لفات طرح 2024 2024

كل بنت عايزة تعمل البدع في الطرحة علشان تليق مع الحجاب المودرن الايزي بتاع 2024 !!

مش مكفيها إن الطرحة أصلا 20 سم ومغطية شعرها بالعافية !!
لأ .. عايزة كمان تعمل اي حاجة علشان تلفت الانتباه ليها وللطرحة الاستايل بتاعتها واللفة الجديدة اللي هي عاملاها !

وإلى الله المشتكى ..

أنا عايز أسأل كل بنت في بداية كلامي :

إنتي ليه أصلاً لابسة طرحة أو ايشارب أو خمار ؟؟؟؟؟؟؟

ليه مغطية شعرك ؟؟؟؟؟؟

– هل علشان طلعتي لقيتي والدتك كده ؟؟؟؟؟؟؟

– ولا علشان كلام الناس ؟؟؟؟؟؟؟

– ولا علشان مش فاضية كل شوية تروحي للكوافير وتدفعي فلوس ؟؟؟؟؟؟؟؟

– ولا علشان شعرك قصير أو مش حلو فبتغطيه وخلاص ؟؟؟؟؟؟

– ولا علشان ترضي ربنا ؟؟؟؟؟؟

—> أنا واثق ومتأكد إنك محجبة علشان ترضي ربنا ..

طيب يا اختي ما هو ربنا اللي أمرنا بإننا مانكشفش الشعر ، هو برده اللي أمرنا بإننا منلبسش ضيق ومنظهرش مفاتننا ..ومنخرجش بالزينة ميك أب وإكسسوار !!!!

ولا إحنا بناخد من الدين اللي يمشي على مزاجنا وبس ؟؟؟؟!

أنا أمنية حياتي إن أوصّـل لكل بنت مفهوم الحجاب ..

نفسي كل بنت مسلمة تعرف هي ليه محجبة ؟؟؟؟؟؟

الغرض من الحجاب يا أختي هو :

" ستر زينة المرأة "

قال الله تعالى : ( وَلا يُبْدِينَ زِينَتَهُنَّ ) سورة النور:31

يعني إيه ؟؟؟

يعني وإنتي نازلة تشتري لبس ، تختاري اللبس اللي يداري جمالك ومفاتنك مش يزينك أكتر في عيون الشباب !!

يعني وإنتي واقفة قدام المراية قبل ما تخرجي وبتظبطي حجابك ، المفروض نيّـتك تكون هي إخفاء وستر الزينة ، مش إنك تزيني نفسك أكتر في عيون الشباب!

يعني المفروض تدخلي على النت تدوري على اكتر لفة حجاب تسترك ومتخليكيش تلفتي نظر حد ..
مش ادخل ادور على الخمار الماليزي والطرحة الاسباني وأحدث لفة تخلي الكل يقول ده بنت جامدة جدا واستايل اخر حاجة !!

يارب يا أختي تكوني فهمتي معنى الحجاب..

ويارب تغيري نظرتك الضيقة للحياة وتعرفي قيمتك اللي اختزلتيها في بنطلون وبدي وشوية ميك اب !!

يعني لو ملبستيش استايل او محطتيش ميك اب مش هيبقى ليكي قيمة ؟؟!!

والله العظيم إنتي قيمتك أكبر من كده بكتيييييييييير ..!!

وإنتي أغلى من إنك تكوني سلعة رخيصة طوب الارض بيبص عليها وياخد منها اللي يشبع شهوته !!

يا اختي حرام عليكي نفسك وحرام عليكي شباب المسلمين..

الشباب الغلبان اللي عينيهم اتدمرت من النظر للبنات ..

الشباب اللي مش لاقي يتجوز ولا لاقي شغل أساسا ..!!

فغصب عنه لما يشوفك هيروح يشرب مخدرات علشان ينسى وهيروح يتفرج على افلام اباحية او هيروح يزني علشان يفرغ شهوته !!

يعني انتي من اكتر الناس اللي بتهد في المجتمع بطريقة بشششششعة !!

إنتي السبب في فساد المجتمع وانحلاله اخلاقياً !!

بنت واحدة ممكن تفتن مليون راجل وتكون سبب في ضياعهم وانحرافهم !!

ليه تفرطي حب ربنا ليكي ؟؟؟؟؟

ليه تجلبي لنفسك غضب ربنا عليكي ؟؟؟

إنتي مفكرة إنك مش هتموتي ؟؟؟

والله هتموتي ..

ووالله هتقفي قدام ربنا ..

وهيسألك عن لبسك وحياتك وكل شئ ..

قال الله تعالى :

( وَقِفُوَهُمْ إِنَّهُم مَّسْئُولُونَ )

ياترى هتردي وتقولي اييييييييييييه ؟؟؟؟

هتقولي عصيتك يارب علشان الناس تقولي علي استايل وجامدة وجميلة ؟؟ !!

هتقولي يارب اخترت إني أرضي الناس على إني أرضيك ؟؟!!

فوووووووقي بقى يا اختي ..

ليه تضيعي كل شئ علشان لاشئ !!!

فوقي وصححي حجابك وغيري لبسك اللي واقف عقبة بينك وبين رضا ربنا عنك ..

وارجعي لربك وقوليله :

سيبت لبسي علشانك يارب..

وهسيب كل حاجة حرام علشانك يارب ..

بس إنت ترضى !

وتيقني إنه هيقبلك ويغفرلك كل ذنوبك ويتوب عليكي ويقربك ويرزقك السعادة في الدنيا ، والنعيم الأبدي في الجنة بفضله وكرمه ورحمته..

خدي القرار فوراً..متتردديش !

وانزلي من بكرة اشتري لبس جديد يرضي ربك ..
لبس تفتخري بيه لما تقابلك حبيبك النبي صلى الله عليه وسلم وزوجاته أمهات المؤمنين يوم القيامة ..