[/IMG]
عملت من فترة العيش الشامى بس ماقولكوش كان جميل جدا جدا
وبصراحة دى كانت أول مرة أعمله بس حسيت بفرحة يمكن ماحسيتهاش من زمان قوى
شكل العيش وهو بيتعمل قدامك بيخليكي تمارسي التأمل النشط اللى هو بتركزى في حاجة قوى لدرجة انك بتنسي أى ضغط عصبي
المهم ندخل في التفاصيل وبلاش الرغي أحسن أنا بقيت رغاية مووووت
مقاديره سهلة جدا جدا
ورقة وقلم منك ليها ياعدولة واكتبي
4 كوب دقيقي منخول طبعا
1 ملعقة كبيرة لبن نيدو
2 ملعقة صغيرة سكر
رشة ملح
2 ملعقة كبيرة خميرة فورية
أنا بصراحة استخدمت الخميرة التانية كانت موجودة عندى فاستخدمتها
عموما موش فارقة يعني
رشة بيكنج بودر
ماء دافئ للعجن
نشوف الطريقة مع بعض
ركزى ياعدولة كويس
حنحط الخميرة في نص كوب ماية دافية وعليها ملعقة سكر وغطيها وسيبيها ربع ساعة علبال ماتجهزى باقي حاجتك
انخلى الدقيق وحطي مكوناتك الجافة وبعدين بصي عالخميرة شوفي شكلها بقي ازاى؟
طبعا أنا بورى أكتر للعدولات اللي لسه بيتعلموا يعني بوضح الكلام زيادة عشان ماحدش يمل يعني تمام كده
ده شكل الخميرة لما اتفاعلت
هنا حطيت المكونات الجافة
حطى الخليط في العجانة وضيفي الماية الدافية لحد العجينة ماتلم معاكى وماتلزقش في ايدك بالشكل ده
غطيها لحد ماتخمر تقريبا خدت ساعة وده شكلها بعد ماخمرت
قطعيه كور كبيرة أو صغيرة أنا عملته عيش كبير لانه وقتها كان للسحور في رمضان
افرديه وحطيه علي ورق مناديل عشان حتشيليه بورقة المناديل من الطرف لانك لو لمستيه موش حيقب منك
بعد الفرد سيبيه يخمر مرة تانية ساعة كمان
مهم قوى تسخنى الفرن على درجة 180 وسخنى الصاج اللى حتحطى فيه العيش لازم الصاج برضه يسخن كويس
بعد مايخمر العيش امسكى المنديل من الطرف واقلبيه بخفة على الصاج وحطيه اوعى تلمسي العيش والا حيهبط منك وده اللى حصل معايا لمست جزء صغير من العيش مانفش والباقي هو اللى نفش كويس نشوف كده الصورة اللى حتوضح كلامى
شايفين معايا الرغيف اللي جوا فيه جزء نافش كويس والناحية التانية مانفشتش
بس شكله يفرح وهو قابب كده
بعد مايقب كده وتحسي انه خد لون تمام من تحت شغلي الشواية عشان ياخد لون ذهبي من فوق
ودول أول رغيفين طلعتهم
وده باقي العيش لما خلصوا
شايفين منفوش من جوه ازاى؟
يارب يكون العيش عجبكم
تحياتى لكم مايا علي
تسلم ايدك حبيبتى
الف مبروك التكريم
وخمـــــــــــــــــس نجــــــــــــوم لعيونك
شكلة حلوووو اووي
طبعا ممتااااز ومفيهاش كلام