ازيكم يا عدولات
كل سنة وانتم طيبين وعيد سعيد عليكم جميعا
طبعا كلنا قبل العيد دايما بيكون موسم التنظيف الرهييب
كلنا بنشتري منظفات و كيماويات و كلور وغيره و برده مش بناخد النتيجه اللي عاوزينها
لكن انا النهاردة جبتلكم من الاخر
الوصفة دي انا بعملها كل سنة و الحمد لله الكل بيطلبها مني دلوقتي
وصفة تنظيف رخيصة و طبيعية و كمان معقمة
يعني
نظافة و توفير و تعقيم كمان
نشوف الوصفة مع بعض
المكونات:
صابون سائل اخضر (بريل او عادي )
خل ابيض
ملح ليمون (من العطار)
كربونات الصوديوم (من العطار)
سلك مواعين او ليفة خشنة
جوانتي (ضروري)
الطريقة :
نجيب طبق عميق (لازم) نحط كمية من الصابون كوبين مثلا
و نحط عليهم كوب خل ابيض
و نحط 4 معالق ملح ليمون و نقلب كويس لحد ما يدوب الملح
الثلاث مكونات دول ممكن ننضف بيهم الثلاجة و المواعين هتنضفها و تعقمها
و نحط 2 ملعقة بيكربونات الصوديوم و نقلب هنلاقي الخلطة بتفور و بتعمل رغوة جامده
الرغوة دي قوية جدا
ناخد الرغوة بالمعلقة و نحطها علي اي حاجه صعبة لمده 10 دقائق و بعدين ندعك بالسلك هنلاقي الحاجه رجعت جديدة
الرغوة ممكن نستخدمها مع :
البوتجاز و الدهون اللي عليه
الشفاط
الحوائط السيراميك (سواء المطبخ او الحمام )
الاستانلس بتاع الحنفيات
الرغوة قوية جدا مع الدهون بتسيحها بسرعة لو الرغوة خلصت زودي الصابون والخل و حطي كربونات تاني و قلبي هتفور تاني
لو حابة تزودي قوة الرغوة اكتر زودي الخلطة بمياه سخنة
حطي الرغوة وسيبيها شويه علي اي حاجه و بعدين ادعكي بالسلك او الليفه علي خفيف
و اهم حاجه اشطفي بسرعة عشان الصابون بينشف علي الحائط بسرعة و صعب ازاله البقعه بتاعته
ضروووووووووووووري جدا
تلبسي جوانتي و انتي بتعملي الخلطة و بتستخدميها لانها بتقشر اليد بسبب الكربوناتو لانها مقشر للجلد سريع
جربيها علي ضمانتي
تكلفتها مش غالية خالص
الصابون السائل معروف سعره
بجيب ب 5 جنيه ملح و اسيبه عندي بيكفي فترة طويلة
و بجيب ب 5 جنيه كربونات برده
يعني الاجمالي مش كبير اوي
جربيها مش هتندمي
و ادعيلي بقي 
|
تسلمي يا قمر
نورتي
جربيها وقوليلي رأيك
نورتوا الموضوع ^^