اغرفي الرز في الطبق وعليه الكفتة المشوية
لو عايزة تعملي أكلة جديدة ومميّزة وكمان شهية وتقدري تقدّميها في عزوماتك.. جرّبي الكفتة مع الرز بالزعفران على طريقة منال العالم.
كفتة مشوية مع رز بالزعفران
مقادير الكفتة:
½ كيلو لحمة مفرومة
¼ ملعقة صغيرة شطة
¼ ملعقة صغيرة كركم
½ كوب بقدونس مفروم
ملعقة صغيرة ثوم مفروم
½ كوب كزبرة مفرومة
2 ملعقة كبيرة سمنة
ملح وفلفل أسود
بصلة مفرومة
مقادير الرز:
2 كوب رز بسمتي
½ ملعقة صغيرة زغفران
2 ملعقة كبيرة مية ورد
2 ملعقة كبيرة زبدة
2 ملعقة كبيرة زيت
ملعقة كبيرة ملح
2 كوب ميه
لتحضير الكفتة:
1- اعصري البصل المفروم من المية بتاعته تماما، وبعد كده خدي البصل وحطّيه في طبق غويط، وضيفي عليه الكزبرة والبقدونس والملح والشطة والثوم المفروم والكركم والفلفل الأسود.
2- ضيفي اللحمة المفرومة على خليط البصل اللي عملتيه، واخلطيهم بإيدك لغاية ما كل المكونات تتجانس مع بعضها كويس.
3- صبّعي اللحمة على أسياخ خشبية، ولو مش عندك ممكن تصبّعيها على قلم.
4- حطّي السمنة في صينية على النار، وشوّحي فيها أسياخ اللحمة لحد ما تتشوح كويس ولونها يبقى دهبي.
5- حطّي قطعة فحم ساخنة على ملعقة زبدة في صينية الكفتة، وغطّيها بسرعة، ودخّليها الفرن وسيبيها لغاية ما تستوي.
طريقة الأرز:
1- هاتي حلة متوسطة، وحطّي فيها مقدار الميه والملح والزيت، وسيبي المية لحد ما تغلي أوي، وبعد كده حطّي الرز وسيبيه لحد ما يستوي كويس، وبعد كده صفّيه من الميه.
2- حطّي الزعفران في مية الورد.
3- حطّي الزبدة في حلة على النار وحطّي معاها الزعفران.
4- بعد كده حطّي نصف كمية الرز، وقلّبي بالراحة عشان تحافظي على حبة الرز، وبعد كده ضيفي الكمية الباقية.
5- عند التقديم.. اغرفي الرز في الطبق وعليه الكفتة المشوية.. وبالهنا والشفا.
لوعجبكم قيمونى
شكله جنااااااااااان