اخواتى وبناتى العدولات فى موضوع حابة اخد رأيكم فيه أنا بنتى مهندسة وكانت مخطوبة لمهندس لكن اتضح ان شخصيته غير متوافقة مع شخصيتها لانها اكتشفت بعض العيوب فى شخصيته ومن ضمنها عدم الالتزام … وتم فسخ الخطوبة … وفى ناس معارفنا جابوا لبنتى عريس محامى هم بيشكروا جدا فى اخلاقه وعيلته و شكله بصراحة هو وسيم ووشه مريح … المهم ان بنتى بمجرد ماعرفت انه محامى عارضت وبشدة وقالت انتم عايزنى اتجوز محامى ممكن يطلع الظالم والمجرم براءة بشطارته … انتم مش شايفين محامى مبارك والنظام بيعمل ايه عشان يطلعهم براءة ؟؟ ازاى انا ممكن اعيش مع واحد وانا عارفة انه فى يوم ظلم البرئ وطلع اللى ظالمه براءة أو طلع مجرم براءة وظلم الضحية لمجرد انه محامى اشطر من محامى الضحية ….. ثم ازاى اقبل انه يدخل على ولادى وبيتى فلوس حرام من القضايا دى ؟؟
المهم ياعدولات ان المشكلة مش فى بنتى ولا فى اننا انا ووالدها مش مقتنعين برأيها بالعكس احنا سايبين لها حرية اتخاذ القرار فى شريك حياتها لثقتنا فى اتزانها وعقلها وهى الحمدلله ملتزمة وبتعرف ربنا … كمان احنا مقتنعين برأيها ده … لكن المشكلة فى الناس اللى جابولها العريس هم لسة منتظرين الرد واحنا مش عارفين نبرر لهم عدم قبولها ازاى لانهم اذا عرفوا هيزعلوا جدا لانهم بيقولوا انهم مستخسرين ان العريس ده مايكونش من نصيبها لانه لقطة وفى نفس الوقت مستخسرين بنتى انها ماتكونش من نصيبه لانهم معجبين بشخصيتها وبيحبوها جدا وخصوصا ان العريس قريبهم … بس المشكلة احنا مش عارفين نجيب مبرر لعدم قبول العريس خصوصا انه مفيهوش عيب ممكن نتحجج بيه وفى نفس الوقت مش قادرين نقولهم المبرر الحقيقى خوفا على مشاعرهم لان العريس قريبهم وكمان خوفا على مشاعر العريس عشان كدة انا حاسة اننا فى ورطة ومش عارفين نبرر الموقف ازاى … معلش ممكن تساعدونى بالرأى وبسرعة لانهم بيلحوا على الرد لاننا اتأخرنا عليهم شوية … اعذرونى لو هتعبكم معايا لكن انا محتاجة لأرائكم فعلا … وشاكرة لكل اللى هتشاركنى … ومش عايزة اى عضوة يكون عندها حد محامى تزعل منى لانها وجهات نظر .
الحلو والوحش ياريت قبل قرار تعمل استخاره وبكده الموضوع اتحسم
لانها استعانت بالله والقرار يكون من ربنا عز وجل وربنا يهدينا جميعا
لما يحبه ويرضاه
بالنسبه للمشكله
المفروض بما انها مش مقتنعه بيه خلاص
الموضوع مش بالعافيه
قولى لهم مافيش نصيب
ان البنت مش حابه تتجوز دلوقتى
انها تعبانه نفسيا بسبب الوضع عندكم وماجله الموضوع شوى
او لو تقدرى خليهم هم يكلموها
يمكن هم يقنعوها بيه وبالجواز منه
يمكن هم يقنعوها بغلط تفكيرها
مش كل محامى حرامى ولا كل قاضى ظالم
حرام النظره الشموليه دى
ليه هى ما تقبله وتشجعه يكون انسان نزيه احسن من غيره
طب ليه ماتخليها تقابله وتقعد معاه تفهم وضعه
زى مافهمت منك انها انسانه واعيه وزكيه
اكيد هى بتميز الانسان الكويس من غيره
خليها تقعد معاه وتتكلم معاه وتفهمه
خير الكلام ما قل ودل
ما فيش نصيب لان ما فيش قبول
ربنا يبارك لكم فيها ويحفظها ويرزقها بابن الحلال اللى يستاهلها
هى مشكلة طبعا بس ممكن تقولى لهم ان بنتى عملت صلاة استخارة ولم تجد فى نفسها قبولا
وكل شىء قسمة ونصيب
وهذا الأمر متروك لقناعتها فلا تحاولي التأثير عليها وقولي مفيش نصيب وربنا يوفقها ان شاء الله