انا هبدأ كلامى بالصلاة على النبى
اللهم صل وسلم وبارك على حبيبى وشفيعى محمد
عايزة اقول جملتين وبناءا عليهم حتكلم
1- علمت ان رزقى لن يأخده غيرى فاطمئن قلبى
2- السعادة هى ان تعرف ماذا تريد وتصر عليه بالحاح
اولا النقطة الاولى رزقنا مكتوب عند ربنا محدش حياخد حاجة بتاعتك انتى واللى مكتوب لك حتشوفيه ولو عايزة حاجة ومش مكتوبالك لازم ترضى لانك لو عملتى قردة مش حتاخديها فمفيش داعى للحزن والندم والاكتئاب والقلق والاستعجال لان دى مشاعر سلبية حتضيع لك وقتك و ملهاش اى لازمة
لو تلاحظوا ان الناس دائمة الشكوى دايما عيانين ومكتئبين وعندهم مشاكل فعلا لانهم بيتكلموا عنها فبيجذبوها لحياتهم فعلا وبتحصل !!!
ممكن واحدة يجيلها اكتئاب علشان مش عارفة تشتغل او اتجوزت ومخلفتش او لسه ما اتجوزتش والعمر جرى بيها وكلام الناس ومنظرها ادامهم و و و ……
انا معاكوا ان دى حاجات اساسية وتهمنا
وجزء من حياتنا انما لو زعلنا واكتئبنا حنضيع وقتنا على الفاضى ونتعطل ومش حيكون فيه اى انجاز او نتيجة
ثانيا بقى السعادة ودى مسألة نسبية بس صدقينى السعادة مش فى راجل !! ولو مجاش نكتئب
كل واحدة تقعد مع نفسها وتشوف بتحب ايه ونفسها تعمله وتبدأ فيه وتكتب اهدافها وازاى تقدر تحققها وتتحلى بالصبر وتلزم الاستغفار بجد حياتك حتبقى جنة وعن تجربة
انا من عشاق التنمية البشرية و د ابراهيم الفقى الله يرحمه
واحدة اتصلت بيه وبتقوله انها اتجوزت ولسه مفيش حمل فتنزل تشتغل وتشوف حياتها ولا تقعد فى البيت تستنى الحمل
فقالها طبعا تنزل لان الحمل يا عالم يمكن يتأخر شوية طيب ولو ده حصل هى حتكتئب لان ما حصلش اللى هى عايزاه
انا بجد بستغرب من الناس اللى بتشتكى من الفراغ وان ناقصها حاجة واحنا الحمد لله عندنا مليون الف حاجة بس مركزين على الوحش بس وللى ناقصنا !!!
وفيه مليون الف حاجة تتعمل يعنى تقدرى تتعلمى اى حاجة جديدة وتشغلى كل وقتك والنت موجود وكفاية بس حبيبة قلبى فتكات
على فكرة انا بنت تربيتى اقل من العادية امى كانت بتشتغل ومفيش اى اهتمام وبابا ليل ونهار ضرب وشتيمة راجل على اده ميفهمش ف التربية و ربانا زى ما اتربى
فطبعا طلعت مش فاهمة حاجة ولا عارفة اعمل اى حاجة ومش واثقة فى نفسى وتخينة وحالتى زفت مكنش عندى اى مميزات بصراحة
ولكن سبحان الله ربنا بيسخر لنا اسباب وفرص فى حياتنا ولازم نستغلها بلاش نسيبها تضيع
سبحان الله جت لى اداب وحولت تربية وفيها اخدت مواد تربوية واتعلمت حاجات ياما اوى وعرفت غلطات بابا معايا ايه
وده تجنبته اما اتخرجت واتعاملت مع اطفال سواء قرايبنا او فى الدروس او حضانة او مدرسة
وكمان علشان انا ادركت الخيبة التقيلة اللى انا فيها وقررت اتغير
ان الله لا يغير ما بقوم حتى يغيروا ما بانفسهم
فبدأت اتحرك وبعت لى واحدة بقت صاحبتى فيما بعد البنت دى ما شاء الله عليها
كان باباها مثقف جدا ويطلعها رحلات واماكن ويحكى لها عن التاريخ والدين ويعلمها كل حاجة
ومن هنا بدأت اتعلم منها واكون شخصيتى واحط اهدافى وفعلا اتغيرت ف كل حاجة شخصيتى وتفكيرى واسلوب كلامى وعلاقتى مع ربنا طبعا
