كان في اتنين واحد اسمه بيبسي وواحد اسمه لبن
كانوا واقفين جنب بعض على رف في السوبر ماركت
اللبن قال للبيبسي : انت مين؟
البيبسي قاله : انا البيبسي والاطفال كلهم بيحبوني
اللبن رد عليه وقاله : بس انا الاطفال مش بيحبوني زيك ليه؟
البيبسي قاله : بيحبوني انا اكتر ولما بيدخلوا السوبر ماركت بيشتروني انا ومابيحبوش يشتروك
اللبن : بس انا مليان فيتامينات وكالسيوم مفيد لصحتهم
البيبسي بيضحك على اللبن وقاله : وانا معنديش فيتامينات وكالسيوم زيك والاطفال بيحبوني اكتر منك
اللبن : انت مليان حاجات وحشه بتكسر العضم وتبوظ السنان وانا ببني العظم والاسنان
البيبسي : والاطفال مش عارفين كده وانا بضحك عليهم وبيشتروني بردو
اللبن : بس مامتهم بتتحايل عليهم عشان يشربوني وهما مابيرضوش
البيبسي : عشان انا طعمي احلى منك .. مع اني مش مفيد زيك .. انا بوجع بطنهم وببوظ صحتهم .. ولما بكون ساقع اوي بخلي زورهم يوجعهم
اللبن : وانا ببني عضلاتهم وبخلي الطفل قوي جدا ويقدر يعمل حاجات كتير .. وصحتهم بتبقى احسن لما بيشربوني مرتين في اليوم .. وكمان ببقى مفيد جدا لما بيشربوني قبل النوم على طول .. بخليهم يحلموا احلام سعيده ويصحوا يلاقوا نفسهم احسن من اليوم اللي قبله
وهما بيتكلموا ويتخانقوا كان في ولد صغير واقف سامع الكلام اللي هما قالوه
كان بيفكر يشتري البيبسي ولا اللبن .. فكر شويه وقال لنفسه : لو اشتريت البيبسي المضر دا هيخليني ضعيف وتعبان ومش هقدر العب بالكوره مع اصحابي في النادي ولو اشتريت اللبن الحلو دا هيخلي عضمي قوي واكبر بسرعه وسناني زي الحديد واقدر العب مع اصحابي واغلب الفريق التاني .. انا هشتري اللبن ومش هشتري بيبسي تاني ابدا
وفعلا راح الولد خد علبة اللبن من على الرف وساب البيبسي المضر لوحده بيعيط عشان ماعرفش يأذي الولد الصغير .
منقو9و9و9ل
