بعد ان تحدثنا عن اخر ميعاد لصلاة العشا وماذا نفعل عند النسيان فى الصلاه نُكمل الحديث عن مبطلات الصلاة ومكروهات الصلاة ..
///////////////
## (( مبطلات الصلاة )) ##
الشرط الخامس : استقبال القبلة
الشرط السادس : النية
——————————————–
1- مبطلات الطهارة ، كالحدث , وأكل لحم الإبل .
* أن المصلي يدخل الصلاة وهو ناسي مثلا أنه كان أحدث
* أو أكل لحم إبل زي الكفتة الجملي ولم يتوضأ مرة تانية
* أو أحدث داخل الصلاة.. فكده تبطل صلاته وعليه اعادتها
*ملحوظة مهمة :
عليه إعادة الصلاة يعني يبدأ صلاة من الأول
ما يكملش على صلاته اللي أبطلها بالحدث
حتى لو كان أحدث قبل السلام!
2- كشف العورة عمدا يبطل الصلاة
زي واحد داخل يصلي بشورت فوق الركبة (و عورة الرجل من السرة للركبة)
أو واحدة بتصلي ومبينة نص شعرها من قدام من تحت الايشارب
أو لبست هدوم خفيفة يظهر من ورائها لون البشرة ( كده مايعتبرش ساتر ولا تصح به الصلاة)
لأن ستر العورة شرط من شروط صحة الصلاة
لكن إن ظهرت منه من غير تعمد ، وكان المكشوف من العورة قليل أو كتير بس لحق و ستره في الحال.. لم تبطل الصلاة .
3- الانحراف الكثير عن جهة القبلة .
لكن لو انحرف جزء بسيط أو لحاجة بس فجائز.
4- وجود نجاسة على جسمه أو هدومه أو في مكان صلاته
فلو هو عرف أن في نجاسة وافتكرها أثناء الصلاة فشالها بسرعة فصلاته صحيحة
لكن لو تركها وكمل صلاته وهو عارف فكده تبطل!
وكذلك لو هو لم يعرف إلا بعد انتهاء الصلاة ، فصلاته صحيحة .
لأن ربنا رفع عننا الخطأ والنسيان!
**مثالين من الحياة:
مثلا واحد بيشتغل في معمل وكان شايل في جيب البالطو زجاجة فيها عينة بول..
أو أم شايلة ابنها والبامبرز فيه نجاسة
ففي الحالتين كده تبطل الصلاة لكن لا يبطل وضوءهم
لكن لو كانوا ناسيين او مش عارفين فصلاتهم صحيحة
5- الحركة الكثيرة المتوالية في الصلاة لغير ضرورة .
زي منظر شفته أم عمالة تبرق لابنها وتتوعد له.gif?w=1200&ssl=1)
وهي بتصلي عشان يبطل يعمل دوشة وحركة في المسجد
6- ترك ركن من الأركان ، كالركوع والسجود
.
7- تعمد زيادة ركن فعلي ، كالركوع .
8- تعمد تقديم بعض الأركان على بعض .
9- تعمد السلام قبل إتمامها .
10- ترك واجب من واجبات الصلاة متعمدا ذاكراً ، كالتشهد الأول ، أما الناسي فتصح صلاته ويسجد للسهو .
11- تعمد تغيير المعنى في القراءة ..بتغيير الحروف أو الكلمات أو الآيات
فإلى جانب أنه حرام ..فقد أخرج القرآن عن الوجه الذي تكلم الله به ، كما أن الغالب أن المعنى يختلف اختلافاً كثيراً
12- قطع النية ( بأن ينوي ويعزم على الخروج من الصلاة ) .
فمجرد النية دي قبل حتى ما يخرج من الصلاة تبطلها
لأن الأعمال بالنيات!
ولأنه كده بيقطع النية وهو جوة العبادة
لكن لو مجرد هاجس قاله اقطع صلاتك لكن هو مش ناوي يخرج من الصلاة
أو مجرد بس تردد يقطعها ولا لا (زي مثلا واحد خبط على الباب وأنت بتصلي وفكرت تخرج .. لكن طردت الفكرة)
ففي الحالتين لا تبطل الصلاة
13- الضحك قهقهة يبطل الصلاة.. أما مجرد التبسم فلا يبطل الصلاة .
14- الكلام
أن واحد يتكلم جوة الصلاة بكلام مش من الذكر وهو عارف ومتذكر أنه بيصلي .. فده تبطل صلاته
زي مثلا بنت بتصلي ومامتها بتناديها في المطبخ فين الملح يا فوزية.gif?w=1200&ssl=1)
؟
ترد: في النملية يا ماماااااااا.gif?w=1200&ssl=1)
!
أما لو ناسية أو مكنتش عارفة ان ده يبطل الصلاة؟.. فلا تبطل صلاته بذلك .
15- الأكل والشرب .
طبعا مفيهاش كلام!
بس ننبه بالذات على البنات خاصة محبات اللبان
أنه ماينفعش تسيب لبانة في فمها كانت بتمضغها قبل الصلاة وخليتها في فمها وهي بتصلي !!
