متابعين مطبخ نفرتيتي العزيزات وحشتوني
انهاردا محضرالكم حلقتين عشان ليا اسبوعين مش نزلت حلقات
هنزلكم حلقة حلو وحلقة مالح
أكلة انهاردا هي
((برياني الفراخ مع سلطة باباغنوج بالمايونيز))
2كوب ارز بسمتي
2كوب شوربة او ميه
4قطع فراخ
3 حبات طماطم
1 حبة بصل
1 حبة جزر
معلقة صلصة طماطم
بهارات برياني(معلقتين)وملح
زيت
1-اول حاجة هنعملها نسوي الارز نص تسوية هو بيحتاج ضغف الكمية شوربة احنا هنحط النص يعني 2كوب ارز هنضيفلهم 2 كوب ميه مش 4
نسخن الشوربة او المية ونضيف شوية زيت ونحط الارز ولما يغلي نهدي النار ونغطية.
2-في طبق غويط هنحط الفراخ ونضيف لها الطماطم بعد مانشيل القشرة ونقطعها مكعبات ونضيف الصلصة والبهارات والجزر المبشور ونقلبهم كويس.
3-في حلة نسخن شوية زيت ونقطع البصل مكعبات صغيرة ونقلبهم لحد مايدبل شوية وبعد نضيف الفراخ بالخلطة ونقلبها ونغطيها لحد ماتستوي.
4-في حلة نحط ثلث كمية الارز ونرص فوقة قطع الفراخ وشوية من الخلطة
ونحط عليها ثلث كمية الارز التانية وفوقها طبقة فراخ بالخلطة واخر طبقة نحط باقي الارز والخلطة
ونحط الحلة على نار هادية لمدة ربع ساعه ونطلعه نقدمة بالهناء والشفاء.
((سلطة بابا غنوج بالمايونيز))
شوفو بقي انا هنا ماعنديش طحينة وقررت اعمل بابا غنوج بالمايونيز قلت اجربة وانا وحظي يانجح يافشل
بس بصراحة جربتة ولقيتة احلى من الي بالطحينة وبنفس الطريقة
باذنجان مشوي
2 معلقة مايونيز
بهارات وملح حسب الرغبة
بقدونس-فص توم مبشور او مفروم
نقشر الباذنجان ونهرسة بالشوكة مع الثوم والمايونيز والبهارات وبس
ونقدمهم مع سلطة خضراء
اتمنى الاكلات تكون عجبتكم
مستنية رأيكم وتعليقاتكم
مع السلامة واشوفكم في حلقة جديدة الاسبوع الجاي ان شاء الله
جزاك الله خيرا