عملت من يومين حاجة جديدة وهى عيش السرايا ودى وصفة تركية الأصل وكانت بتتعمل في سرايات الباشوات ومن هنا جه الاسم لانها بتعتمد على العيش وزى ماقلت مالييش بتاتا في الحلويات
لكن والحمد لله طلعت جميلة وكله ببركة الله طبعا
سميت الله وحضرت مقاديرى نشوف بس صورة تشويقية كده مع بعض
جميلة مش كده
نبطل رغي وندخل في المضمون مش عارفة بقيت رغاية قوي كده ليه باين حوشت الكلام طول الفترة اللى ماكنتش بدخل فيها
يوووووووه رغيت تانى
مقاديري هي
كيس عيش توست
1 كوب ونص سكر
كوب ماء
2 كوب حليب
4 ملعقة نشا كبيرة
2 ملعقة كبيرة قشطة
2 ملعقة ماء ورد
فانيليا سائلة
آدى العيش
قطعت أطرافه
قطعته مكعبات
وتكونى مسخنة الفرن وتحطيه في صينية
وتديله لون ذهبي وتحمصيه اوعي يتحرق منك مش بياخد وقت
وبعدين تفرفتيه بايدك
السكر اللى عندك حتاخدى منه نص كوب وتعمليه كراميل عشان تلونى الشربات
والباقي شربات
حطى السكر والماية عالنار مع التقليب علي نار متوسطة عشان مايتحرقش منك لحد ماياخد لون حلو
في نفس الوقت اعملى الشربات حطى باقي السكر وكوب ماء مع عصرة ليمون وفانيليا أو ماء ورد
أول مايغلي ارفعيه من عالنار وحطي الكاراميل حاذري كويس لانه بيفور
أنا نبهت اهو عشان ماتجيش عدولة وتقولى لا قدر الله أنا اتحرقت
وده بيبقي لونه
طبعا بتحطى الكاراميل مع التقليب المستمر بالويسك
بعدين ياعدولة حطيه على فتات العيش وقلبي بالملعقة كويس
وحطى جزء في الصينية مقاس 22 والباقي افرديه على ورق زبدة أو أى حاجة تكون مقاس صينيتك
أنا فردتها على كيس تلاجة
حضري الحشوة
نقلب النشا في الحليب وضعى القدر عالنار وضيفي القشطة وماء الورد والفانيليا مع استمرار التقليب لحد مايغلظ قوامها وضعيها على الطبقة الأولى
نيجي بقي للخطوة دي لانى كنت قلقانة منها جدا ومش عارفة أعملها
اقلبي بمنتهى الحذر الطبقة الأخيرة على الحشوة
وربنا سترها معايا طبعا حطيت الحشوة بكيس التلاجة على غطا العلبة الصاج دى عشان تبقي متماسكة وقلبتها بخفة ايد
والحمد لله ظبطت معايا
وزينتها بجوز هند وزبيب
ممكن تزينيها زى مانتى عايزة
حطيها في الثلاجة وقدميها
بصي طبقاتها حلوة ازاى؟
يارب عيش السرايا يعجبكم وتجربوه
التقييم وانتى خارجة في ايدك لو سمحتى
عشان اديكي حتة منها
رائع يا شيف الله ينور
|
تسلميلي حبيبتي
|
ونورتيني طبعا
|
والله انتى اللى عسل يازوزتى وميرسي للتقييم حابعتلك صينية مش حتة على البيت قوليلي العنوان بالضبط وأنا أبعتلك صينية من عيونى
|
نورتيني ياقمرتى