انهارده انا عازماكو على حلة محشى كرنب انما ايييييييييه جنااااااااان والله
اتفضلو معايا عالمطبخ نشوف هنعملها ازاى
المقادير
كرنبه متوسطة
1 ك رز مصرى
2 حبة فلفل رومى
4 حزم خضره مشكله (شبت -بقدونس-كزبره)
2 بصله كبيره
كيلو ونص طماطم
ملح – فلفل-بهارات-كمون
معلقتين صلصه كبيره
معلقه صغيره نعناع مجفف
الطريقه
اول خطوه هتسلقى الكرنبه فى ميه بتغلى عالنار فيها معلقة ملح ومعلقة كمون خشن
تانى حاجه هتقطعى البصل او تفرميه وعالنار تحطى زيت كتير شويه وتفضلى تقلبى فى البصل لحد ما يصفر معاكى شويتين يعنى وسط متحرقيهوش
بعد كده هتضربى الطماطم فى الخلاط وتحطيها على البصله وتسيبيها تغلى وبمجرد ما تغلى تحطى الملح والفلفل والبهارات واهم حاااااااااااجه هو الكمون تحطى منه زياده حبتين وبعد كده تحطى الصلصه وتقلبى واول ما تتسبك كويس تحطى معلقة النعناع و تكونى غسلتى الرز وصفتيه فى المصفاه
تحطيه عالخلطه وتقلبيه كويس جدا لحد ما يسخن و يتشرب من الخلطه بعدها هتطفى النار تكونى مقطعه الخضره هتحطيها وتقلبيها(فى ناس بتحط الخضره عالصلصه وهيا بتتسبك بس الطريقه اللى بقولك عليها بتحافظ على طعم الخضره ولونها)
وبتبقى بالشكل ده
فى خطوه شفت حماتى بتعملها وعملتها زيها ولاقيتها طعمها حلو فعلا
بعد ما تخلصى الخلطه وقبل الحشو هتقطعى بصله متوسطه عليها وتقلبيها كويس زى كده تمام
نيجى للتسويه
هتجيبى الحله اللى هتحشى فيها وهتحطى فيها من تحت طماطم وبصل متقطعين حلقات
بعد كده هتقطعى ورق الكرنب مستطيلات او مربعات بالمقاس اللى تحبيه وتبتدى تحشى وترصيه فى الحله
هتكونى محضره عندك شوربه سخننننننننه تسقى بيها المحشى وطبعا تكونى حاطه فيها البهارات والملح والفلفل والحبهان وبصل مبشور وطماطم وجزر مبشورين ومعلقة صلصه وممكن مكعب مرقه لو بتحبيها (انا بفضل احط بدالها توابل الفراخ اضمن )
هتسقى المحشى لحد ما توصلى لاول صف كرنب فى الحله يعنى الشوربه تغطى المحشى زى الرز كده بس حاجه بسيطه مش قوى
وتسيبيه يغلى على نار عاليه لحد ما تلاقى الشوربه نقصت هتهدى النار وتسيبيه لحد ما يستوى
ودى الصور
بس اللى جعانه بلاش تتفرج هتجوع اكتر
قدمته مع اللفت المخلل
الشكل النهائى للتقديم
وبالهنا والشفا على قلبك
يارب تكون اكلتى انهارده عجبتكم وربنا يجعلنى مجوعاكو دايماااااااااا
يلا اسيبكم فى رعاية الله
تسلم ايدك يا شيف
مبروك التكريم
تسلمى حبيبتى