[IMG]
[/IMG]الرضاعة بالنسبة للطفل الرضيع منذ نعومة اظافرة هو المصدر الاساسي الحنان والحب والامان
ده طبعا فضلا عن انه بالفطرة مصدرة الاساسي للطعام والشراب
فالفطام بالنسبة اله هو حرمان من من مصادر كل هذه الصفات
طبعا كلنا بنخاف جدا من خطوة الفطام واذا لم يكن بطريقة سليمة من الممكن ان يؤثر علي نفسية الطفل فترة طويلة
انا جاية النهارده انقلكو تجربتي الشخصية في موضوع الفطام
وفي الحقيقة هما تجربتين مع بنتي ومع ابني لسه فاطماه مش اقل من 3 شهور،
نبدأ ببنتي الكبيرة :-
اللي لقيتها متعلقة بالرضاعة اكتر من اللازم وبقت ممكن مترضاش تاكل عاوزة ترضع بس وكنت عند اهلي
ففطمتها وهي سنة ونص وكمان اكتشفت ان عندي انيميا
فخفت تأثر عليها وللاسف كانت انتقلت ليها خلال الرضاعة لان اللبن لو فيه اي نقص بيأثر علي الطفل
فطمتها مرة واحدة وانا كنت عند اهلي جبت صبار مر فلما داقته مبقتش ترضي ترضع تماااام ده بالنهار ،
نيجي بئه لليل طبعا الاطفال كلها بتنام علي الرضاعة وصدر امها طبعا مقلكوش طبعا مش عارفة تنام وكل ماتفكر تصوت وتصرخ وتشد فيا وعياااااط. .
كنت اشربها لما تصحي شوية عصير هيرو بيبي تفاح عشان نعوض الرضاعة بالسوايل بس طبعا كانت كل شوية تصحي تزن وكانو يومين سهر وتعب طبعا،
الي جمدلي قلبي اهلي معايا لان والله قلبي وجعني وصعبت عليا من منظرها وكنت هضعف والموضوع ده اخد معاها 3 ايام والحمدلله بدأت تنسي.
نيجي للمشكلة الاكبرطبعا الا وهي المشكلة الكبري موضوع تنشيف الصدر او اللبن
طبعا مكنتش اعرف حاجة عن تعب الموضوع ده فسخنت وتعبت شوية ومبقش حتي قادرة اتعامل مع بنتي ومقلكوش علي الوجع والألم.
والدتي الله يباركلها نزلت للصيدلية طلبت دوا لتنشيف اللبن
كانت حبوب المفروض واحدة الصبح وواحدة بالليل بس كنت باخد واحدة بس عشان خفت يعمل هبوط في الدورة الدموية وانا عندي انيميا
والدكتورة قالتلها تعصر من صدرها شوية مرة واحدة بس
المشكلة بقا اخد وقت اسبوعين علي مانشف اللبن حسيت ان الدوا مكنش بيعمل حاجة من كتر الوجع
بس كانت علقة مووووت.
لدرجة اني بعد كده مكنش شايلة هم حاجة في ابني التاني اد موضوع الفطام طبعا بسبب الي شفته ،
ندخل علي ظروف فطام ابني ملحوظه كنت لوحدي مش مع اهلي:-
ابني فطمته سنة و4 شهور ويمكن اقل شوية كمان لان مكنش في دماغي موضوع فطامه لان الظروف هي الي فرضت فطامه،
كنت باخد حبوب منع حمل منفعش للمرضعات وكنتش اعرف وده حوالي 7 شهور ومسكنات لان كان عندي وجع اسنان حوالي شهر ومرضيتش اروح لدكتور
طبعا كل ده غلط ومحدش يعمل زيي لان بنسبة كبيرة ده العامل الرئيسي في تنشيف اللبن ،
كوكتيل من المسكنات طبعا معظمهم ممنوع للمرضعات بس طبعا كلكو عارفين وجع الاسنان بيقي عامل ازاي
ربنا يعافينا يارب جميعا ويشفي مرضي المسلمين اجمعين
المهم نرجع موضوعنا طبعا بعد مابدأت احس ان مهما اتغذيت واكلت الحاجات الي بتزود اللبن زي العصاير والمية والخضار والفاكهة والحلاوة الطحينية والسمك والجوافة،
مش بيزود اللبن بدأت احس ان في حاجة غلط واتابع مع نفسي ،
لقيت صدري مش بيخزن لبن حتي لو ابني مرضعش لمدة يومين وبدأت بصدر بقت فاضية وصدري الاخر يادوب برضه ياخد منها مرتين باليوم بالنهار ومرة بالليل ،
