اتيكيت الإعارة أو الاستلاف
ساعات بتحصل لينا ظروف أو لأي حد أنه عاوز حاجة معينة والوقت محدود
ومش هيقدر ينزل يشتريها دلوقتي
فبنضطر للاستلاف بحد بينا وبينه علاقة جارنا صاحبنا قرايبنا
فهنتعرف مع بعض دلوقتي عن اتيكيت الإعارة أو الاستلاف
بالنسبة للأطفال
** يفُضل عدم تشجعيهم أنهم يستلفوا
من الصغر يعني زي الألعاب أو مثلاً قلم من صاحبه
وبيكون الأمر محدود جداً وبمعرفة من أهله ويرجعه في وقت محدد
ده بيعمل نوع من المسئولية والانضباط عنده
** أثناء الدراسة أو المدرسة ممكن يستلف كتاب من مكتبة المدرسة
بس بشرط أنه يحافظ عليه ويرده خلال وقت محدد
بالنسبة للكبار
** لو جينا استلفنا بلوزة أو جيب
أو بنطلون حتى لازم نرجعها نظيفة جداً جداً جداً
وأفضل أنكِ توديها المغسلة لو روحت لصاحبها بالمنظر ده
وهي متغلفة بيكون فيها نوع
من الامتنان والشكر لها
** لو حبينا نستعير كتاب أو مقال أو مجلة
في ناس بيكون بالنسبة لها الكتاب غالي لها فبالتالي
لازم المحافظة على الكتاب ونظافته وعدم كرمشة صفحاته
أو الكتابة عليها وممكن لو كده يتغلف حفاظاً عليه لما يرجع لصاحبه
** لو حاجة خاصة بالمطبخ لما نيجي نستعيرها أو ناخدها
زي طبق / معالق / صينية / شوك
ما تفضلش بقى عندنا للسنة الجاية ونسيبها لما حد يجي ياخدها والكلام ده
لا خلصنا غرضنا منها يبقى نرجعها على طول
** بالنسبة بقى يا قمرات للفلوس
ما تحاوليش تستلفي من الشخص أكثر من مرة ولو اتزنقتي أوووي
لازم تكوني رجعتي الفلوس الأولانية منعاً للإحراج ليكِ أنتِ
** مستحيل من أساس المستحيلات إعارة الذهب أو الفضة أو حاجة خاصة بالجواز
والكلام ده دي بتكون حاجات غالية ولو ضاعت بيبقى صعب أنكِ ترجعيها تاني
** لو إحنا استلفنا مثلاً حاجة من حد نعرفه
بيبقى شيء مش فيه ذوق لما نطلبه تاني بيكون غير لائق في الاتيكيت
** لو إحنا حابين مانديش حاجة لحد
نعتذر منه بطريقة لطيفة
معلش مش هقدر أديها عشان مش هتستحمل
معلش مثلاً هي مش موجودة
يعني بتكون بطريقة ذوق وشيك
ويا ريت يا بنات لما ناخد حاجة نرجعها بأسرع وقت ممكن
