النهاردة بقي أنا عملت حاجة لأول مرة وطلعت جنااااااااان
تخيلوا انى لأول مرة أعمل بيتزا خيبة أنا صح
المهم انى عملتها وطلعت تجنن وأوعدكم طبعا انها ماتكونش آخر مرة أعمل فيها بيتزا لاااااااااااااا ده أنا حابدع فيها ومش بعيد افتح محل هنا ينافس بيتزا هت
طبعا بهزر يعنى
البيتزا اللى عملتها هي بيتزا دوار الشمس لغادة التلى
وبقالي فترة عايزة أعملها بس ماسمحتش الظروف لانى بقالي فترة تعبانة
وجات مناسبتها بصراحة عشان المسابقة
وهبة كان عندها احساس انى حاعملها وماكدبتش احساسها
ياتري الريحة واصلاكى ياهوبة
؟
نشوف صور تعذيبية كده
ودى كام واحدة ميني عملت تلاتة بس صورت اتنين طبعا التالتة كلتها في الطريق
فظيعة أنا مش كده
نشوف بقي المقادير لانى بقيت رغاية بشكل أفظع
بالنسبة للبيتزا
4 كوب دقيق
4 ملعقة لبن بودرة ممكن الاستغناء عنه بس حطيناه للطعم الغني
2 ملعقة كبيرة خميرة
رشة ملح
1/ ملعقة ص سكر
كوب ماء للعجن
1/2 كوب زيت زيتون
جبنة موزاريلا للوجه
الحشوة سوسيس زيتون فلفل رومى
الصلصة أنا عملتها سريعة
2 ملعقة صلصة
2 ملعقة كاتشاب
زعتر رشة ملح فلفل أسود
البيتزا مافهااااااااش أى حاجة طبعا بتحطى المقادير الجافة على بعض وتقلبيها
وتحطى الماية حبة بحبة لحد العجينة ماتلم معاكي ويبقي الطبق نظيييييييييييف
شيليها من العجانة واعجنى فيها واخدميها حلو عشان تطلع صح
وبعدين حطيها في طبق بلاستيك وغطيها عشان تخمر في مكان دافئ
في نفس الوقت حضري حشوتك والصلصة بانك تحطي مكونات الصلصة على بعض وضيفي شوية ماية وسيبيها تتسبك وممكن تحطى ثوم بودر بس نسيت أجيبه
افردي العجينة بعد ماخمرت وحطيها بالصينية
هي الشيف غادة كانت قالت حطي رشه سميد بالصينية بيخليها تقرمش حلو بس كالمعتاد بنسي نسيان رهيب
وانتى ياعدولة بتفردى الصلصة ماتخليهاش توصل لآخر العجينة من الأطراف ولا من النصف ليه بقي ؟ حنشوف دلوقتى وطبعا أنا ماعملتش كده
حطى الحشوة بالترتيب اللى موضحاه الصور
ماكانش فيه عندى فلفل رومى اتصرفت وقطعت من الشطة الباردة وخلاص
تابعونى لسه ماخلصتش
حنقطع بالسكينة من النص زي ماأنا موضحة
وبعدين حنرفع كل طرف لوحده بالشكل ده
حنعمل كور صغيرة ونحشيها بالجبنة ونحطها بالمنتصف
ندهن اللي باين من العجينة بالبيض
وندخلها فرن على درجة حرارة 200 وطبعا تكونى مشغلاه من قبلها بوقتحتاخد تقريبا حوالى ربع ساعة
ترفعى بالراحة بالسكينة عشان تشوفيها احمرت من تحت ولا لأه لو احمرت كويس شغلي الشواية واديها وش تمام
وده شكلها النهائي
ودى كام واحدة مينى بيتزا
شايفين محمرة من تحت ازاى؟
يارب تكون عجبتكم
أنا بس طالبة منكم تدعولى بالصحة ودوام العافية لانى تعبانة بقالى فترة
مجهود رائع
شفاكى الله وعفاكى من كل سوء