لأنه طبعا مش من الأدب مع ربنا سبحانه وتعالى وأكيد مش هتعرف تقرا قرآن كويس
ثانيا لأن مجرد المضغ يبطل الصلاة
ولو اللبانة فيها سكر (وطبعا السكر هيذوب) فلما يصل شئ من طعمه لجوفها كده برضو تبطل الصلاة.
1- الخصر في الصلاة
أن الواحد يصلي و ايده على وسطه..لأن النبي صلى الله عليه وسلم نهى عن ذلك.
2- رفع البصر إلى السماء
ودي بقى بنشوفها كتير لما الإمام يقول سمع الله لمن حمده نلاقي واحد بيصلي راح رفع ايده وباصص لفوق
فأولا الموضع ده (سمع الله لمن حمده) بنرفع فيه الايد زي ما بنرفع ايدينا واحنا بنكبّر
XX مش على هيئة رفع الايد للدعاء XX
يعني الصورة الصح :
ايدي في مقابل الكتفين أو الأذنين
ثانيا نهى النبي صلى الله عليه وسلم عن النظر للسماء جاء شديدا
قال رسول الله صلى الله عليه وسلم:
"لينتهين أقوام يرفعون أبصارهم إلى السماء في الصلاة أو لا ترجع إليهم"
3– الالتفات في الصلاة (الحركة)
عن عائشة قالت: سألت رسول الله صلى الله عليه وسلم عن الالتفات في الصلاة فقال:
"هو اختلاس يختلسه الشيطان من صلاة العبد"
يعني الشيطان بيسرق من صلاتك بقدر ما أنت بتتحرك وتلتفت في الصلاة
طيب ازاي أعرف إن كانت حركاتي في الصلاة تبطلها ولا لا؟
عايزين نصحح معلومة منتشرة جدا بالرغم من أن مالهاش أصل في الدين ولاجاء حديث قال بها
معلومة أن أنت لو اتحركت في الصلاة أكتر من 3 حركات فصلاتك باطلة
XX فالكلام ده غلط XX
لكن الحركات في الصلاة بتنقسم ل 5 أنواع:
القسم الأول : حركة واجبة.
زي مثلا لو كنت بتصلي في ملابس وشعرت أن جزء من جسمك ظهر فعايز تستره.. فدي حركة واجبة
أو مثلا كنت بتصلي في غير اتجاه القبلة وحد نبهك وأنت بتصلي فتتحرك في اتجاه القبلة..فتكمل صلاتك عادي ماتخرجش منها.
القسم الثاني : حركة محرمة.
اللي بيتحرك حركات كتير ومتوالية (ورا بعضها) من غير ضرورة .. فدي حرام وتبطل الصلاة.
القسم الثالث : حركة مكروهة.
حركات كتيرة بغير ضرورة زي اللي يهرش في راسه ..
بنت بتلعب في الخاتم في صباعها أو كل شوية تقعد تعدل الايشارب.
القسم الرابع : حركة مستحبة.
زي مثلا لو الصف اللي بتصلي فيه مش مظبوط فتحركت عشان الصف يستوي
أو قدمت خطوة للصف اللي قدامك (وأنت بتصلي) عشان تسد مكان فيه
لأن ده مستحب في الصلاة.
القسم الخامس : حركة مباحة.
حركة قليلة أو كتيرة بس للضرورة
ومثال عليها أن النبي صلى الله عليه وسلم كان بيصلي وهو شايل حفيدته لبابة بنت زينب فإذا قام حملها ، وإذا سجد وضعها.
4- الصلاة في ملابس فيها صور و رسومات أو يكون في اتجاه القبلة صور
لأنها تلهي في الصلاة
وكذلك نفس الكلام على المصلية اللي فيها صور لأنها بتشغل
وكذلك أن الواحد يصلي وقدامه تلفزيون مفتوح
الخلاصة:
تكره الصلاة إلى جهة الصور أو ما يلهي في الصلاة.. ومما يدل لذلك حديث أنس رضي الله عنه قال: كان قرام لعائشة سترت به جانب بيتها، فقال النبي صلى الله عليه وسلم:
أميطي عنا قرامك هذا فإنه لا تزال تصاويره تعرض لي في صلاتي. رواه البخاري
القرام: ستارة
5- الصلاة في وجود الطعام
عن النبي صلى الله عليه وسلم قال:
"إذا حضر العِشاء وأقيمت الصلاة فابدوا بالعَشاء"
والحديث مش مخصوص بالعشاء فقط ..
لكن
إذا حضر أي طعام وقت الصلاة وأنت جائع .. فابدأ بالطعام عشان ماينشغلش قلبك ويضيع خشوعك
6- الصلاة مع مدافعة الحدث
عن عائشة قالت إني سمعت رسول الله صلى الله عليه وسلم يقول :
" لا صلاة بحضرة الطعام ، ولا هو يدافعه الأخبثان" صحيح مسلم
الأخبثان: البول والبراز
ومعنى الحديث مينفعش واحد يصلي وهو محصور عشان هينشغل قلبه وهو بيصلي بالشئ ده
ونقيس عليها أي شاغل ممكن يشغل تفكير الواحد وهو بيصلي ويضيع خشوعه
زي ست البيت اللي بتحط الطبيخ على النار وهي بتصلي وكل تفكيرها زمانه اتلسع.. لا زمانه شاط .. يوه نسيت أقفل محبس المية!
