وحشتونى حبيباتى
انهارده هقدملكم اكله جديده من مطبخى يارب تنول اعجابكم
صينيه السمك او صياديه
تعالو معايا عالمطبخ نشوف هنعملها ازاى
المقادير
1ك سمك ماكريل مفتوح سنجارى
2 حبة جزر مقطع حلقات رفيعه
بصله متوسطه متقطعه جوانح
2 حبة طماطم مقطعه جوانح برضه
2 حزمة كرفس
1/4 كوب زيت
3 ملاعق ك خل
راس ثوم مفرومه
5 فصوص ثوم متقطعه شرايح
2 حبة فلفل رومى مقطع شرايح
وممكن فلفل حامى (اختيارى)
2ليمونه كبيره
وليمونه مقطعه شرايح رفيعه
ملح / كمون/ بهارات السمك
او اى بهارات تحبيها عندك وممكن نضيف معلقه صغيره كركم عشان ناخد اكبر كمية فايده
الطريقه
اول حاجه هنغسل السمك ونصفيه من الميه كويس جدا
هنكون مجهزين الثوم المفروم وعليه الكمون
هنتبل السمك كويس بره وجوه ونسيبه على جمب
فى صينيه واسعه هنحط البصل والطماطم والفلفل والكرفس والجزر وشرايح الليمون وشرايح الثوم ونتبلهم كويس بالملح والفلفل
بعدها هنجيب السمك ونوسع مكانه ونحطه ونغطيه كويس جدا بالخضروات اللى فى الصينيه
هنحط الزيت والخل ونعصر الليمونتين كويس ونسيب السمك يشرب من التتبيله دى اقل حاجه ساعه
عشان هتلاقى كل الخضروات اللى فيه نزلت العصاره بتاعتها وكله شرب من بعضه وبقى تماااااااااام
زى الصوره كده
بعد كده هنحط الصينيه عالنار وعلى فكره مش بتاخد وقت خااااااالص حوالى ثلث ساعه بالكتير وهتلاقيها استوت
طبعا اللى تحب تسيبها زياده شويه عشان الخضار يستوى كويس مفيش مانع بس عشان ابقى دقيقه شويه انتى لما هتحطيها قى الشوايه الخضار هيتشوى كويس جدا عشان كده انا بحط السمك من تحت والخضار كله من فوق
اخر حاجه
هنغرف السمك مع الرز الاصفر الجميل ابو بصل
واكيد مش هنحتاج جمبه سلطه لانه ماليان بالخضار بتاع السلطه كله تقريبا
ممكن نقدم جمبه سلطة طحينه
وممكن نزين الطبق بشوية جمبرى
اللى هبقى انزلكو وصفته فى مره تانيه ان شاء الله
وده الشكل النهائى
يارب تكون وصفتى انهارده عجبتكو
والى لقاء اخر بأذن الله
شكلها شهى جداا
تسلم ايدك حبيبتى
ومبروك التكريم
تسلم ايديكِ يا احلى شيف
نورتونى