تعملى ايه عشان تساعدى نفسك وتساعدى النونو وكمان تستعدى ازاى
من اول الشهر التاسع لازم يكون ليكى روتين يومى فى المشي يعنى لازم تسبتى ساعتين فى اليوم ع الاقل للمشي
ثانيا لااااااااااااااااااااااازم ولابد ال( احم احم )يبقى يوميا وده مش كلامى ده كلام الدكاترة لان الموضوع ده قصدى ال ( احم احم ) بيساعد ان الرحم يفتح
ثالثا والنقطة دى مهمة جدا ايون مهمة وهى انك تاكلى تمر كتييييييير يعنى كل يوم تاكلى 7 تمرات سنة عن سيد الخلق وده ليه …………..
عشان الابحاث اثبتت ان اكل التمر خلال الشهر التاسع بيسهل عملية الولاده
يعنى انتى كده فى الحالتين مستفيده ……….
بتاخدى حسنات من تطبيقك سنة من سنن سيدنا محمد وكمان بتساعدى نفسك عشان الولاده
مشيتى ع الخطوات دى
تعملى حاجة مهمة جداوبقول جدااااااا
لازم تقرري انت ها تولدى فين
والموضوع ده ليه معايييييييير يعنى مش اى مكان والسلام
لازم المكان اللى ها تولدى فيه تتحرى فيه الاتى
لازم يكون فيه حضانة عشان لاقدر الله لو احتاجها البيبي ماتجوش ساعة الولاده وتحتاسواوتجروا تدوروا على حضانة
ثانيا لازم يكون فيه استعدادات لاى مشكلة تحصل وربنا ان شاء الله ما يجبش مشاكل يعنى مثلا يكون فيه عناية مركزة
وانا بقول كده عشان نعمل اللى علينا
ونعقلها ونتوكل
خلاص لقيتى المكان و قررتى ها تولدى فين واستقريتى ع المستشفى
تعالى اقولك تحطى ايه فى الشنطة بتاعتك وانتى ماشية والشنطة دى تكونى مجهزاها من اول الشهر التاسع
لان انتى مش عارفة ها تولدى امتى لان الطلق زى الحرااااامى بيييجى فى اى وقت
الشنطة معاكى فى ايدك
تحطى فيها ايه……….. اول حاجة حاجة البيبي
وحاجة البيبي عباره عن فانلة ,جلابية بيبي من اللى بتتفتح من الضهر او سالوبيت, باكيت بامبرز
بنطلونات بيبي , كوفرتة لو فى الصيف بطانية لو فى الشتا , ببرونة , علبة لبن بودرة تحسبا لاى ظرف ,زيت زنك اوليف , وكمان قطرة كلورامفينيكول ودى كده كده الدكتور لازم بيكتبها للطفل او ما بينزل
اخر حاجة المناديل المبللة وكده تبقى حاجة البيبي كملت
نيجى بقى للحاجة بتاعتك
ودى ياستى ما تقلش اهمية عن حاجة البيبي
تاخدى ايه بقى معاكى فى الشنطة
اول حاجة فوطة , بشكير كبير , تاخدى شبشب ايوه شبشب لان الواحده لو ولدت قيصري بيطلبوا منها تتمشى كتيييييييييير فى المستشفى وطبعا مش ها تتمشي بالشوز
تاخدى معاكى كلونيا اى نوع ويستحسن تكون فا
وتاخدى معاكى الشامبو والشاور جيل بتوعك وتاخدى فرشة شعر
وتاخدى معاكى باكيت اولويز او اى نوع انتى بتفضليه
وكمان تاخدى روب عشان تحطيه على اكتافك وانتى بتتمشي فى المستشفى
تاخدى معاكى كمان حاجة تلبسيها فى المستشفى بعد الولاده يعنى مثلا جلابية بيت تكون حشمة تاخدى لبس غير اللى انتى كنتى رايحة فيه يكون سهل فى لبسو
لان بعد الولاده حركتك بتبقى صعبة خصوصا لو والده قيصري
يعنى تاخدى مثلا جلباب او عباية سهلين فى لبسهم
عشان ما تبذليش مجهود فى اللبس
وكمان ما تنسيش تاخدى طرحة تسترى بيها شعرك
خلاص حاجتك جهزت ……………استنى بقى
اه استنى انا قصدى استنى ميعاد الولاده
حسيتى بالطلق
وخلاص مش قادرة من الوجع تعالى اقولك على خطوة مهمه
وهى ايه الخطوة دى
انك تعملى كوباية حلبة وتحلليها بالعسل وتحطى عليها نص قزازة زيت خروع من الصيدلية مش اللى عند العطار الصيدلية اضمن
سامعة واحده بتقول يييييييييعععععععععععععععع
والله الخطوة دى مهمة جدا لانها بتسهل الطلق وكمان تعتبر بديل عن الحقنة الشرجية اللى بتتعملك فى المستشفى وعايزة اوضح ليه بتاخدى شربة الخروع او ليه بيعملولك حقنة شرجية الشربة انتو عارفين انها بتغسل الامعاء يعنى بتسهل المواضيع بشكل مذهل وليه محتاجاها
لان ليها فايدتين اول فايده انها بتحمى الطلق تانى فايده انها بتغنيكى عن الحقنة الشرجية زى ما قولتلك
بس ليه بتعملى حقنة شرجية
عشان الامعاء تبقى فاضية تماما وانتى بتولدى عشان ممكن ساعة الولادة والحزق تنزل منك حاجات غصب عنك لان عضلات جسمك بيبقى صعب التحكم فيها
وبتبقى عملية محرجة جدا لو حصل حاجة زى كده
فا انتى بتقومى بعملية كنس للامعاء فهمتييينى ولا لا
تعملى ايه بقى عشان تقدرى تشربيها
تروحى جايبة الكوباية بتاعت الحلبة اللى عليها عسل وزيت خروع وتروحى ساده مناخيرك ورفعاها على بوق سيادتك ويالا هوباااااا على بوق واحد
عارفة طعمها فظيع بس معلش هى بتتشرب يعنى كام مرة فى العمر
شربتى الخروع اتكلى ياللا ع المستشفى انتى زوجك واللى عايزة تاخديهم معاكى وربنا يقومك بالف سلامة
نورتى ياجميلة