السلام عليكن ورحمه الله وبركاته
مساء الخيرات عليكن جميعا
للباذنجان وصفات لا تنتهي وهو اكله بيحبها كل الشعب المصري واكله شعبية موجوده بكل المحلات
مقادير طريقتنا النهارده:-
1 ثمرة باذنجان رومي كبيرة
2 فص توم مفروم
2 ثمرة طماطم وسط
طبعا اكيد معانا ثمرة متوسطة من الفلفل الرومي
معلقتين خل
ممكن فلفل حامي لو بتحبيه او شطه بودر
بس كده دي مقاديرنا سهله صح؟
ندخل علي الطريقة:-
*طبعا احنا بنقطع الباذنجان حلقات ونسيبه شوية في حبه ميه وملح عشان يدبل وينزل ميته وميشربش زيت واحنا بنقليه
*وعلي ماهو يدبل نكون احنا قطعنا الطماطم والفلفل الرومي زي مابنعمل السلطة كده
*بعد كده نبدا نحط معلقتين زيت عشان نقلي فصين التوم
بس يصفر خفيف كده ننزل عليه بالطماطم ورشة ملح تساعد علي ان الطماطم تنزل ميتها وبعدها ننزل بالفلفل الرومي الي قطعناه صغير
ونوطي النار ونسيبهم يتسبكو مع بعض شوية
*علي مانقلي الباذنجان نطلعه لونة مش غامق اوي عشان هنسيبه يكمل سواه في الخلطة دي
نطلعه علي ورق مناديل المطبخ
*بعد كده ننزلة واحدة واحدة علي الخلطة ونرش عليه معلقتين الخل ونحط الشطة برضه في الاخرونسيبه ياخد من طعم الخلطة يعني بالكتير 10 دقايق واحنا مهديين النار
ودي صورة ليها بعدما غرفتها
كده انا خلصت الوصفة جربوها وان شاء الله تعجبكو
ومتبخلوش عليا بتقيماتكو لو الوصفة عجبتكو
في امان الله
