تعالوا بقى اقولكم عملت ايه استعدادا لهذا الحدث العظيم…
اولا منعنا السهر تماما…
النوم بدري الساعه 8 بليل.. ويصحى الصبح الساعه 6
(10 ساعات نوم مناسب جدا للأطفال في السن ده ..علشان التركيز والنشاط)
رتبنا الأوضه بتاعته مع بعض…
الألعاب اللي ملهاش لازمه حطيناها في المخزن…
خلينا بس الألعاب اللي هيلعب بيها في فترة الدراسه…
رتبنا مكان للكتب والكراسات وأدوات المدرسه…
نزلنا اشترينا مكتب جديد (طبعا من اختياره هو علشان يحس ان له بعض القرارات )
نزلنا اشترينا أدوات المدرسه كلها (بردو من اختياره طبعا )
نزلنا جبنا الشوز والشرابات (بردو من اختياره مع ان الشوز مش عاجباني بس اهم حاجه تكون عجباه هو )
رحنا المدرسه الجديده مرتين انا وهو وباباه… (علشان لما يروح المدرسه يحس ان المكان مألوف بالنسباله )
كلمته كتير اوي عن المدرسات وأد ايه هم طيبين وحنونين وبيحبوا الاطفال…(في اطفال كتير بيبقى عندهم رهبه من المدرسات )
كلمته على انه هيشوف اصحاب جداد..وهيلعب معاهم وهيكون صداقات جديده…(والنقطه دي فرحته اوي وخصوصا انه ماعندوش اخوات )
ماحسستوش ان المدرسه كلها دراسه وجد … فهمته ان انت هتلعب اغلب الوقت مع اصحابك .. وان المدرسه فيها مراجيح والعاب حلوه اوي (لأن في اطفال كتير معتقده ان المدرسه مش اكتر من انها حرمان من اللعب والبعد عن حضن ماما )
حكيتله قصص عن الأطفال الشاطرين اللي اول مره يروحوا المدرسه … وانهم ماعيطوش خالص…(كتحفيز له )
واتفقنا انا وهو اننا هنبدأ اللعبه التحفيزيه اللي انا عملهاله…
كنت عملت موضوع عنها … وده اللينك بتاع اللعبه التحفيزيه
الموضوع ده فرق كتير اوي مع ابني…العقاب والزعيق قل جدا..
فهمته ايه اللي هيحصل اول يوم في المدرسه… وصارحته بأني همشي واسيبه وهروح البيت … ولما اليوم الدراسي يخلص هرجعله
(بلاش فكرة اننا نضحك عليهم ونقولهم انا هستناك بره )
نبهته انه لو عايز يروح التواليت او عايز يشرب يقول للمدرسه بتاعته…وقلتله ان التواليت نظيف زي بتاع البيت…
(في اطفال كتير عندهم مشكله في موضوع التواليت في المدرسه ممكن يكون كسوف او خوف او قرف من ان التواليت مايكونش نظيف )
سألته ايه اكتر حاجه حببها في انه هيروح المدرسه…وايه اكتر حاجه مش حاببها
(عايزه اعرف كل اللي جواه علشان لو في اي مشكله احاول احلها بهدوء )
فهمته اهمية الفطار الصبح … (علشان تكون ولد نشيط وقوي وشاطر)
وياريت الفطار يكون كوب لبن + اي ساندوتش او قطعة كيك
(اللبن مهم جدا للأطفال الصبح ولو مش بيحب اللبن يبقى اكسري طعم اللبن بشوية شاي صغيرين )
بلاش الشيبسي والشيكولاته في المدرسه…
يعني ساندوتش ومعاه عصير مثلا وفاكهه او خياره
جبتله حصاله علشان يحوش فيها اللي هيتبقى معاه من مصروفه البسيط ( علشان يتعود على التوفير )
جبتله شماعه صغنونه علشان يعلق عليها هدومه وهو نازل الصبح للمدرسه او لما يرجع
(يتعود على النظام والترتيب من دلوقتي ومايعتمدش ان كل حاجه ماما هتعملها )
عوديه من دلوقتي على حب الصلاه (بأنه يصلي معاكي وعوديه يروح مع باباه المسجد)
وكمان يتعود ان اول مايصحى يصلي الصبح ..
انا جبتله سجادة صلاة صغنونه علشان احببه في الصلاه…
الدعاء قبل كل حاجه (دعاء الأكل والنوم والحمام والخروج والدخول للبيت )
لما يصحى من النوم عوديه يرتب السرير ولو بمساعدتك…
يغسل وشه وأسنانه لوحده…
يلبس هدومه لوحده…
يفطر لوحده…
(ممكن تكون بعض الحاجات صعبه بالنسباله…ممكن في الاول تساعديه شويه… وبعدين سيبيه يعمل كل حاجه لوحده )
خصصي وقت في اليوم ليكي انتي وهو مع بعض…تلعبي معاه..تتكلمي معاه…تسمعيله…تحكيله حكايات…
(الموضوع ده فارق مع ابني جدا…ومقربنا من بعض اوي الحمد لله )
قربيه من باباه… (يروح معاه المسجد…تكلميه اد ايه بابا بيتعب علشانا…يلعب معاه )
خصصي وقت للقران…(ممكن يروح يحفظ في مسجد قريب او لو انتي كل يوم تحفظيه أيه واحده…بس لازم تواظبي لأن ده اللي هينفعهم بجد )
نهاية الأسبوع لازم تكافئيه على التزامه طول الأسبوع (بهديه رمزيه… فسحه حلوه … اي حاجه هو بيحبها )
وربنا يباركلي في ابني ويحافظ عليه ويجعله بار بيا وباباه…
وربنا يخليلكم اولادكم يارب وتشوفوهم احسن في الدنيا…ويرزقكم بالذريه الصالحه يارب
في رعاية الله…
بحبكم اوي…
منقول
