ازيكو ياقمرات
مبدئيا كده الصوره من النت لان فونى بايظ ومعرفتش اصورلكو الزبادى بتاعى
انما الوصفه بتاعتى جدااااا
تعالو بينا عالمطبخ
المقادير
ك لبن طازج
كوب زبادى غير طازجه
يعنى تكون بايته او بتاريخ امبارح مثلا
الطريقه
هنغلى اللبن ونسيبه لحد ما يبقى دافى ونعرف نلمسه بأيدينا
خدو بالكو دافى مش بارد ولا سخن
هنجيب كوباية الزبادى ونحطها على اللبن ونقلب كويس جدا بالمضرب السلك لحد ما تختفى كل الكتل بتاعة الزبادى
هنصب اللبن فى اكواب ونكون مدفيين الفرن حاجه بسيطه يعنى نشغله حوالى 5 دقايق ونطفيه ونحط فيه كوبايات الزبادى ونقفله ونسيبه من بالليل للصبح
وتانى يوم هيبقى جاهز ومتماسك حطيه فى التلاجه وبالهنا والعافيه
لو حابه تعملى زبادى لايت يبقى هنغلى اللبن ونسيبه فى التلاجه لتانى يوم وبعدها هنشيل القشطه وندفيه عالنار وهنعمله بنفس الطريقه اللى فاتت
تعالى بقى اقولك على شويه تكات تعمليها عشان تطلعى زبادى زى بتاع بره واحلى
التكه الاولى
هتحطى كيسين فانيليا على اللبن قبل ما تصبيه فى الكوبايات هتديكى طعم وريحه جميله جدا للزبادى
التكه التانيه
هاتى بعض قطع من الفواكه وحطيها فى الكوبايه وصبى عليها الزبادى وكده هيبقى عندك زبادى بالفاكهه ولو حابه اللون بتاع بره ممكن تدوبى شوية من بودرة الجيلى بالنكهه اللى ولادك بيفضلوها فى اللبن وقبل ما تصبيه فى الكوبايات
التكه التالته
هاتى اى نوع مربى ولادك بيحبوها وحطيها فى الكوبايه قبل الزبادى وكده بقى عندك زبادى بالمربى
التكه الرابعه
اما يستوى الزبادى حطى عليه بدل السكر عسل اسود وقلبيه هتلاقى طعم تحفه وكمان فوايد مالهاش عدد (كالسيوم وحديد)
التكه الخامسه
هاتى اى نوع فاكهه(فراوله او موز ) قطعيها وحطى عليها لبن وزبادى وسكر واضربى كويس وكده بقى عندك زبادو احسن من بتاع بره كمان وخالى من اى اضافات صناعيه ومشروب ينفع للفطار او للسحور ودى صوره للزبادو كنت مصوراها من فتره
اتمنى تكون وصفاتى عجبتكم وافادتكم
الى اللقاء ياقمرات
الى المفضلة وان شاء الله اعملة فى رمضان
ويارب الاولاد يحبوة