الظاهر ياعدولات انى حبيت أعمل حلويات عشان كده دورت واتقسطت على حلويات بس بالكاكاو عشان خاطر عيون حبيبتي ام الاء وبيان
وكانت النتيجة تاتاتاتاااااااااا
دي بقي ياحبايبي كيكة بالشوكولا بجليز الشوكولاتة
بالنسبة لمقادير الكيكة
2 بيضة
2 كوب دقيق ولو احتاجت ودى حبة بسيطة يعني المفروض تكون كريمية
كوب لبن
1/2 كوب زيت
1 كوب مياه مغلية
3/4 كوب كاكاو نسكويك
1 كوب وربع سكر
ملعقة صغير كربوناتو
2 ملعقة صغيرة بيكنج بودر
ملعقة صغيرة فانيليا سائلة
نترة ملح
بالنسبة لمقادير الجليز
1/3 كوب لبن
3/4 كوب سكر
1/4 كوب زبدة
3 ملعقة كاكو نسكويك ممكن تستخدمى حاجة تانية بس أنا بحب النسكويك لان بيدى لون تمام وطعم وريحة وااااااااااااو
ملعقة فانيليا سايلة
الطريقة
انخلى الدقيق وحطى مكوناتك الجافة وبعدين حطي اللبن والبيض والزيت والفانيليا
واخفقي بالمضرب لمدة دقيقتين على فكرة أنا عملت بالمضرب اليدوي يعني بأبسط الطرق وبعدين ضيفي الماية المغلية واخفقي
ادهنى صينيتك ورشيها بالدقيق
حطى الخليط في الصينية وتكونى مسخنة الفرن قبلها على درجة حرارة 180
وحتاخد حوالى ساعة طبعا شوفيها قبلها لان دى بتختلف من فرن للتانى أنا بوتاجازى كريازى القديم وسيبتها 5 دقايق جوا الفرن
في آخر ربع ساعة من وقت الكيك جهى الجليز
حطي المكونات على بعضها وقلبي باستمرار علي نار متوسطة لحد مايغلي ارفعيه من على النار وبعدين اخفقي لحد مايغلظ قوام الجليز ويبقي كريمي
هنا طلعت الكيكة وشكلها جميييييييييييييل ويفتح النفس
حاجيب ملعقة خشب وبطرفها حاخرم الكيك عشان لما أحط الجليز علي فكرة لما عملت مقدار الجليز ده ماكانش كافى بس حاقولكم سديت الاخرام دي ازاى؟
فانتوا لما تعملوها ضاعفوا كمية الجليز عشان تغطي الكيك كويس
هنا حطيت الجليز
وسيبيها تهدا تماما عشان لما تزينيها ببشر الشوكولا ودى آخر حاجة
أنا بقي حبيت أحط عليها بشر الشوكولا ويسيح شوية
شايفة جمالها
هنا بقي بعد ماقطعتها
شايفة ياعدولة الجليز متغلغلها ازاى؟
نسيت أقولكم لما الجليز ماكفاش معايا لما كنت ببشر الشوكولاتة كان بيتفضل من قطع صغننة فغرستها جوا الكيك مش عايزة أقولكم أضافت طعم رااااااائع بزيادة
ودى بقي مني للي حتقيم
هاااااااااااااه مين حتقيم وتاخد الحتة دي بسرعة؟
يارب أكون اتشطرت في الحلويات شوية
وتكون كيكتى المتواضعة عجبتكم وتجربوها
وتورونى تطبيقاتكم عشان تفرحونى
روووووووووعة وتشهى انا عايزة بقى
حلوة اوى اوى تسلم ايديكِ يارب
وبألف هنا ليكوا
واحلى تقيييم وتكريم لعيونك
وقومتى نازله بيهم مره واحده مش بالراحه علينا شويه
احنا مش قد الجمال والحلاوه دى
تسلم ايدك يااحلى شيف
