ازيكم ياعدولات كل عام وانتم بخير
بصراحة حبيت أفضفض معاكم لانى مخنوقة من نفسي كتيييييييير
زي مالغالبية عارفين انى مريت بأيام صعبة جدا بعد ولادتى ببنتي مايا السنة اللي فاتت وحملت بعدها علطول بأربعة شهور وكان حملى كتير صعب وولادتى أصعب ومريت بأسبوع صعب جدا وبنتي بالحضان وأنا براقب كل مرحلة بنتي بتمر بيها جوا الحضان
المهم أنا دلوقتى عصبية جدا جدا لدرجة لا تتخيلوها مع بنتي الكبيرة كنزي وماما قالت ان بقيت باردة بمشاعري مش عايزة أقولكم ان الكلمة جرحتنى قد ايه لكن على قد ماهيا جرحتنى لكن أنا حاسة ان فيا حاجة غلط مافيش أى مشاعر حاسة بيها خالص غير انى مكتئبة
ومش مركزة خالص وماعنديش أى طاقة ولا قادرة أعمل أى مجهود طبعا أنا عارفة انى بمر بحالة اكتئاب وخصوصا انى مريت بيه بعد ولاداتى الاتنين بس في بنتي كنزى قعد معايا كتير لانى ماكنتش أعرف ان اللي بمر بيه هو الاكتئاب كنت مخلية حياة اللي حواليا زى الجحيم بالضبط ورحت لدكتور نفساني واتعالجت عنده شهور طويلة ومش عايزة أقولكم انها كانت أسوأ شهور عدت عليا لان الأدوية المضادة للاكتئاب صعبة جدا وبتخلى الواحدة منعزلة عن دنيتها تماما وكانت مخليانى دايما نايمة أو ان حاولت أفضل صاحية ببقي مش موجودة معاهم خالص وعلطول تايهه المهم بطلت الأدوية دي من نفسي بالرغم من الدوية دي لازم بتسحبيها من الجسم بطريقة معينة عشان ماتحسيش بأعراض الانسحاب لكن ربنا قدرني لان كان عندى ارادة وبعدها بقيت أفضل
المهم أنا دلوقتى حاسة بنفس الأعراض وأنا دلوقتى خلاص عديت 40 يوم بعد ولادتى لكن الأعراض ماتحسنتش ولا حاجة وبقيت كتيييييرة النسيان ومش قادرة أركز وفي منتهى العصبية وبقيت حساسة من أى حاجة بزيادة أنا على فكرة بحاول مع نفسي كتير لكن الضغط اللي كان عليا بصراحة كان جامد جدا الفترة الأخيرة يمكن بدخل المدونة هنا وبحاول أسيطر علي نفسي لكن حاسة ان مافيش فايدة ومش عايزة أدخل في متاهات الدكاترة تانى وخصوصا ان اكتئاب بيظهر كمان بأعراض جسمانية عندى ومش عايزة جوزى يرجع من شغله يلاقيني بالشكل ده لانى بحاول بقدر الامكان في التليفون أدراى عليه حالتى لكن لما ييجي مش حاقدر أصمد قدامه كتير علي فكرة أنا بصلي وبقرأ قرآن وبدعي ربنا كتير لكن الموضوع مسيطر عليا جدا ان كان في عدولة مرت بحالة اكتئاب مابعد الولادة ومتكررة ياريت تفيدنى أتصرف ازاى؟
السلام عليكم ورحمة الله وبركاته
الله معالكي
شكرا ياقمر
ربنا يفرج همك يا قمر ويحل على قلبك السعاده والفرح
تسلمي يافراولة
والله يا مايا انا حاسه بيكى لأن الحاله دى جاتلى بعد ما ولادت عدول ابنى بس حاولت انى اسيطر على نفسى علشان مخسرش اللى حوليا وبعدين يا حبيبتى كنزى ملهاش ذنب فى كل ده ولإنها طفله مبتعرفش حاجه ممكن قوى تكرهك او تحس انك مش بتحبيها فالازم تاخدى بالك منها كويس و بالنسبه لحالة الأكتئاب فانتى حاولى متقعديش تقولى انا مكتئبه كل شويه لأنك كده هاتكتئبى اكتر صدقينى حاولى تاخدي كنزى و باباها وتفسحوا و شغلى نفسك بأى حاجه و أم بنتك التانيه فإنشاء الله بكره تطلع وتبقى فى حضنك و متزعليش منى حاولى تحسى بالنعمه اللى انتى فيها لإن فى بنات كتيييييييييير نفسها فى النعمه دى الا و هى الزوج و الاولاد