فاهيتا الفراخ من مطبخ مايا علي وبطريقتى الخاصة
ولانى بحب الأكلات السهلة والسريعة
نظرا لان عندى بنوتة مش بتنيمني خاااااااالص
بس ربنا يحميهالى طبعا
المهم عملت النهاردة أكلة فاهيتا الفراخ بطريقتى
يارب تعجبكم
المقادير
1/2 كجم فراخ بانيه مقطعة طويل
6 حبات مشروم ودى أساسية وجديدة في طبقي
2 بصلة متوسطة مقطعة شرائح
1 بصلة صغيرة مفرومة
3 أو 4 فصوص ثوم مفروم
4 فلفل رومى أخضر مقطع شرائح طولى
2 فلفل رومى ألوان مقطع شرائح طولى
صويا صوص
4 ملاعق كبيرة مستردة
3 ملاعق كبيرة زيت نباتى
ملعقة صغيرة ثوم بودر
1/2 ملعقة كبيرة بهارات فاهيتا برضه عاملاها عند العطار
2 عصير ليمونة
1 ملعقة صغيرة كركم
1 ملعقة كبيرة زعتر جاف
1/2 ملعقة كبيرة ملح
1 ملعقة صغيرة فلفل أسود
ملعقتين قشطة حاقولكم حاعمل خدعتي بيها ازاى؟
نشوف الطريقة
حنجهز تتبيلة الفاهيتا نضع المستردة و3 ملاعق صويا صوص والملح والفلفل الأسود والكركم وبهارات الفاهيتا والزعتر والكركم وعصير الليمون
والثوم البودر ونخلط جيدا ثم نضع الفراخ المقطعة طوليا ونقلب
أنا عشان ماعنديش وقت فبعملها علطول وبتطلع على فكرة نفس الطعم لو كنت نقعتها ساعتين فمش بيفرق معايا دلوقتى أنقع الحاجة طالما ظابطة التوابل بتاعتى
المهم حتجيبي طاسة غير لاصقة وتحطيها عالنار وتسيبيها تسخن كويس
وتحطى الفراخ واديها صدمة تمام
حطي بعدها البصل المقطع شرائح وسيبي البصل يدبل
حطي بعد البصل مايدبل الفلفل الرومى وسيبيه يدبل وبعدين هدى النار عليها لحد ماتستوى مكوناتك
في نفس الوقت حتجيبي طاسة تانية حتحطي يها زيت نباتي وضعى البصل المفروم وسيبيه يدبل وبعدين ضعى الثوم المفروم والمشروم الفريش وصويا الصوص حوالى ملعقة كبيرة وقلبي لحد ماتلاقي المشروم طرى شوية وبعدين ضعي القشطة اللى قلت عليها ليه بقي القشطة؟
المفروض انى بحط كريمة لبانى بس لان مش عندي كريمة لبانى والقشطة متوفرة عندى فحطيت منه وبقي زي الكريمة بالضبط تمام كده
استوت عندك مكونات الفاهيتا حطى المشروم عليه وقلبي لحد مايختلط كويس وقدميها ساخنة
اعمليها ساندويتشات ادهنى مايونيز
وضعى الفاهيتا وبعدين ضعي عليها خس كابوتشى
حتبقي تمااااااااااااام وعال العال
عايزة تشجيع حلو بقي
بالهنا والعافية علي قلوبكم ياعدولات
نشوف الصور بقي
يارب تكون أكلة النهاردة عجبتكم
الف شكر ياعسل
تم التقيييييييييم خمس نجووووم ياقمره
شكلها شهى جدااا
تسلم ايدك حبيبتى
يا طباخ انت
ربنا يخلى لك ست جنى العسوووووووووله وتتعبك زياده هههههههه
هى والعسووووله اختها كنزى
ربنا يحفظهم لك حبى
تسلم ايدك والف صحه وهنا
مبرووك التكريم
دايما بتيجى وانا جعانه ابص الاقى نفسى هموت من الجوع فجأه
يسلمو ياحبى
شكلها حلو اوى ما شاء الله