وانا قاعده دلوقتى شريط حياتى مر قدامى وبزات الحادثه الى حصلتلي من خمس سنين واناحامل في تؤام عمري 
كنت عند ماما وهو كان في الشغل وجه اخدنى الساعه 4 الفجر وكان تعبان جدا المهم مشينا بالمكنه بتاعته ووحنا ماشيين ….نام غفل لحظه 
وطبعا اتقلبنا بالمكنه وكان الدكتور عاملى عملية ربط يعنى ربط الرحم عشان يحافظ على عدم السقوط الاجنه المهم لما اتقلبنا حصل انى طرت من على المكنه (الموتوسيكل)ووقعت على المقعده وحصل انى مقدرتش ققوم كنت ساعتها في السابع وبطنى قدامى حاولو الناس وجوزي يحكوا فيا وانا اصرخ بس كان كل همى انى رجلى متكونش بانت لانى كنت لابسه شورت تحت الهدوم موش بنطلون بس من ساعتها وانا موش بخرج غير ببنطلون تحت الجيبه او العبايه جوزي اتصل باخويا جيه بعربيت بابا وشالونى وانا بصرخ وحطونى في العربيه انا فاكره انه ألم رهيييييييب ورحنا المستشفى وبعد كده عملت الاشاعه وطلع ان الحوض انكسر من المفصل الشمال والحمد لله وكان في شرخ في الركبه الشمال مع تمزق في الاربطه انا طبعا مينفعش اعمل اي عمليه لانى حامل والاجنه هتموت وطبعا كان لازم اعمل عمليه بس انا رفضت فضلت عيالى تخرج للدنيا وبعدين ربنا قادر على الشفى مرشهرين وانا طريحة الفراش لحد ماولدت وبعدها ممكن ققول انى سافرت وروحت لكل الدكتره وقالو مفيش امل هعيش كده على كرسي متحرك وبعدين انا كان عندي يقين في الله وحجزت عند اكبر دكتور في مصر بتاع المنتخب ((احمد عبد العزيز ))لو تعرفوه ده الى كان عالج الممثله شريهان بعد ماتكسرت ورجعها تانى زي الاول بفضل ربنا الحجز عنده لمده اربع شهور وبدفع 400 جنيه 
المهم رحت بعد اربع شهور ودخلت للدكتور وفضل فتره يبص في الاشعه ولقيته بيتكلم ب الانجليش مع المساعد بتاعه وام مطلع ال400 جنيه وادهملى وقالي :: انا اسف يابنتى ؟؟؟
قولتله انا جايه من سفر عشان اسمع كلام تانى غير اسف قالي انا ممكن ارشحلك دكتور تانى قولتله لا انا عاوزه اسمع منك انت وموش هروح لدكتور تانى قالى بصي عيشي حياتك هي رجلك هتتطول شويه لانه لحمت على واسع اتنين سنتى ونص بقت رجل طويله ورجل قصيره وواحده واحده هتمشي عليها بس بعكاز الاول وبعدين هيبقى عرجه بسيطه المهم بعد حوالى 10 او 15 سنه هتغيري المفصل لانه هيكون اتهلك وتركبي مفصل جديد سالته طيب ليه مركبش دلوقتى قالي مهما كان المفصل الطبيعي مريض احسن ميت مره من المفصل الصناعى فاستخدميه لحد ميهولك بس صمم انه ميخدشي الفلوس وقالى الله يشفيكي وفعلا كل الى قاله حصل وانا دلوقتى برجل ورجل
بس واديني مستنيه العشر سنين عشان اغير المفصل بس انا احسن من ناس كتير ربنا يشفيهم ويشفى مرضى المسلمين يااااااااااارب
………………………………………….. ………………………………………….. …
ولما قدرت اكتب ملقتشي غيركم اكتبلهم
من صدمتى منزلتش دمعه ولا عيطت كنت في حالة جمود
بس اول مافوقت كتبت عشان انا محتاجه نفسي عشان ولادى محتاجنى تؤام عمري
يافاطمه انتى طالق
بكل بساطه وسهوله قالها
انا بطلب منكم دعوه بسيطه في حروفها كبيره جدا في حياتى
ادعولى بالرضى
ايوه الرضى بما قسمه الله لي
بكل حاجه باعاقتى بحالى كمطلقه بكل شيء الرضا ليس الا
ياااااااااارب ارزقنى الرضا
يارب يشفيكي شفاء عاجلا
وعسى ان تكرهو شىء وهو خير لكم
أكيد ربنا سبحانة وتعالى
رايدلك الخير وانشاء الله هيعودك خيرا منه
قولى اللهم أخلف علية خيرا منه
والحمد لله على كل حال انتى أحسن من غيرك كتير
وربنا يخليلك أولادك ويباركلك فيهم ويعوضك خير فى أولادك