الغسولات اللي استخدمتها مع الكلاراسونيك هي نيتروجينا
الاول : بالقريب فروت هدأ من روع بشرتي بشكل جميل
الثاني : ديب كلين غسول للعناية
الاول حلو بس يجفف البشرة اذا استخدمته يوميا .. استخدمته في فترة لاسبوعين متواصلة جفف بشرتي
بس خفت الحبوب بنسبة 70 بالمية وكنت ارطب بشرتي بكريم سيتافيل نسيت اصوره ..
و بعدين اشتريت الديب كلين وبدأت استخدمه يوميا و القريب فروت استخدمة لما فجأة تنهبل بشرتي وتطلع حبوب
سعر الغسول بالقريب فروت 45 او اقل
والديب كلين بحدود 35
القريب فروت هادي 3 علبة و الديب كلين كمان 3 علبة و انصح فيها وبقوة للي بشرتهم دهنية
و بالنسبة لكريم الترطيب اليومي والخفيف كان كلينك من الثري ستيب واذا حسيت بشرتي مرا جافة استخدم سيتافيل .. و تحسنت بشرتي وبدت تخف الحبوب و ارتاحت بديت افكر اللحين بالتفتيح عشان اثار الحبوب و اتذكرت كريم اولاي اللي بالتوت البري استخدمته زمان وكان حلو ورحت السوبر ماركت ودورته ما حصلته فأخذت الكريم اللي يقولوا بديلة
فيه سبع فوائد منها محاربة التجاعيد وتفتيح البقع وفيه وقاية من الشمس 15 سعره اتوقع 60 و شفت قدامي سيروم من بوندس لتفتيح البقع وسعره ما بين 39 الى 60 ناسية كم بالزبط واخذتة
الكريم :
كان كويس وجميل وللحين استخدمه و ما عندي نية اغيره قريب الا اذا شفت شيء ابهرني يرطب بشرتي بطريقة حلوة
السيروم :
لاحظت اثرة على الحبوب اللي اثرها جديد لاني ركزت على وحدة دوبه جديد اثرها فتحها بنسبة 70 بالمية اما الحبوب اللي اثرها قديم بخدي ما شفت نتيجة واو و تقريبا ما شفت نتيجة مرا
و استمريت عليهم شهر وشوي و بدت المحاولات الخجولة للدخول بعالم التقشير الطبي لاني ابغى نتيجة اسرع و استشرت وحدة من صحباتي اسمها دانة و جلست اسالها مليون مرا عن الرتن A اللين طفشتها وكيف استخدمه واش بيسوي لي و كمان اريج طلعت عينها بالاسئلة لاني خايفة بجد منه لكن محتاجته
وسألت وقريت وتوكلت على الله وقلت استخدمه .. اشتريته و استخدمته وكنت احط على عود الاذاني واوزعه على الحبوب
وبعدها رحت لدكتورة جلدية عشان جلسة ليزر وما كان غرضي اني اسألها عن بشرتي و الاثار بس عشان كنت بسوي ليزر لوجهي فشلت كريماتي معي عشان استخدمها مع الليزر ولا لا وبس قلت لها يادكتورة انا استخدم كريمات عشان الحبوب واثارها
وقاطعتني وقالت لي اش هيا كريماتك ووريتها اولاي وسيروم بوندس قالت استخدمي اكراتين للاثار مع كريماتك عادي قلت لها مع الليزر !!
قالت انتي ما ينفع ليزر لوجهك الشعر مرا خفيف وما حسوي لك قلت يلا الحمدلله خيره قالت استخدمية على بشرة نظيفة قبل تنامي
واستخدمي واقي الشمس
كمان كنت استخدم الاكراتين على الاثار و بعود الاذاني واستمريت عليه فترة و نفس طريقة الرتن يوم وثلاثة لا وبعدين كل يومين وبعدين كل يوم على بشرة نظيفة قبل ما انام .
روتيني بالمختصر :
اغسل وجهي مرة وحدة بالليل بكلاراسونيك غالبا بالليل بس احيانا صباح اذا ما استخدمت شيء من المقشرات الطبية فالليل ( رتن a – اكراتين 25 )
والصباح قبل ما اطلع احط الواقي و كمان اولاي و سيروم بوندس خلص ف ماعاد استخدمة وما عندي نية اخذة من جديد
طبعا خففت من المكياج للدوام ما عاد احط لا بودرة ولا بي بي كريم اكتفي ببلشر بس
و أخيرا مو شرط اللي ناسبني يناسبك المقشرات الطبية استخدميها بوصفة طبية حرصا على سلامتك
و اتوقع انها ممنوعة على الحامل ..
التدوينة الجاية حتكون رأي بكريمين للهالات السوداء و دواء للرموش من مافالا ورأي فيهم , هو المفروض بنفس هالتدوينة
بس تعبت من الكتابة فبخليها للتدوينة الجاية ان شاء الله خليكم قريبين وبس لا تنسوا تصلوا على النبي عليه افضل الصلاة والسلام
والسلام عليكم ورحمة الله وبركاتة ..
روتين كويس شفتو وعجبني
