اذيكم يا عدولات انا اول مرة اكتب ودة اول موضوع
لياهبدا بالسلطة لان دة اساس موضوعي
السلطة دى انا بموووووووت فيها …ومفيش حد عملتهالو وداقها الا اما عجبتو اوى……ان شاء الله انتو كمان تجربوها وتقولولى رأيكو
( 3 بطاطس + 3 باذنجان + 1 بصلة + رغيفين عيش + حمص + بقدونس + 4 كوب زبادى + طحينة + ثوم + خل + ليمون + ملح + فلفل اسمر + شطة )
دى المقادير اللى انا عملت بيها…..ممكن تقللى او تزودى براحتك على حسب عدد الاشخاص….المقادير دى تعمل طبق كبير يكفى من 3 ل 4 اشخاص
طبعا الحمص زى اى بقوليات بتبقى ناقعاه من قبلها بيوم فى مياه….وهتبدأى بيه اول حاجة…..هتحطيه فى مياه وعلى النار يتسلق….وسيبيه لحد ماتخلصى كل حاجة تقريبا عشان يبقا مستوى اوى
وبعدين هتقلى البطاطس والباذنجان والعيش
هتفرمى البصلة فى الكبه وتعصريها بايدك فى طبق وتركنى مية البصل دى على جنب
وتاخدى تفل البصل فى طبق تانى وتحطى عليه خل وليمون ورشة ملح خفيفة وفلفل اسمر وشطة لو تحبى
هتجيبى طبق التقديم ولازم يبقا غويط شوية….وتحطى فيه البطاطس وبعدين الباذنجان وبعدين البصل
هتعملى بعد كده الصوص اللى هيتحط فوق الوش وهو عبارة عن طحينة تخففيها بمياه دافية…بس ماتخليهاش خفيفة اوى….يبقا تقلها حلو
وتحطى عليها توم وليمون وشوية خل وملح وفلفل اسمر وشطة ( كأنها سلطة طحينة بالظبط) ….وبعدين تحطى عليهم الزبادى
بعد كده تحطى العيش على البطاطس والباذنجان ….. وتصبى عليهم الصوص ده ( بس خلى باااااااااااااااااااااالك )
ماتحطيش الصوص على العيش غير قبل التقديم على طووووووووووول…لأنه لو حطتيه قبلها بفترة العيش هيطرى وهيبقا طعمه مش حلو….هو
حلاوته انه يقرمش….بعد العيش وفوقيه الصوص هترشى الحمص المسلوق على الوش وشوية بقدونس
انا عملت جنب السلطة دى كفتة….لأن السلطة دى لوحدها تعتبر وجبة…فعملت حاجة تعتبر مش تقيلة اوى
( لحمة مفرومة + مية بصل + صويا صوص + مستردة + ملح + فلفل اسمر + بصل باودر + ثوم باودر + بهارات + زعتر + زيت زيتون )
هتحطى كل المقادير على اللحمة المفرومة ( مية البصل دى اللى شيلناها من بصل السلطة فاكريييييين )….وتصبعي الكفتة وتحطيها فى صينية فيها شوية زيت زيتون وتحطى شوية مياه فى الصينية مع رشة بهارات كده عالوش وشوية زعتر وتغطيها تخليها تغلى على البوتاجاز 10 دقايق كده
وبعدين تغطى الصينية بورق فويل وتدخليها الفرن…..ربع ساعة وتطلعيها…..تكونى حاطة حتة فحم على البوتاجاز لحد ماتحمر وتحطيها فى ورقة فويل صغيرة وتحطيها فى وسط الصينية وتصبى على الفحمة شوية زيت وتغطى الصينية بسرعة لحد ما الدخان كله يخلص
كدة بقا بالهنا والشفا 