كل عام وانتم الى الله اقرب
اللهم بلغنا رمضان
ده جدول رمضان للفطار والسحور
يارب دايما مع بعض
ونفيد ونستفيد
يارب الجدول يعجبكم
واى استفسار انا فى الخدمة
دى بعض الترتيبات اللى قبل رمضان يارب تفيدكم
بالنسبة لتجهيز الطعام فأنا بعمل بعض الاشياء التى تساعدنى على استغلال الوقت فى رمضان ومنها:
1:تجهيزالتمر( البلح ) بتفصيصه من النوى ووضعه بالثلاجه عشان اعمله تمر باللبن. 2:تتبيل البانيه(بدون بيض ولا بقسماط )ووضعه فى الفريزر ولما اطلعه
ابقي اعمله بالبيض والبقسماط. واتبل الفراخ
بالزبادى واضعهم فى الاكياس فى الفريزر.وبالنسبة للكفته اتبلها واشكلها على هيئة اصابع وفى الاطباق الفوم فى الاكياس فى الفريزر
3:بعمل كميةعصاج( للرقاق و الجلاش ومكرونة بالبشاميل) واضعها فى اكياس على اد استعمال كل مرة.
4:السمبوسك والقطايف(حلوة وحادقة)بحشيهم وارصهم فى اطباق فوم واضعهم فى اكياس فى الفريزرواطلعهم على القلية على طول
(لاتتركيهم يفكوا )وهما مجمدين فى زيت ساخن غزير.
5:بجهز الباشميل واضعه فى اكياس فى الفريزر على اد استخدام المرة الواحدة(للكوسة والمكرونة) واما بيطلع ادوبه فى شوية لبن.
6:الخضار(بسلة-بامية-ملوخية)بجهزة وفى اكياس وفى الفريزر ايضا .
7:بجهز تسبيكة المحشى والمكرونةوفى اكياس وفى الفريزر (بس انا بعملهم نى فى نى لاننا مش بنحب المسبك).
8:العصائر:المانجو اغسلها واسيبها سليمة واما اخرجها من الفريزر بقشرها واعصرها بتبقى سهله ومثلجه
ولو مستويةاغسلهاو اقشرها واقطعهاقطع كبيروفى اكياس علىاد المرة الواحدة وفى الفريزر.
الجوافه باغسلها وانزع منها البذرواقطعهااربع ارباع وفى اكياس على اد المرة الواحدة وفى الفريزر.
الفراولة باغسلها وانزع منهاالعنقود الاخضرواضعها سليمة وفى اكياس فى الفريزر
9:الخضرة(شبت-كزبرة-بقدونس)بغسلهم واقطعهم رفيع وفى الكيس فى الفريزر اخد منها قدر الحاج
لو فى اى استفسار انا فى الخدمة
اللهم بلغنا رمضان
الثوم لا غنى عنه وطبعا بياخد وقت فى اعداده
فاحنا ممكن نقشره بكميات كبيرة ونطحنه فى الكبه ونضيف عليه ملح وزيت ايا كان نوعه
واذا عندك عبوات الثلج بتعة الفريزر تجبيها وتغطيها بالبلاستيك بتاع الرحلات او اللى بيستخدموه فى السوبر ماركت لتعبئة الجبن وخلافه
المهم تغطى قالب الثلج وتملى الفراغات وبعدين تغطى بطبقه تانيه وتحطيها فى الفريزر وبعد ما تجمد تقدرى تطلعيها من القالب وتصبح مكعبات متقسمه مكعب لكل اكله
وبالف هنا
انا بعمل الكركديه على تمر هندى
الطريقه العاديه لو عندك وقت(باغسل شويه كركديه مع شويه تمر هندى وانقعهم معا واضعهم فى الثلاجة من اول النهار لقرب المغرب ثم اصفيهم
واضع السكر واخففهم بالماء الساقع واقلب بالملعقه مش احطهم فى الخلاط لانه بيعمل رغاوى وريم ابيض بسبب السكر لانه
بيكسرالسكر مش بيدوبه فمش هايتحلى فاهاتضعى سكر كتير(واحنا عاوزين الاقتصاد)
اما الطريقه السريعة(فهى انى باغلى شويه كركديه واضيفهم على التمر هندى واتركهم يبردوا شويه (اما اضعهم فى الفريزر او فى الثلاجه)واكرر الخطوة السابقه فى تحليته وتخفيفه.فبيطلع لونه جميل جداااااااااا
وممكن تضعيه فى قوالب الثلج وفى الفريزر واما تطلعيه ممكن فى شفشق التقديم او تضعى مكعبين فى كل كوب وعليهم شويه ميه ويقدم
بالنسبه للعرقسوس انا زوجى كرهنى فيه بس هاقولك طريقه امى الله يرحمها الكل كان بيشيد به لدرجه اننا كنا بنعمله فى رمضان بكميات كبيرة ونفرقه قبل الافطار على كل الشارع
انتى تجيبى شويه عرقسوس حوالى 5 ملاعق كبيرة وتضعى عليهم نص ملعقة سكر وشويه كرباناتو(بتشتريها من عند العطار) بس تحطى شوية صغيرة على طرف الملعقة(لان كثرته بتمرر)وتعجنيهم مع بعض بشوية ميه بس يبقى يابس مش كله ميه(طبعا لو عاوزة تكترى فى المقدار براحتك) وتحطيه فى صينيه او طبق مسطح وتضعيه فى الشمس(عشان يخمر) بس تبقى مغطياه بمصفه سلك مثلا عشان تستفيدى من الشمس و عشان الاتربه والذباب لغايه اما تحسى انه نشف شويه مش ينشف اوى تلميه بايدك فى قطعه شاش او(اى حاجه شفافه قطعه حرير او قطعه ايشارب)وتعمليهم سرة يعنى تضعى العرقسوس فى قطعه القماش وتربطيها من فوق بتبقى شكل الكرة وبعدين بتحطيها فى شفشق ميه ساقعه فى الثلاجه عشان ينقع ويخرط قبل المغرب تقلبيه والسرة زى ما هى ولو تقيل زودى شوية ميه وصبيه فى شفشق التقديم ممكن تزودى الشفشق اللى فيه السرة شويه ميه وتسبيه فى التلاجه هايخرط تانى و هتلاقيه طعمه ولونه احسن من الشارع مليون مرة والف هنا وشفا والعرقسوس
يارب تعجبكم
تسلمى يا قمر ع المجهود الرائع
|
|
