مقادير العجينه
1 بيضه
2 ملعقه خميره صغيره
نص كوب لبن دافى
3 كوب دقيق
3 ملعقه كبيره زيت زيتون ولو مش موجود ممكن زيت دره
ملعقه سكر صغيره
نص ملعقه ملح صغيره
اول خطوه نحط ملعقه سكر وملعقتين الخميرة على نص كوب لبن دافئ ونقلبهم ونسيبهم على جمب يخمرو
وفى الوقت ده نروح للدقيق ونحط عليه نص ملعقه الملح و 3 ملاعق زيت الزيتون والبيضه
ونروح حاطيين نص كوب اللبن اللى عليه الخميرة والسكر عليهم ونعجنهم مع بعض
هنلاقى العجينه محتاجه لميه نبقا ساعتها نكمل بميه دافيه ونعجن لحد ما نلاقى العجينه بقت متماسكه وسابت من ايدينا
نمسح ايدينا بشويه زيت زيتون ونمشيها ع العجينه ونغطيها بفوطه ونسيبها فى مكان دافئ تخمر لمدة ساعة
وده شكلها بعد ما خمرت
ممكن لو حابيين اننا نستخدمها فى وقت تانى نحفظها فى كيس ونشيلها فى التلاجه او فى الفريزر لو هتقعد اكتر من يوم
ولو هنستخدمها على طول هنقسم العجينه نصين لان الكميه دى تعمل 2 بيتزا كبيرة
نيجى بقا لفرد العجينه اول حاجه هنعملها اننا ندهن الصينيه بشوية زيت صغيرين
ونحط العجينه ونفردها بسمك واحد سنتيمتر
ونسيبها تخمر نص ساعه نكون جهزنا الحاجات اللى هنحطها ع الوش
الحشو : صلصه بيتزا – فلفل اخضر مكبب – زيتون – بصله – سجق او ممكن تونه او لحمه او لانشون او ممكن نسغنى عن كل ده ونكتفى
بالخضار والجنبه لو حابيين انها تكون مارجريتا – جبنه موزاريلا او جبنه تركى
اول حاجه هنعملها للعجينه اللى فردناها اننا هنحط الصلصه الاول
وبعدين نحط الفلفل المكبب
وبعد كده البصل
وبعدين الزيتون
والسجق او الحاجه اللى هنحبها وتكون عندنا
وندخلها الفرن وفى نص السوا بتاعها نطلعها ونحط الجبنه الموزاريلا والتركى
ونسيبها لحد ما تكمل سوا والجبنه تسيح وده شكلها لما طلعتها
وبنص العجينه التانيه فردتها بالمشاية وجبت كوباية وعملت بيها دواير
وبنفس الخطوات اللى فاتت عملت بها ميني بيتزا دواير بيتزا صغيرة
وده شكلها لما طلعت
ان شاء الله تجربوها وتعجبكم
تسلم ايديك يا حبيبتى
تم التكريم
