تعليم الألوان للاطفال,كيف اعلم طفلي الالوان
تعليم الألوان للاطفال,كيف اعلم طفلي الالوان
أول ما البيبى يبيقى عمره سنتين بيكون مستعد إنه يتعلم حاجات كتير سواء الكلام أو الغنا ممكن كمان إنه يمسك القلم والورقة ويبدأ يشخبط، وكل الأنشطة ديه مهمة جدا للطفل فى المرحلة ديه لأن ده هو الأساس اللى الأم بتعتمد عليه فى تنمية قدرات طفلها وأولى خطوات مراحل التعلم والممتع جدا ان مريم كان عندها استعداد قوى للحاجات ديه واللى كان من أهمها إنها تتعلم الألوان.
كتير ممكن يحسوا إنه مش مهم للدرجة لكن أنا كنت حاسة غير كده ، كان عندى رغبة قوية إنى اعلمها الألوان لأنه بينمى من قدرتها بشكل عام والبصرية بشكل خاص وكمان تعليم الالوان سهل جدا من ناحيتى أنا كأم ومن ناحية استعيابها هي كطفلة فى العمر ده.
ماكنش مهم أوى أن مريم تعرف الألوان ومسمياتها فممكن الام تبدأ بالالوان الأساسية ( احمر – اصفر – ازرق )
كنت بلاحظ جدا أن مريم بتتعلم الالوان بسرعة لما اعمل دمج للمفاهيم والافكار فى الحياة اليومية يعنى إن اديها أمثلة علطول على الالوان من خلال حاجات حواليها يعنى مثلاً هدومها وكنت أسالها مثلا عايزة تلبسى لون ايه او لو بنشترى مثلاً فستان وموجود منه كذا لون اخليها تختار اللون اللى بتحبه.
كمان فى مجموعة من الأنشطة اللى كنت بمارسها مع مريم وكانت ممتعة جدا مش بس فى إنها تتعلم الالوان ا كمان بتزود من نشاطها وحيويتها وبتخلق نوع من الجو المفرح فى البيت وفى علاقتى بيها.
يعنى مثلا كنت بخلى وجبات غذائها تعتمد على لون معين مريم مختاراه يعنى مثلا لو علمتها اللون الاحمر ممكن اعملها عصير فراولة أو اقطع لها طماطم ، أد كان مفيد لان كل السلوكيات النفسية كان ليها تأثير مباشر حتى على أنها تاكل اكتر او تاكل عناصر معينة أنا عايزاها تاكلها وبتحايل عليها فمن خلال الجو ده بيزيد تقبلها لحاجات كتير.
و بقى كتاب الالوان من أهم الحاجات عند مريم وبتحبه جدا ممكن تقضى معاه وقت كتير أوى وهي بتلون وكان ممكن اخليها مثلا تختار صور من مجلات تانية ليها نفس اللون اللى بعلمهولها دلوقتى وتجمعه فى كتاب جديد اشتريتو ليها وخصصته انها تجمع فيه الالوان.
كنت بلعب مع مريم لعبة تطابق الالوان عشان اطور قدرتها على التمييز بين الالوان ومعرفة اسمائها وبشترى طبعا كل الالوان اللى بتحبها واخليها كمان تختارها بنفسها وبقى عند مريم box خاص بألالوان
ومننساش ان خطوة تعلم الالوان ممكن ينمى عندها هواية الرسم وديه من اجمل الهوايات اللى الام بتسعى ان طفلها يمارسها
فى حاجات وأنشطة كتير بنحس أوقات انها مش بقدر كبير من الأهمية وانها حاجات بسيطة ممكن ما تفرقش حاجة مع البيبى لكن التجربة بتبين لكل ام ان الحاجات ديه اد ايه مهمة لطفلك وأن مراحل عمرو الأولى هى المراحل اللى سهل يتعلم فيها الأساس لكل حاجة وبتهيأ للطفل جو مناسب جدا للتعلم في المراحل اللى بعد كده واللى بالطبع بتكون اكتر جدية.
