مكرونة نجرسكو من مطبخ مايا علي,أكلات رئيسية 2024

ازيكم ياأحلى عدولات
بقدم ليكم طريقتى في المكرونة النجرسكو ويارب تعجبكم
مقاديرى
1/2 كجم فراخ بانيه
5 حبات مشروم
2 بصلة متوسطة
بهارات فراخ
ملح فلفل أسود زعتر
3/4 كجم مكرونة أقلام
البشاميل:
2كوب لبن
1 كوب مرقة
6 ملاعق كبيرة دقيق
6 ملاعق كبيرة سمن أو زبدة
ملح فلفل
بيضة

الطريقة
حنسلق المكرونة طبعا
حنجهز الفراخ نقطعها ونحط عليها التوابل بتاعتنا
افرمى البصل فرم خشن
حطيه عالنار في زيت وذبليه وبعدين حطى الفراخ المقطعة والمشروم
قلبيها وسيبيها تستوى
في نفس الوقت جهزى البشاميل
حطى الزبدة أو السمن وبعدين حطى الدقيق ونحمصه وبعدين حطى اللبن البارد أو الدافئ وعليه المرقة وقلبي بالمضرب بسرعة عشان مايكلكعش منك
لحد مايبقي زى الصوص التقيل شوي
برديه شوية وحطى عليه بيضة بنترة ملح وفلفل أسود وقلبي بسرعة برضه
كده جهزنا مقاديرنا نبدأ نجهز القالب للمكرونة ادهنيه بمادة دهنية
حطى عالمكرونة بشاميل ويكون كافى عشان المكرونة ماتتفككش مننا
حطى قليل من البشاميل وبعدين نص المكرونة وساويها وبعدين حطى الفراخ بتاعتك وبعدين باقي المكرونة وبعدين البشاميل
طبعا تكونى شغلتى الفرن وانتى بتجهزى عشان يسخن كويس
حطى الرف السلك في الوسط
دخلى القالب وسيبيه لما يستوى
طلعى المكرونة وسيبيها تبرد كويس عشان تعرفى تقطعيها
ماشي ياحلوين
اسيبكم مع الصور