أحبائى أعزائى فلذات أكبداى لقد اجتمعت بكم اليوم فى هذا الموضوع
لأشرح لكم طريقتى فى عمل اللحمة الباردة او الروستو أطلقوا ما شئتوا عليه من أسماء ..
هى مالها قلبت نحوى كدا ليه 
ابطل رغى كالعادة ونحكى فى المفيد ..
احب اقولكم اهم نقطة فى اللحمة الباردة هى السوى كمان نقطة تانيه انتى اللى بتتحكمى فى طعم اللحمة بالبهارات بتاعتك والتتبيله ..
ممكن كمان تعملى اللحمة من غير تتبيله ولا يحزنون وتضيفى انتى الطعم
عن طريق الكاتشب والمايونيز والخضرة والطماطم والذى منه ..
نبدا على بركة الله
* بنضف العرق (( عرق فلتو عبارة عن فخذة الجاموسة ولا مؤاخذه يعنى )) من اى دهن فيها وتبقى معايا لحمة حمرا صافيه زى كدا
* بعد ما بنضفها جبت البهارات اللى عندى ملح وفلفل اسود وكمون وكسبرة ناشفه وليمونتين وخلطة لحمة من عند العطار (( ممكن تحطى بابريكا وريحة لحمة براحتك )) وبفرك بيهم اللحمة واعمل فيها فتحات صغيره واربطها بدوبارة فى ناس بتعملها من غير خيط الدوبارة دا لو مش متوفر
واحطها ف شوية مياه صغيرين طول الليل مع نفسها ..
* بعد كدا بغسلها تانى وابشر بصله وافرم فصين توم مع خضرة وافركيهم ع العرق وادهنه صلصه
* بجيب صنيه واحطها ع النار اسيح سمنه او زيت او عايزة تسيحى حته دهن براحتك .. واحط العرق اعمله صدمه سامعين صوت التشششششششش
* بحمره على جميع الجوانب على نار هاديه علشان ميتلسعش منك حوالى تلت ساعه
* بجيب ورق حرارى واعمل فيه فتحات بالسكينة والف بيها الصينيه بعد ما بحط شوية مياه دافيه عليهم قيمة ربع كوباية وادامك اختيارين تسويها فى الفرن او تسويها على البوتجاز براحتك بس اهم حاجه نار هاديه علشان متتلسعش منك ومتتستواش
* وادى شكلها لما طلعت م الفرن وطبعا تتابعيها من وقت للتانى تشوفيها استوت ولا لا واذا محتاجه مياه تزودى مياه دافيه ..
شلت الدوبارة اوعى تنسيها وتقطعيها 
شكلها لما قطعتها 
شكلها مغرى صح
ان شاء الله تجربوها وتعجبكوا وبكرر تانى اهم حاجه السوي
ولو واحده فيكم عملتها ومطلعتش مستوية
متدعيش عليا انا مليش دعوة ايوووووووووووووووووة وقد اعذر من انذر
..
هذا وقد انتهى الاجتماع ,,
متشنكرة لا داعى للتصفيق أحبائى
سلام ياقمرات
تسلم ايديك يا عسل
تم التكريم
جميله تسلم ايدك وبالف هنا على قلوبكم