[/IMG]
اول مرة اشارك في قسم الطبخ وعشمانة منكم تشجعوني وتقولولي رأيكم بصراحة
احكيلكم بئه انا كنت في يوم كده زهقانة ودخل علينا العصر ومكنتش طبخت اي حاجة
بس خطر في بالي فكرة ام العريفام العريفكده وقولت يارب تنجح وربنا مايكسفنيش ادام جوزي
كان عندي علبة كورندبيف اللي هي زي البيف كده بس انضف واغلي شوية بس طعمها احلي بكتير جوزي كان جايبها قبلها بيوم للعشا وبيض وشوية حاجات كده
وقولت يعني هنتغدي زي مااتعشينا معجبنيش الموضوع بصراحة وطلبت معايا تجديد
وكان فاضل بيضة واحدة عندي من العشا وقولت هقضيها من الموجود النهاردة يعني هقضيها وقفلت وتربست علي كده
نيجي للمفيد انا عارفة بتقولو عليا رغاية من غير زء انا هدخل اهو في الموضوع
نصلي علي النبي الاول كده مش سامعاكي ياعدوله صلي علي اللي هيشفع فيكي يوم القيامةيارب
اولا المقادير انا خليتها بالبركة بس المكونات اللي استخدمتها :-
مكرونة فرن او الصغننة العادية
علبة الكورندبيف
بيضة او اتنين المتاح انا مكنش عندي غير بيضة بصراحة فمشيت نفسي بيها
صلصة جاهزة او طماطم متسبكة انا استخدمت الطماطم المتسبكة
ملح
فلفل اسمر
زعتر
شطة حسب الرغبة طبعا وممكن تكون قرون فلفل اخضر حامي بتدي طعم حلو اوي احسن من الشطة الناشفة
ندخل علي الطريقة :-
انا سلقت المكرونة الاول
وبعدين شوحت البيف علي نار هادية في معلقتين سمنة عشان اعرف افرده في الصينية علي المكرونة وطفيت عليه
وسبته يبرد لحد ماشطفت المكرونة بالمياه ورحت دهنت الصنية معلقة سمنة كبيرة وحطيت الصلصة علي المكرونة والبيف وضربت البيضة وضيفتها والبهارات اللي قولت عليها وقلبتهم كلهم في بعض عشان كل حاجة تتوزع صح الصلصة والبهارات والبيف
وكنت مسخنة الفرن قلبها كويس حوالي عشر دقايق وبعده كده دخلتها الفرن ومأخدتش نص ساعة علي بعض وكانت جاهزة
الاضافات الي ممكن تحطيها جنبها سلطة خضرا وممكن سلطة طحينة وعيش محمص وكده يعني
و جوزي الحمدلله شكر فيها وعجبته وبنتي كمان 
وبألف هنا يارب للي يجربها وتبقو تدعولي بس ياريت اللي عجبه الموضوع يدعيلي دعوه حلوه كده
في امان الله
|
نورتيني حبيبتي
اخجلتم تواضعنا بزوقك الرفيع
|
ان شاء الله سأحرص علي ذلك بالمرة القادمة
جزاكي الله خيرا
نورتيني
وطيران
على المفضلة