وتدبر شغل البيت كله وهي بتصلي
أو واحد مستني مكالمة على الموبايل..وبعدها دخل يصلي
ويرن الجرس ويفضل يفكر زمانهم قلقوا عليّ…زمانهم.. زمانهم..
فالمفروض نقطع أي سبب ممكن يشغلنا عن الصلاة قبل الصلاة
البوتاجاز يتطفي
الموبايل يتقفل
وهكذا
7- التثاؤب
قال رسول الله صلى الله عليه وسلم:
"إذا تثاوب أحدكم في الصلاة ، فليكظم ما استطاع . فإن الشيطان يدخل" صحيح مسلم
يعني لو الشخص حس أنه عاوز يتاوب يكتمها في فمه أو يضع ايده عليه على أد ما يقدر لأن الشيطان يدخل فمه لما بيفتحه
*معلومة مهمة:
الاستعاذة من الشيطان عند التثاؤب مفيش دليل أن النبي أو الصحابة فعلوها
8- كفت الشعر والثوب
الكفت يعني اللم والضم .. وكلمة كفت جاءت من قول الله تعالى:
"ألم نجعل الأرض كفاتا"
والنهي جاء في حديث
عَنْ ابْنِ عَبَّاسٍ رضي الله عنهما أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ :
( أُمِرْتُ أَنْ أَسْجُدَ عَلَى سَبْعَةِ أَعْظُمٍ : عَلَى الْجَبْهَةِ – وَأَشَارَ بِيَدِهِ عَلَى أَنْفِهِ – وَالْيَدَيْنِ وَالرُّكْبَتَيْنِ وَأَطْرَافِ الْقَدَمَيْنِ ، وَلَا نَكْفِتَ الثِّيَابَ وَالشَّعَرَ) .
يعني منهي في الصلاة عن كفت الملابس بأن كل شوية يقعد يلمها ويشمرها عشان لا تسقط على الأرض وهو بيسجد
زي اللي بيشمر البنطلون بحركة لا إرادية لما يجي يسجد
وكذلك تشمير الأكمام… ولم الشعر تحت العمامة.
9- الاعتماد على اليد في الصلاة وتشبيك الأصابع
يكفي الأثرين اللي وردوا عن عبدالله بن عمر رضي الله عنه
وأكيد عبدالله بيقول كده نقلا عن النبي صلى الله عليه وسلم
قال ابن عمر في الذي يصلي وهو مشبك : تلك صلاة المغضوب عليهم .صححه الألباني
زي مثلا واحد لما بيصلي بيضع أيده على صدره بيشبكهم بدل ما يضع اليمنى على اليسري
عن ابن عمر أنه رأى رجلا يتكئ على يده اليسرى وهو قاعد في الصلاة –قال هارون بن زيد ساقطا على شقه الأيسر– ثم اتفقا فقال له: لا تجلس هكذا فإن هكذا يجلس الذين يعذبون .حسنه الألباني
يعني اللي بيسند بايده الشمال على الأرض وهو قاعد في التشهد مثلا أو الجلسة بين السجدتين… فدي جلسة الناس اللي بيتعذبوا في النار عياذا بالله
بس أقول *ملاحظة..
أن ده ورد النهي عن الجلوس بالوضع ده في الصلاة فقط
لكن مفيش دليل أن الجلوس بالوضع ده منهي عنه خارج الصلاة لأنه عادة مباحة.
10- تغميض العينين
في علماء كرهوها لو كانت من غير ضرورة أو حاجة
وقالوا أسباب كتيرة تدعو للتدبر :
ـــ منها لأن ده فعل اليهود
ـــ وكمان سنة النبي صلى الله عليه وسلم في الصلاة ماجاش فيها أنه كان يغمض عينيه بل العكس صحيح جاءت أحاديث تفيد أن النبي كان يرى وينظر وهو يصلي
ـــ تغميض العينين سبب داعي للنوم
ـــ أن كل عضو من الجسم له حظه من العبادة.. فالعين بتنظر لموضع السجود فتغميضها كأنه حرمان لها
وعلماء تانيين أجازوا تغميض العينين للمصلحة والضرورة
زي مثلا راجل بيصلي و رأى زوجته أو واحدة أجنبية عنه بلبس غير محتشم فغمض عينه عشان صورتها وشكلها ما يشغلش قلبه.
فالخلاصة:
ما قاله الامام ابن القيم في زاد المعاد على أن الإنسان إذا كان أكثر خشوعاً بتفتيح العينين فهو أولى ، وإن كان أخشع له تغميض العينين لوجود ما يشغله عن الصلاة من تزويق وزخرفة فإنه لا يكره قطعاً