هانلاقى ان الحلمات بدأت تفرز لبن او افرازات صفرا
و ممكن ﻻ قدر الله يعمل طلق مبكر قبل ميعاد الوﻻدة المتوقع بكتير
و طبعا احنا عارفين ان يوم واحد زيادة فى رحم اﻻم افضل بكتير من شهر فى الحضانة
ف ليه نتسبب فى كده لنفسنا ؟؟
هاتسألوا
طيب احنا بنحس ان الحلمات جافة و بتتفتت منها قطع صغيرة كده ف ﻻزم نرطبها
هاقولكم الحل
بلاش المرطبات الخفيفة اللى بتقعد يادوبك يوم و ترجع الحلمات تنشف تانى
ﻻن ده بيخليكى تفضلى تدهنى الحلمة و تحركيها كل يوم
افضل حاجة
زبدة الكاكاو البيضا
Cocoa butter
ماتستغربيش
هى دى آمن حاجة للحامل و بينصح بيها الدكاترة فى العالم مش ف مصر بس
و ده اللى قالتهولى الدكتورة و لقيته ع المواقع
و انا نفسى جربتها
مرة واحدة ادهنها بعد الشاور بتفضل الحلمات رطبة و ناعمة للشاور اللى بعده
و مش بتحتاج دهن و مساج وﻻ حاجة
هو يادوبك بتحركى الصباع براحة على الحلمات بتﻻقيها اترطبت خﻻص
هاتلاقى منها علب زى كده
او لو مالقيتهمش
هاتى صباع زبدة كاكاو لونا عادى من الصيدلية و ده اللى انا استخدمته
_____________________________
اما عن تمارين شد الحلمات
ف دى بتحتاجها الستات اللى الحلمات عندها مسطحة او غائرة للداخل
ف بتتعمل عشان تخرجها لبرة و تبقى ف وضعها الطبيعى ف البيبى يعرف يرضع منها
و دى بيبقى ليها طريقة معينة و ممكن اجهزة معينة كمان
و بتتعمل مش قبل الشهر التاسع من الحمل
لكن اللى حلماتهم عادية مش بيحتاجوا التمارين دى
ممكن يكتفوا فقط بالمساج فى نهاية الحمل و خلاص
و على كل حال
المشاكل اللى بتحصل فى بداية الرضاعة دى شائعة جدا
سواء عملتى مساج و تمارين او ﻻ
ﻻن ببساطة سببها ان الجسم لسة مش متكيف مع الوضع الجديد من تدفق اللبن و من طريقة مص البيبى
ف على حسب قدرة الجسم انه يتكيف معاه بسرعة او ﻻ بتطول او تقصر المشكلة و تختلف فى قوتها
و هاتلاقوا مواضيع كتير للتعامل مع المشاكل دى بسهولة و التغلب عليها
يارب اكون افدتكم