ازيكم ياعدولات
وحشتونى قوى قوي
ياترى عاملين ايه في غيابي ؟
وحشتكم ولا لأه؟
أنا عارفة انى وحشتكم لانكم وحشتونى جدا جدا وافتقدت وجودكم ووجودى في عدلات لكن الظروف اعذرونى…
مش حطول عليكم
جيتلكم النهاردة بوصفة جديدة عملتها من فترة طبعا
لكن حتعجبكم جدا
أكلت حيحبوها الكبار والصغار كمان
مين فينا موش بيحب الشاورما ومين فينا موش بيحب البطاطس
أكيد كلنا بنحبهم لكن أكلتى النهاردة حتجمع بين الشاورما والبطاطس المهروسة اللي حتكون على هيئة كرات سعيدة بوجودها مع الشاورما
ندخل في المفيد بقي وكفاياي رغي لانكم أكيد مليتوا من رغيي
النهاردة حقدم صينية شاورما الفراخ بكرات البطاطس
مقاديرنا مافهاش أى تعقيد وطبعا كلها موجودة في مطبخنا الحلو
1/2 ك فراخ بانيه
4 ملاعق سمن
فلفل أسود بهار شاورما
1 بصلة كبيرة مقطعة جوانح
مقادير خليط البطاطس
6 فصوص ثوم مهروس
4 بطاطس مسلوقة
ملح فلفل أسود
4 ملاعق جبنة رومى
مقادير البشاميل
4 ملاعق زيت
2 ملعقة زبدة
6 ملاعق دقيق
3 كوب لبن
ملح
نشوف مع بعض الطريقة
أول حاجة سخنى فرنك على درجة حرارة متوسطة وثبتى الرف الشبكى في الوسط
حضرى الشاورما في قلاية واسعة حطى ملعقة سمنة وضيفي صدور الفراخ اللي قطعتيها بالطول وتبلتيها بالملح والفلفل الأسود وبهارات الشاورما وقلبي لحد ماتجف ماؤها وضعيها بطبق الفرن
في نفس القلاية ضعى البصل والثوم وقلبي لحد مايبقي اللون ذهبى ووزعيه فوق الشاورما
جهزنا الشاورما كده نجهز البطاطس بقي بعد مسلقناها وقشرناها اهرسيها بالهراسة وضيفي الملح والفلفل والثوم والجبنة والزبدة والحليب واخلطيهم كويس قوى
بعد مالقيتيها بقت عجينة ناعمة ومتماسكة شكليها علي هيئة كرات متوسطة الحجم وحطيها متلاصقة فوق الشاورما
حضرى بشاميلك: في حلة متوسطة حطى الزيت والزبدة والدقيقي وقلبي بالمضرب اليدوي ضرورى المضرب ده يابنت ياللى لسه بتتعلموا لانه بيساعد انه مايبقاش فيه كلكعة وبتكون ليها قوام كريمي حلو
المهم نرجع لكلامنا بعد ماقلبنا بالمضرب وبقي الدقيق ذهبى فاتح ننزل باللبن بالتدريج لحد مايبقي القوام كريمي زي ماقلت وخليها سميكة شوية عشان لما تحطيها علي البطاطس والشاورما وظبطي الملح كويس
ضيفي البشاميل في طبق الفرن ووزعى الجبنة على الوجه ويدخل الطبق لمدة 30 دقيقة لحد لونها مايبقي ذهبى وسيبيه يبرد وبعدين قدميه
شوفي الصور كده معلش فيه صور اتمسحت وتعبت لما جبت الصور الباقية
وده كان فاضلي كمية من البطاطس كورتها وحطيتها في بيض وفتات خبز وحمرتها
يارب وصفة اليوم تعجبكم ياقمراتى
مع تحياتى مايا علي
ثانيا تسلم ايدك على الوصفة الجميلة