ومرت السنين وبسبب قربك من ربنا بجد سبحان الله بينور لك بصيرتك وبيشيل من جواكى امراض النفوس والحقد والكراهية ربنا يعافينا منهم يارب
وصاحبتى دى اتجوزت وفرحت لها جدا ومن جوايا فاهمة حكمة ربنا اولا نصيب ثانيا فيه اسباب وهى اخدت بيها فهى دلوقتى جاهزة للزواج ولتكوين اسرة انما انا لسه مش جاهزة
وحصلت لى مواقف ياما اوى بقى فى شغلى اتعلمت منها وخلتنى ناضجة اكتر
وكنت زى اى بنت عايزة انا كمان اتجوز ويكون لى بيت واحب واتحب ونفسى فى كده اوى
وربنا علمنى درس برضه زى ما يكون بيقولى اصبرى لسه مش دلوقتى
فاتخطبت لواحد اكبر منى ب 4 سنين وشغله حلو انما شخصيته زفت ومتفقناش واتظلمت جامد من بابا كالعادة وعملت معجزة علشان افسخ الخطوبة والحمد لله نجحت
وقعدت مع نفسى ساعتها وبقيت اسبح ربنا بعد ما كنت بدعى ليل نهار فى حكاية الجواز دى بقيت العكس تماما
والتجربة دى زادتنى رضا ونورت لى بصيرتى اكتر وقوت ارادتى واتعلمت انى مش ممكن اسمح لحد يتحكم فى حياتى ويخلينى اعمل حاجة مش عايزاها
وبعدها جالى ناس ياما وكل واحد فيه عيب خطير جدااااا مينفعش معايا وفهمت حكمة ربنا
انتى ممكن تقعدى لوحدك من غير جواز بس احسن بكتير ما تتجوزى جوازة سودة ودى حصلت لصحبتى بجد بقيت مصدومة
وانا شيفاها دمعتها على خدها ليل ونهار ومكتئبة وانا الحمدلله فكيت الخطوبة وبفكر فى مستقبلى واهدافى ومليون حاجة عايزة اعملها
وشفت واحدة ما خلفتش والتانية مخلفة عيل مطلع عنيها وفهمت حكمته بس يارب اللى مخلفتش تفهم وبتكلم معاها وبترتاح من كلامى الحمد لله
الخلاصة ان مفيش حاجة بتحصل فى حياتنا عبثا
لو علمتم الغيب لاخترتم الواقع
انا دلوقتى بفضل الله فهمت نفسى وعرفت شخصيتى
واللى حاسة انها تايهة منكم يارب تتشجع معايا
انا بجد نفسى اسافر دبى واللى عنده حلم لازم يؤمن بيه ويكلم الناس عنه وهو ده اللى انا بعمله على الرغم انى لسه مش عارفة ايه اول خطوة حعملها بس مش مهم
قررت اشتغل علشان على الاقل اجيب مصروف ايدى واشترى اللى نفسى فيه
بطور من نفسى فى القران بفضل الله اخدت التجويد وجزء عم وتبارك وجزء من البقرة وحفظت يس والكهف وناوية اكمل باذن الله ولو كل يوم ايه
كل يوم بحفظ كلمة انجليزى طبعا مش عايزة اكتر علشان مش احمل نفسى فوق طاقتى واحس بالعجز واقف مش عايزة اوصل للمرحلة دى
بلعب رياضة يومين ف الاسبوع فى البيت ونزلت الفيديوهات من النت
اتعلمت اكلات جديدة من فتكات و سى بى سى سفرة ولسه حتعلم
بعمل حمام زيت لشعرى واى ماسك مغذى مرة ف الاسبوع
وهدفى كمان اوصل لمنصب عالى هنا فى فتكات واكون من المشرفات وان شاء الله حكون مستشارة نفسية
لانى بحب اسمع الناس واساعدهم فى حل مشاكلهم
انتى كمان قومى يالا وهاتى ورقة وقلم واكتبى كل احلامك
حتى لو مش عارفة حتحققيها ازاى
واقريها كل يوم وكلمى الناس عنها وصدقيها وعيشى فيها
حتجذبيها ليكى وباذن الله حتتحقق والابواب والفرص حتتفتح فى وشك
مفيش مستحيل كل شىء ممكن وكل الاحلام بتتحقق
منقـــوول لعيــــونكم
بحبــــكم فى الله
تسلم ايدك
|
نــــورتى حبيبتى
|
الأروع مـــرورك
نـــــورتى