بدأت حس بضيق من الرضاعة ومبقتش احب ارضعه واتعصب طبعا لانه مش بيكون فيه لبن والرضعة مبتكملش 5 دقايق علي بعض،
لحد مابدأ يتعود ينام بالليل من غيره يوم يرضع مرة ويومين لا كده لحد مانسيه بالليل ويكاد بطل رضاعه بالليل،
طبعا كان اوقات كتير بيتعصب ويزن عاوز يرضع كنت بشربه نعناع او ينسون كراوية مرمرية اي سوايل دافيه او عصاير طبيعية
وكان لما بيزن باباه كان بياخدهم عند جدتهم تحت او يخرجهم يشتريلهم شوية كيك علي بسكوت وكده وشوية كنا نقعد نلعب مع بعض لحد مانسي شوي كمان ،
دخل علينا رمضان نزلنا عند اهلي كانو فاكرين انه لسه بيرضع عادي لما لاقيناه بدأ ينسي وسط اللمه والعيلة وكده
لاقيناه ممكن يعدي يوم كامل بين اللعب والتعب والسهر وينام من غير رضاعة من التعب
طبعا اوقات برضه بيزن بس وسط اللمه بيكون الموضوع اسهل شوية ،
محتاجتش صبار الحمدلله وطبعا صدري نشف منه اللبن لوحدة وابني اتفطم تدريجي
وبصراحة متعبتش لاانا ولا هو في الفطام زي اول فطام مع بنتي
الي عاوزة اوصله بعد كل الرغي ده:-
لان بيريح الام والطفل قولتولي ليه وازاي ؟
1/بالنسبة لللام الفطام التدريجي بينشف اللبن من غير ألم بنسبة كبيرة
وكمان ممكن تستعملي حبوب منع الحمل الغير مخصصة للمرضعات لانها هتقلل كمية اللبن بالتالي نسبة الوجع بتقل
وتقدري تتابعي وتباشري بيتك من غير تتعبي .
2/بالنسبة للطفل مش هيحس انك حرمتيه مرة واحدة من اكتر حاجة متعلق بيها في حياته من يوم مااتولد ،
ومصدر طبعا للامان والحنان .
3/وبالنسبة للزن اللي كل منا بيحمل همه
اينعم لازم يزن بس طبعا مش زي الفطام الي بيكون مرة واحدة هيتعصب ويعيط بتحاولي تسايسيه زي ماقولنا كده تاخديه عند جدته او مع باباه تلعبو / تخرجو /يلعب وسط اطفال.
[IMG]
[/IMG]
معلومة مهمه:-
جدتي الله يباركلنا فيها ويشفيها ويعافيها في فطام بنتي كانت قالتهالي:-
الطفل لما بنيجي نفطمه بتكون معدته متعوده علي وجود اللبن الي بيجلفن جدار المعدة وبيخلي فيه زي رطوبة كده
والمعدة بتكون خارجة من نظام لنظام مينفعش نرهقها لاقدر الله ممكن الصدمة للمعدة تعمل امراض هو برضه لما بيتفطم بيظل طفل ،
لذلك لابد نحاول اول اسبوع يكون اكله خفيف يعني مثلا خصار مسلوق /مكرونات/لسان عصفور /ارز مسلوق/الفواكه طبعا مهمه.
نبعد اول اسبوع عن اللحوم والاسماك والبيض والخضار المسبك ونقلل منتجات الالبان علي اد مانقدر،
تاني اسبوع بالتدريج ندخله مثلا قطعة فراخ متقطعه بشوربة خفيفة طبعا مع ارز او لسان عصفور الفراخ تكون مسلوقة وبرضه مع الخضار المسلوق،
نحاول نبعد اول شهر بعد الفطام عن الاسماك والبيض والخضار المسبك
نحاول نبعد او شهر بعد الفطام عن الاسماك والبيض والخضار المسبك
وربنا يحمي اولادنا من كل شر.
[IMG][/IMG]
انا عارفة اني حكيت تفاصيل كتير بس علي امل انها توضح االي عاوزة اوصلة
ويارب اكون في الموضوع قدرت اقدم ليكن معلومة بسيطة عن موضوع الفطام من خلال تجربتي مع اولادي
ادعولهم بالهداية وادعولي بفك الكرب وادعو لزوجي بسعه الرزق.
[IMG]
[/IMG]
/[CENTER]
|
تسلمي حبيبتي نورتيني
